¹ Ammaaruri, ammaaruri, ke a le raya, yo o sa tseneng ka kgoro mo lesakeng la dinku, a tlolela ka tsela e nngwe, monna yoo ke legodu ebile ke serukutlhi. ² Yo o tsenang ka kgoro ke modisa wa dinku. ³ Motlhokomela kgoro o a mmulela. Dinku di utlwa lentswe la gagwe, o bitsa dinku tsa gagwe ka leina, a bo a di etelela pele a tswa ka tsone. ⁴ Fa a sena go ntshetsa kwa ntle tsotlhe tsa gagwe, o di etelela pele, mme dinku di mo sala morago, ka gonne di itse lentswe la gagwe. ⁵ Ga di sale motswakwa morago, boemong ja seo di a mo katoga, gonne ga di itse lentswe la batswakwa.'' ⁶ Jeso a bua setshwantsho se le bone, mme dilo tse a neng a di bua le bone tse ba ne ba sa di tlhaloganye. ⁷ Jeso a ba raya gape a re, ''Ammaaruri, ammaaruri ke a le raya, ke nna kgoro ya dinku. ⁸ Mongwe le mongwe yo o tsileng pele game ke legodu ebile ke serukutlhi, dinku ga di a ka tsa mo reetsa. ⁹ Ke nna kgoro. Ope yo o tsenang ka nna o tla bolokwa; o tla tsena mo teng a bo a tswa ebile o tla bona mafulo. ¹⁰ Legodu ga le tle fa e se go tla go utswa go bolaya le go senya. Ke tsile gore di tle di bone botshelo, di bo bone ka botlalo. ¹¹ Ke nna modisa yo o molemo. Modisa yo o molemo o neela botshelo jwa gagwe ka ntlha ya dinku. ¹² Motlhanka yo o hirilweng ga se modisa ebile ga se ene mong wa dinku. Fa a bona phiri e tla o tlogela dinku o a tshaba, mme phiri e tsaya dinku e tsamaya ka tsone e bo e di phatlalatsa. ¹³ O a tshaba ka gore ke motlhanka yo o hirilweng ga a kgathale ka dinku. ¹⁴ Ke nna modisa yo o molemo, ke itse tsame, tsame di a nkitse. ¹⁵ Rara o a nkitse, le nna ke itse Rara, ke neela botshelo jwame ka ntlha ya dinku. ¹⁶ Ke na le dinku tse dingwe tse e seng tsa lesaka le. Le tsone ke tshwanetse go di tsisa, mme di tla utlwa lentswe lame gore go tle go nne le letsomane le le lengwe le modisa a le mongwe. ¹⁷ Ke sone se Rara a nthatang; ke neela botshelo jwame gore ke tle ke bo tseye gape. ¹⁸ Ga go na ope yo o bo tsayang mo go nna, ke bo neela ka bonna. Ke na le taolo ya go bo neela, ebile ke na le taolo ya go bo tsaya gape. Ke amogetse taelo e go tswa kwa go Rara.'' ¹⁹ Kgaogano ya diragala gape gare ga Bajuta ka ntlha ya mafoko a. ²⁰ Bontsi jwa bone ba re, ''O na le letimone ebile o a tsenwa. Ke eng le mo reetsa?'' ²¹ Ba bangwe ba re, ''A ga se mafoko a monna yo o tletseng ka matimone. A letimone le ka bula matlho a ba ba foufetseng?'' ²² Ya bo e le nako ya moletlo wa Go Neelwa mo Jerusalema. ²³ Go ne go le mariga, Jeso o ne a tsamaya mo tempeleng fa mathuding a ga Solomone. ²⁴ Foo Bajuta ba mo dikaganyetsa ba mo raya ba re, ''O tla re belaetsa ka lebaka le le leele go le kae? Fa o le Keresete, re bolelele phatlalatsa.'' ²⁵ Jeso a ba araba a re, ''Ke le boleletse, mme ga le dumele. Ditiro tse ke di dirang mo leineng la Rara, di paka ka ga nna. ²⁶ Mme ga le dumele ka gore ga le dinku tsame. ²⁷ Dinku tsame di utlwa lentswe lame; ke a di itse, ebile di ntshala morago. ²⁸ Ke di neela botshelo jo bo sa khutleng; ga di kitla di swa, ebile ga go na ope yo o ka di phamolang mo seatleng same. ²⁹ Rara, yo o di nneetseng, o mogolo go feta ba bangwe botlhe, ebile ga go na ope yo o kgonang go di phamola mo seatleng sa ga Rara. ³⁰ Nna le Rara re mongwe. ³¹ Bajuta ba sela matlapa gape go mo ngata ka one. ³² Jeso a ba araba a re, ''Ke le bontshitse ditiro tse dintsi tse di molemo go tswa kwa go Rara. Ke efe ya ditiro tse e le e nngatelang ka matlapa?'' ³³ Bajuta ba mo araba, ''Ga re go ngate ka matlapa ka ntlha ya tiro epe e e molemo, re go ngatela go roga Modimo, ka gore wena, motho, o itira Modimo.'' ³⁴ Jeso a ba araba a re, '' A ga go a kwalwa mo molaong wa lona, ' Ke rile, ''Le medimo'''? ³⁵ Fa a ba biditse medimo, bone ba lefoko la Modimo le neng le tla kwa go bone(mme dikwalo ga di kake tsa rojwa), ³⁶ a le raya yo Rara a mo tlhaotseng a bo a mo roma mo lefatsheng, le re, 'O roga Modimo,' ka go bo ke rile, 'Ke Morwa Modimo'? ³⁷ Fa ke sa dire ditiro tsa ga Rara, le se ka la dumela mo go nna. ³⁸ Fa ke di dira, le fa le sa dumele mo go nna, dumelang mo ditirong gore le tle le itse le bo le tlhaloganye gore Rara o mo go nna le nna ke mo go Rara.'' ³⁹ Ba leka go mo tshwara ka diatla gape, mme a swapoga mo diatleng tsa bone. ⁴⁰ A tswa a tsamaya gape a ya moseja ole wa Jorotane kwa Johane a neng a kolobetsa teng la ntlha, a nna koo. ⁴¹ Batho ba le bantsi ba tla kwa go ene ba re, ''E le ruri Johane ga a a ka a dira dikai, mme dilo tsotlhe tse Johane a di buileng ka monna yo ke boammaaruri.'' ⁴² Batho ba le bantsi ba dumela mo go ene.