¹ Iya nuleele paana-paana, lowo ni yi bupala, meeme ngwigi mu kebe ga Yesu, Mwana-Nzaama wunu wuya twalasa. Gigi gimbangi gi mundaga. ² Mudimameeme wigi mu kiene yivulu, mu pasi yima kono nsugu. ³ Yima faana guzolo ni Nzaama gapoongo mutula bapaanga bayi zologa, ginaga bigi baada baana baga soolo, ⁴ baga we misigi, baga sileene lusili, bigi gigaana giana. Nzaama gigi mu kebe gabiwi mu mugieme waana; ⁵ bigi badigili ba Abalayama ande Yisagi ande Yagobo. Yesu mu gimuudu ginde gigi mu gigaana gibiwi. ..... Nzaama galumu mvulande mvulu. Amen. ⁶ Baana ba Yisaleele lowo gwigi ni babosogo bana babudugu mu muswini mu gigaana gini; baana ba Abalayama, lowo gwigi ni baana baana mu muswini, ⁷ asi gwigi baada bana baga genese Nzaama gugele Abalayama ni gungoya Yisagi, wini gala daada wu baana bavulu. ⁸ Gwigi baana ba lusili lu Nzaama ande Abalayama ⁹ ginaga Nzaama gadodo ni mu daanga ndeluulu lungini yafudugu yaaya, mugesaaga Saala gini gala wubudu mwana wu bagala. ¹⁰ Dumu nungaana Lebegi, mugesa kaagabisi Yisagi, gabudu baana boolo. ¹¹ Nzaama gasalaga mapaana mu guzolo gwana, ndebunu galeele Lebegi nga buba sonogo ni ¹² meeme Nzaama yima soolo Yagobo, asi Esawu, mbudu gini gala mu gusaleene Yagobo makwinaana. ¹³ Paana yiyi yidigi yana Lebegi lowo tomo gubudu. Nzaama lowo gamu soolo Yagobo ni mutula bisala biana. ¹⁴ Duma fana gudodo kiwi, ni Nzaama lowo gigi pimi? Lowo gwigi bunu. ¹⁵ Nzaama galeele Mose ni meeme ni yima zolo gusalasa muudu, buyi musalasa, ni yima zolo guwugu kiene yi muudu, buyi muwugeene. ¹⁶ Lowo gwigi mutula mapimi maana ni lowo mu ngolo yaana, ¹⁷ asi gwigi mu guzolo gu ndege Nzaama. Ndelunu galeele mfumu wu Ngipiti ni gwigi meeme yigu si mu gimfumu mutulu baada bangiabeene mu gisi gigiosogo. ¹⁸ Nzaama gawuguga kiene yi muudu wuga mazolo, gawaaga se muudu mudwe bwidi nga buga mazoloso. ¹⁹ Mu kebe gabini daanga lumoso muudu wuma ngufulu ni mutala kiwi si Nzaama gadu monoga bisi baada bafa? Naa wuma fana gunanga luzolo lu Nzaama? ²⁰ Nze naa wuma fana gusobo luzolo lunde? Nzungu yi dumu yima fana guwufulu muudu wuyi yidigi ni mutula kiwi wuma ngidigeene meeme bubu? ²¹ Mubuma-nzungu wuma fana guyidigi hoso bunu buga magana, ni nzungu yi tala yivulu ni lowo yitala yi nsisi mu dumu lumoso ndelunu; gwigi luzolo lwana. ²² Baada bana basala gubiyi, Nzaama gaba leesa kobo yinde, bana bamana fa, ²³ bisi baga zolo ande baga soolo mu kebe ga baada babosogo, ²⁴ lowo ni mu kebe ga bayudu peele, wudu we ndaama-lugugu lunde. ²⁵ Basonogo mu mugaana wu Ozeye ni baada bana bama kono mu gigaana gi meeme ngini bademene baada baama, bana bayi kona guzolo, ngini bademene baada ba guzolo; ²⁶ gihene gi baba demena ni bigi baada baama, ginde gini gibini bademene ni baana ba Nzaama wu moono. ²⁷ Yesaya se buga dodeene baana ba Yisaleele ni si ndebunu bunwigi guvulu gudigi mbenge yi zeele mu nzele wu nene, lowo ni baada bana babosogo bubini hulugu, ²⁸ ginaga gimi gini gidodo Nzaama bugini gi gugusu gigiosogo mu mbala yimoso yataa-maana. ²⁹ Yesaya bu ga dodo geele duugu tama ni Nzaama gakono gudu sileene ndaama badigili, dukaya gudigi nga bisi Sodomo ande Gomoolo. ³⁰ Dudodo kiwi ni baada ba bigaana bimbaana bakono gusaga gu gidigi baada bapimi ya misi mi Nzaama mu lugwigili bagidigi bapimi, ³¹ asi baana ba Yisaleele bana balaba misigi mi Mose lowo gabiwi gu bodo? ³² Mutulu lowo gabiwi bamu saga mu lugwigili, basaya manungu mabiwi mu bisala bibiwi, bayaya bulu masasa mu mudoyo wunu wu si Nzaama ni wubwisaaga baada, asi muudu wunu wini musileene mudimi, lowo gini gama nsono; ndebunu buba sonogo ni ³³ dalaana mudoyo wuyi masa mu Siyono, mudoyo wini bwisaaga baada.