¹ Mme Paulo o ne a ntse a bua matshosetsi a go bolaya barutwa ba Morena, aya kwa moperesiteng yo mogolo, ² go kopa makwalo a a tla mo fang tetla ya go ya kwa di senagogeng tsa Damasekase, kwa etlareng a fitlhela mosadi kgotsa monna ope fela yo o dumelang mo tseleng e, a ba tshware, a ba ise kwa Jesrusalema. ³ E ne yare a santse ale mo mosepeleng, a atumela Damasekase, ka bofefo lesedi le le tona gotswa legodimong la phatsima go modikologa; ⁴ a wela fa fatshe mme lentswe la mora ya lare, "Saulo, Saulo o mpogisetsang?" ⁵ Saulo a araba a re, " Morena, o mang?" Morena a re, " Ke nna Jeso yo o mpogisang; ⁶ mme ema, o tsene mo toropong, otla bolelelwa gore o dire eng." ⁷ Banna ba ba neng ba tsamaya le Saulo ba felelwa ke mafoko, ka ba utlwa lentswe, mme ba sa bone ope. ⁸ Saulo a tsoga fa fatshe, fa a bula matlho, a seka a bona sepe, jalo ba mogoga ka letsogo ba mo isa Damasekase. ⁹ A nna matsatsi a mararo a sa bone, a sa je, ebile and sa nwe sepe. ¹⁰ Ga bo go le morutwa ko Damasekase a bidiwa Ananiase; morena a bua le ene mo ponatshegelong a re, "Ananiase". A bo a re, "Bona, ke fano Morena." ¹¹ Morena a mo raya a re, "Ema o ye kwa tseleng e bidiwang Tolamo, o ye ko ntlong ya ga Judase, otla fitlhela monna wa kwa Tarasuse yo bidiwang Saulo, o a rapela, ¹² mme o bone mo ponatshegelong monna yo o bidiwa Ananiase, a mmaya matsogo gore a bone gape." ¹³ Mme Ananiase a araba a re ," Morena ke utlwile ka batho ba le bantsi ka ga monna yo, le ka fa a tlhokofaditseng baitshepi ba gago ka teng kwa Jerusalema. ¹⁴ O neetswe taolo ke baperesiti ba bagolo go tshwara botlhe ba ba bitsang leina la gago." ¹⁵ Mme Morena a mo raya a re, "Tsamaya, go nne ke mo ikgethetse, go paka ka leina lame mo baditshabeng, dikgosi le bana ba Iseraela; ¹⁶ ke tla a mo supegetsa ka fa a tsileng go boga ka teng ka ntlha ya leina lame." ¹⁷ Ananiase a tsamaya, a tsena mo ntlong. Fa a mmaya matsogo a mo raya a re," Mokaulengwe Saulo, Morena Jeso yo aneng a go iponagaletsa motseleng fa otla, o nthumile gore o tle o kgone go amogela pono ya gago le go tladiwa ka Mowa o Boitshepho." ¹⁸ Ka ponyo ya leitlho dikgapetlana tsa wa mo matlhong a ga Saulo, a amogela pono ya gagwe; a ema, a kolobediwa; ¹⁹ mme a ja, a nna le nonofo. A nna le barutwa mo Tamasekase malatsi a le mmalwa. ²⁰ A simolola go rera ka ga Jeso mo di senagogeng, a bolela fa e le morwa Modimo. ²¹ Botlhe ba baneng ba mo utlwa ba sala ba gakgametse, ba bua bare, "A monna yo gase ene yo aneng a bolaya batho botlhe kwa Jerusalema ba ba neng ba bua ka leina le? ebile o tsile go ba tshwara a ba bofa a ba isa kwa baperesiting ba bagolo." ²² Mme Saulo a tswela ka go nonofa, a tsisa tlhobaelo mo Bajuteng ba ba mo Tamasekase ka go rurufatsa fa Jeso ele keresete. ²³ Morago ga malatsi, Bajuta ba loga segwenegwene sa go mmolaya. ²⁴ Saulo a itse selo se. Ba nna ba disitse dikgoro bosigo le motshegare gore batle ba mmolaye. ²⁵ Mme barutwa ba gagwe bamo tsaya bamo tlodisa lebota bosigo, ba motsentse mo kgamelong. ²⁶ Fa a tsena kwa Jerusalema, Saulo a leka go kopana le barutwa mme ba mo tshaba, ka bane ba sa dumele fa ele morutwa. ²⁷ Mme Barenabase amo tsaya a mo tsisa kwa baaposetolong. A ba bolelela ka fa Saulo a boneng morena mo tseleng ka teng, le gore Morena o ne a bua le ene, le ka fa Saulo a neng a rera ka bopelokgale ko Tamasekase mo leineng la ga Jeso. ²⁸ A kopana le bone jaaka ba ne ba tswa ba tsena mo Jerusalema. A bua ka bopelokgale ka leina la Morena Jeso, ²⁹ a ganetsana le Bajuta ba ba Gerika; mme bane ba tswelela ka go batla go mo mmolaya. ³⁰ Yare bakaulengwe ba lemoga se, ba mo isa kwa Kasarea, ba mo romela ko Tarasuse. ³¹ Ka Jalo, kereke mo Jutia,Galalea le Samarea ya nna le kagiso, ya agiwa; le go tsamaya mo poifong Modimong, le mo kgomotsong ya Moya yo o Boitshepho, kereke ya gola ka dipalo. ³² Ga diragala gore jaaka Petere ane a tsamaya mo kgaolong yotlhe, a ya kwa bakaulengweng ba baneng ba nna mo toropong ya Leyata. ³³ Gone koo a kopana le monna mongwe yo o bidiwang Anease, a na le dingwaga dile boferabobedi ale mo bolaong, ka ane a sule mohama. ³⁴ Petere amo raya are "Anease, Jeso o a go fodisa. Tsoga o alololea bolao ba gago." ³⁵ A tsoga ka bonako. Mongwe le mongwe yo nnang mo Layeta le Sharone ba bona monna yo, ba sokologela mo Moreneng. ³⁶ Gabo gole morutwa mongwe ko Jopa, wa leina la Tabeta gotewa "Tokase". Mosadi yoo o ne a dira ditiro tse di molemo le ditiro tsa boutlwelo botlhoko mo go ba ba humanegileng. ³⁷ Ga diragala mo malatsi ao gore a lwale, mme a swa; ba mo tlhapisa, ba mmaya kwa ntlong e e kwa godimo. ³⁸ Ka gore Layata o ne a bapile le Jopa, barutwa ba utlwa gore Petere o koo, ba roma banna ba babedi ba mo kopa ba re, "Tlaa kwa go rona ka bofefo". ³⁹ Petere a ema a tsamaya le bone.Yare a goroga bamo isa kwa ntlong e kwa godimo. Batlholagadi botlhe ba bo ba eme fa go ene ba lela ba mo supegetsa dikobo le diaparo tse Tokase a di dirileng fa a santse a na le bone. ⁴⁰ Petere a ba ntshetsa kwa ntle ga ntlo, a khubama a rapela; go leba moswi a re, "Tabita, tsoga". A bula matlho a gagwe, mme yare a bona Petere a nna ka marago. ⁴¹ Petere amo neela letsogo, amo emeletsa ka dinao; a bitsa badumedi le batlholagi, a ba mo neela a tshela. ⁴² Kgang e ya itsege Jopa otlhe, bontsi ba batho ba dumela mo moreneng. ⁴³ Mme Petere a nna malatsi a le mantsi mo Jopa kwa monneng wa mosugi wa matlalo yo a bidiwang Simone.