¹ Fa letsatsi la pentakosete le tla, ba ne ba le mmogo mo lefelong le le lengwe. ² Ka bonako ga tla mosumo o mogolo go tswa legodimong o utlwala jaaka phefo ee masetla, mme ya apesa ntlo yotlhe e ba neng ba ntse mo go yone. ³ Ga tla mo go bone diteme tse di mo tshwanong ya molelo , tsa nna mo go mongwe le mongwe wa bone. ⁴ Botlhe ba ne ba tladiwa ka Moya yo o Boitshepo mme ba bua ka diteme tse di farologanyeng, jaaka Moya o ba neetse go bua. ⁵ Mme ga bo go le Bajuta ba ba nneng ba nna mo Jerusalema, batho ba ba boifang Modimo, go tswa mo tshabeng nngwe le nngwe tlase ga legodimo. ⁶ Fa mosumo o o utlwala, bontsintsi jwa batho jwa phuthega mme jwa tsietsega ka gore mongwe le mongwe o ne a utlwa ba bua ka teme ya gagwe. ⁷ Ba ne ba hakgamala thata ba re,"Tota! a gase gore botlhe ba ba buang ba ke Bagalalea? ⁸ Ke ka goreng re ba utlwa, bangwe le bangwe ka puo ya rona e re tshotsweng ka yone? ⁹ Bapharatha, Bamedia, le Baelame le ba ba nnang mo Mesopotamia, mo Jutia le Kapatokia, mo Ponto le mo Asia, ¹⁰ Mo Feregia le Pamefilia, mo Egepeto le dikarolo tsa Lebia ka Kirene, le baeng go tswa ko Roma, ¹¹ Bajuta le Baditshaba ba ba sokologetseng mo sejuteng, Bakereta le Baarabia, re ba utlwa ba bua ka diteme tsa rona ka ditiro tse dikgolo tsa Modimo''. ¹² Ba sala ba hakgametse, mme ba raana bare, ''se se rayang eng?'' ¹³ Bangwe ba ba sotla mme bare, ''ba tagilwe ke mofine o mosha.'' ¹⁴ Mme Petere a ema le ba ba lesome le motso, a tsholetsa lentswe la gagwe, a ba raya are,'' banna ba Jutea le botlhe ba ba nnang mo Jerusalema , itseng se, sekegelang mafoko ame tsebe. ¹⁵ Batho ba ga baa tagwa jaaka le akanya, ka gore e santse ele oura ya boraro ya letsatsi. ¹⁶ Mme se ke se se boletsweng ke moporofiti Joele , ¹⁷ 'Mo malatsing a bofelo,' Modimo are, 'ke tlaa tshela moya wame mo bathong botlhe. Barwa le barwadia lona ba tlaa porofeta, makawana ba tlaa bona diponatshegelo mme bannabagolo ba tlaa lora ditoro. ¹⁸ Gape mo malatsing ao ke tlaa tshela Moya wa me mo batlhankeng bame ba basimane le basetsana mme ba tla a porofita. ¹⁹ Ke tlaa supa dikgakgamatso tsa madi, molelo, le mosi mo lewaping le mo lefatsheng ko tlase. ²⁰ Letsatsi le tlaa fifala, ngwedi o tlaa nna jaaka madi,pele ga letsatsi le legolo la Morena le tla. ²¹ Mme mongwe le mongwe yoo bitsang leina la Morena o tlaa bolokwa. ²² Banna ba Israele utlwang mafoko a; Jeso wa Nnasaretha yo ditiro tsa gagwe tse dikgolo di supilweng ke Modimo mo gare ga lona jaaka lo itse, ²³ Ka ntlha ya lenaneo la Modimo le kitso ya pele ya Modimo , o ne a neelwa mo diatleng tsa baba, mme lona, ba le senang molao, la mmapola la mmolaya. ²⁴ Yo Modimo a mo tsositseng, a ntsha ditlhabi tsa loso mo go ene, ka gore go ne go sa kgonege gore loso le ka mo rua. ²⁵ Gonne Tafita o buile ka ga gagwe a re, 'ke bone Morena fa pele ga sefatlhego sa me ka nako tsotlhe, gonne o ka fa letsogong le legolo la me gore ke seka ka suta. ²⁶ Ka jalo pelo yame ya itumela, loleme lame la ipela le mmele wame o tla nna ka boitekanelo. ²⁷ Mme gao kitla o tlogela moya wame go ya diheleng, le gone ga o kitla o letlelela Moitshepi wa gago go bola. ²⁸ O ntshupegeditse ditsela tsa botshelo; sefatlhego sa gago se tla ntlatsa ka boitumelo. ²⁹ Bagaetsho, nka bua le lona ka bopelokgale ka rraetsho Tafita: yo o suleng mme a fitlhwa, le lebitla la gagwe le na le rona gompieno. ³⁰ Jalo he, e ne ele moporofiti mme a itse gore Modimo o ikanne, gore o tlaa tlotlomatsa lengwe la leungo la mmele wa gagwe mo teroneng ya gagwe. ³¹ O ile a bonelapele selo se, mme a bua ka tsogo ya ga Keresete, 'Ga a tlogelwa mo diheleng, le mmele wa gagwe ga wa bola'. ³² Jeso yo- Modimo o mo tsositse, mme le rona re basupi. ³³ Jaanong o tsholeleditswe kwa letsogong le legolo la Modimo o amogetse tsholofetso ya Moya yo o Boitshepo go tswa mo Modimong, o re ntsheditse se, se re se bonang re bo re se utlwa. ³⁴ Gonne Tafita gaa ise a tlhatlogele kwa legodimong, mme are, "Morena o ne a raya morena wame are,"Nna mo letsogong le legolo lame, ³⁵ go fitlhela ke dira baba ba gago bobeo jwa dinao tsa gago." ³⁶ Jalo he, a botlhe ba ntlo ya Iseraele ba itse gore Modimo o mo dirile Morena le Keresete, ene Jeso yo le mmapotseng. ³⁷ Fa ba utlwa se, ba tlala ka boikotlhao mo dipelong tsa bone, mme ba raya Petere le botlhe baaposetolo bare" Bagaetsho, re dire eng? ³⁸ Petere a ba raya are," A mongwe le mongwe wa lona a ikotlhae, a bo a kolobediwe mo leineng la ga Jeso Kereste gore le itshwarelwe dibe,mme le tla amogela neo ya Moya yo o Boitshepo. ³⁹ Gonne tsholofetso ke ya lona, le bana ba lona, le ba ba kgakala, botlhe ba morena modimo wa rona o tla ba bitsang." ⁴⁰ A paka ka mafoko a le mantsi, a ba gwetlha a re, '' Ipolokeng mo kokomaneng e e bosula e''. ⁴¹ Bane ba amogela lefoko la gagwe mme ba kolobediwa, mme ga tladiwa barutwa ka letsatsi leo ka mewa ele dikete tse tharo. ⁴² Ba ne ba tswelela mo thutong ya baaposetolo le botsalano, mo go robaganyeng borotho, le mo thapelong. ⁴³ Poifo ya tla mo go botlhe, dikgakgamatso le ditshupetso di ne tsa dirwa ka baaposetoli. ⁴⁴ Ba ba neng ba dumela ba ne bale mmogo mme ba na le dilo tse di tshwanang. ⁴⁵ Ba ne ba rekisa dithoto le tsotlhe tse ba nang natso mme ba abela batho botlhe, mongwe le mongwe go ya ka fa a tlhokang ka teng. ⁴⁶ Letatsi le letsatsi bane ba tswelela ka tumalano ele nngwe mo tempeleng , mme ba ngathogana borotho mo malwapeng a bone, ba kgaogana dijo ka boitumelo le pelo ee ikokobeditseng; ⁴⁷ Ba galaletsa Modimo mme ba bona botsalano mo bathong botlhe. Morena a ba oketsa tsatsi le letsatsi ka bao ba ba neng ba bolokwa.