¹ Ka malatsi one a, fa palo ya barutwana e ntse e oketsega, go ne ga tlhagoga ngongorego magareng ga batlholagadi ba Bajuta ba Segerika kgatlhanong le Bahebera gonne batlholagadi ba bone ba ne ba ikgatholosiwa mo kabong ya dijo ya letsatsi le letsatsi. ² Barutwana ba ba lesome le bobedi ba bo ba bitsa barutwana botlhe mme ba ba raya ba re, "ga go a tshwanela gore re ka emisa go rera lefoko la Modimo mme re ye go laola kgaoganyo ya dijo. ³ Jalo he, batlang magareng ga lona banna ba le supa ba ba itsegeng ka ditiro tse di molemo , ba tletse ka Moya le botlhale, ba le ka ba tlhomang go dira tiro e. ⁴ Rona re tle re tswelele ka thapelo le bodiredi ja lefoko" ⁵ Kgang ya bone ya itumedisa botlhe. Ba tlhopha Setefane, monna yo o neng a tletse ka tumelo le Moya yo o Boitshepo, le Felipo, Perokoro, Nikanore, Timone, Paremenase le Nikolao wa moditshaba yo o sokologetseng mo Sejuteng a tlholega ko Antioke. ⁶ Badumedi ba tlisa banna ba fa pele ga Ba-apostolo ba ba neng ba rapelela le go ba baya diatla. ⁷ Lefoko la Modimo le ne la anama le go feta, palo ya barutwana mo Jerusalema le yone ya oketsega go menagane ebile bontsi ja baperesite ba ne ba ineela mo tumelong. ⁸ Setefane yo o neng a tletse ka tshegofatso le maatla, o ne a dira dikgakgamatso tse dikgolo le ditshupo mo bathong. ⁹ Mme le fa go ntse jalo go ne ga nna le bangwe ba ba neng ba nganyisana le Setefane tebang le mafoko a gagwe, bone ya bo ele ba ba tswang ko sinagogeng e e bediwang gotwe Bagololwa, le Bakurunia, le Baalekesanteria, le Bakilikia, le Baasia. ¹⁰ Mme ba ne ba retelelwa ke go emelana kgatlhanong le botlhale le Moya o Setefane a neng a bua ka one. ¹¹ Morago ga seo ba ne ba dira lemena le banna bangwe ka sephiri gore ba tle ba re, "Re utlwile Setefane a bua mafoko a tlhapatsang kgatlhanong le Moshe le Modimo." ¹² Morago ga seo ba rotloetsa morafe, le bogolwane, le bakwadi, Ba ne ba latela Setefane, ba mo tshwara mme ba mo isa fa pele ga khuduthamaga. ¹³ Ba tlisa basupi ba maaka, mme bone ba feta ba re, "Monna yo ga a emise go bua kgatlhanong le lefelo le le boitshepo lena le molao. ¹⁴ Gonne re mo utlwile a re Jeso wa Nasaretha o tla senya lefelo le a be a fetola molao o Moshe a re o fileng." ¹⁵ Mongwe le mongwe yo o neng a le mo khuduthamageng, o ne a mo tlhomile matlho mme a bona sefatlhego sa gagwe se ntse jaaka sa moengele.