¹ Jalo Petere le Johane ba ne ba ya tempeleng ka nako ya thapelo ka oura ya boferabongwe. ² Monna mongwe, yoo tsetsweng ka bogole one a isiwa tsatsi le letsatsi fa kgorong ya tempele ee bidiwang Bontle ,go ikopela dimpho mo bathong ba ba tsenang mo tempeleng. ³ Ya re a bona Petere le Johane ba tloga ba tsena mo tempeleng, a ba kopa dimpho. ⁴ Petere a tsepamisa matlho a gagwe mo go ene, ene le Johane ba mo raya ba re, ''re lebe". ⁵ Monna wa segole a ba leba, ka tsholofelo ya gore ba tla mofa sengwe. ⁶ Mme Petere a mo raya a re, '' selefera le gauta ga ke na natso, se ke nang le sone ke tla a se go neela.Ka leina la Morena Jeso Keresete wa Nnasaretha, tsamaya''. ⁷ Petere a mo tsaya ka letsogo la moja go mo emisa; mme ka ponyo ya leitlho dinao tsa gagwe le marapo a manyenyana a gagwe a nonofa. ⁸ Monna wa segole a tlola, a ema a tsamaya; mme a tsena le Petere le Johane mo tempeleng, a tsamaya, a tlolatlola, ebile a galaletsa Modimo. ⁹ Batho botlhe ba mmona a tsamaya ebile a galaletsa Modimo. ¹⁰ Ba lemoga gore ke monna yo o ntseng a amogela dimpho fa kgorong ya tempele ya Bontle,mme ba ne ba tletse ka kakabalo le kgakgamalo ka se se mo diragaletseng. ¹¹ Fa a ntse a na le Petere le Johane ,batho botlhe ba ya ko go bone mo motlaaganeng o o bidiwang wa ga Solomone, ba hakgametse thata. ¹² Fa Petere a bona se, a araba a re, ''Lona banna ba Iseraele ke eng le hakgametse? Ke eng le re lebile jaaka ekete ke rona re dirileng gore a eme ka maatla kgotsa bomodimo jwa rona? ¹³ Modimo wa ga Aborehame,Isake le Jakoba, Modimo wa bo rraetsho ,o galaleditse motlhanka wa gagwe Jeso.Ke ene yo le mo isitseng la bo la mo itatola fa pele ga matlho a ga Pilato,fa ene a ne a re o a mo golola. ¹⁴ Le ganne yo o Boitshepo le Tshiamo, mme la kopa go gololelwa mmolai mo boemong jwa gagwe. ¹⁵ Le bolaile kgosana ya botshelo, yo Modimo a mo tsositseng mo baswing-mme re basupi ba se. ¹⁶ Jaanong, ka tumelo e e mo leineng la gagwe-monna yo le mmonang yo ebile le mo itse-leina le ke lone le mo neileng nonofo.Tumelo mo go Jeso ke yone e mo fileng botsogo jo bo feletseng mo matlhong a lona lotlhe. ¹⁷ Jaanong, bagaetsho, itse gore lona le babusi ba lona le dirile se ka botlhoka kitso. ¹⁸ Mme dilo tse Modimo a sa leng a di boletse ka melomo ya baporofiti botlhe,gore Keresete o tla boga,o setse a di diragaditse. ¹⁹ Jalo hee, ikotlhaeng le bo le sokologe,gore dibe tsa lona di itshwarelwe, gore go tle go tle nako ya go nonotshwa go tswa mo Moreneng. ²⁰ Gore a tle a tlise Keresete yo le mo neilweng ebong Jeso. ²¹ Ke ene yo legodimo le tshwanetseng go mo amogela go fitlhela puseletso ya dilo tsotlhe,ka se Modimo a se buileng bogologolo ka melomo ya baporofiti ba gagwe ba ba boitshepo. ²² Moshe ka nnete o rile, 'Morena o tla ntsha moporofeti yo o tshwanang le nna go tswa mo go bagaeno. Le tla a reetsa sengwe le sengwe se a tla se buang le lona. ²³ Go tlaa diragala gore ope fela yo o sa reetseng moporofiti yoo, o tla nyelediwa gotlhelele mo bathong. ²⁴ Ee, baporofite botlhe go tswa kwa go Samuele, le ba ba tlang fa morago ga gagwe, ba buile ebile ba le itsisitse ka malatsi a. ²⁵ Le barwa baporofiti, le ba kgolagano e Modimo a e dirileng le borraeno, jaaka a buile le Aborehama, 'Mo peong ya gago malwapa otlhe a lefatshe a tla segofadiwa.' ²⁶ Fa Modimo a sena go tsisa motlhanka wa gagwe, o mo rometse kwa go lona pele, gore a tle a le segofatse ka go le ntsha mo ditseleng tsa lona tsa boikepo.''