¹ Luulu baada bana bigi mu gimvugu ande Mfumu Yesu lowo bini baga duumbu mutulu Muhunga-Nzaama wuba dogolo mu misigi mini mibuduga lufa, ² wuba dwala mu misigi mini mibuduga moono wu mvulande mvulu mu nzila Yesu Klisto. ³ Nzaama wumenese ngolo yi gimi gini gugala pasi mu misigi mi Mose, wudogolo masumu gu misi mi baana baana luga dumusu Mwanaana Yesu mu gisi gigi, wuya gidigi muudu wu muswini ngagwi ni muudu wu masumu. ⁴ Nzaama gasele bunu mutulu gumenese pwisi yi mapaana ma gisi gigi mu kebe ga baana baana, ⁵ asi baada bamoso bana basaala mu luudu ande mu mapaana ma gisi gigi ande mu pwisi yi luudu, bisi dubege Muhunga-Nzaama, ndewunu wudu menese pwisi yi bimi bi gisi gigi, ndewunu wuya dudwalasaaga. Biesi bi gisi gigi bidwalaga baada gu lufa, ⁷ baada bana baya bilaba, bamenge Nzaama, bamu zidisaaga, lowo bama fana guwa Nzaama kiesi, ⁸ asi bana baya nanga biesi bini bigi ande moono wu mvulande mvulu, bigi midimi dulu-duluu. ⁹ Asi bini nwigi mu Nzaama, Muhungaana wigi mu kebe gabini, wunu dwalasa, nwigi ande moono mutulu Mfumu Yesu gigi mu kebe gabini. ¹⁰ Si bunwini fa mu muswini, asi nugidigi baada bapimi ya misi mi Nzaama. Baada bana bama kono Muhunga-Nzaama, lowo bigi ba Nzaama. ¹¹ Ni muudu wunu wuya fudulu moono gugele Yesu wuguwe Muhungaana, ndebunu se bugini leede moono mu luudu lubini lunu lufaaga ¹² mutulu bini nwigi ande Muhungu wunde mu kebe gabini. ¹³ Nukono gulaba biesi bi gisi gigi ni lowo bunwini fa, asi ni twigi mu Muhunga-Nzaama, numa nanga pwisi yi luudu lubini, nwini baga moono wu mvulande mvulu. ¹⁴ Baada bana baya laba Muhunga-Nzaama bigi baana ba Nzaama, ¹⁵ ginaga Muhungu wunu bege wunu gidili baana baana, lowo nwigi bahigi, lowo se nusaala ande boomo; ndelunu duma fana gumu demene Nzaama ni Abba Daawa. ¹⁶ Muhunga-Nzaama wudu leesa ni twigi baana ba Nzaama, ¹⁷ butwini baga ndaama yi bimi bini biga genese baana baana ande Yesu, ginaga budu monogande pasi, butwini galande se mu Gimfumu gi mugieme wunde. ¹⁸ Pasi yiduya mono loolo, lowo yigi nga mugieme wunu wutwini mono gu tala. ¹⁹ Gisi gimutsini gigi mu guzili mugieme beene ²⁰ ginaga gibwi gu miogo mi wunu wukono gusalaaga si gimi gipimi, asi lowo ni mu ngolo yaana, gwigi guzolo gu Nzaama. ²¹ Gisi gimutsini gigi mu gumono pasi ngagwi ni mukaada wigi ande misongo, ²² asi Nzaama bugini yimenese mu bufugu bunu ande guleese mugieme wuma digi guvulu, bugini menese gihigi gi mfuma-gisi gigi gigaya bebese. ²³ Lowo ni mudimi peele duyaya sa, asi dumono ni twigi ande Muhunga-Nzaama mu kebe gabisi ngagwi ni gidimi gitomo giga dugenese, ²⁴ giga dudumusu mu gudu guulu ande mu gudu hulusu; wudu gidili baana baana. ²⁵ Budu makono guyabeene gusaama ande ngolo, Muhunga-Nzaama munu gudu saameene ya gihene gibisi, ²⁶ ande gudu loomeene mapaana matwiga miwi mfunu. ²⁷ Ndege Nzaama munu guyabeene midimi mibisi ande pwisi yibisi. ²⁸ Bisi duyaba ni mapaana mamosogo maga salaga Nzaama mutula bisi duya musileene mudimi ande bana baga gene migi mapimi. ²⁹ Wuba soolo tama, wuba demene mu guba gidili nga Mwanaana Yesu, wuba gidili baada bapimi ya misi miana; ³⁰ ndebunu Yesu wugi digi yayaana bambeele bavulu mutulu biwi se babege gobo mu mugieme wunde. ³¹ Dubisa dodo kiwi ni Nzaama gigi ande bisi, naa wuma fana gudu nwanasa? ³² Ni Yesu Mwanaana lowo gamu swege ni gakono gufa, bunu kiwi bini mukono mu gudu wa bisi ande Yesu bini bibiosogo? ³³ Naa wini fuunu baada bana baga soolo Nzaama? Si muudu lowo mutulu wuba mono ni bigi baada bapimi. ³⁴ Naa ndewunu wini bagieseene duumbu? Si muudu lowo, ginaga Yesu wufi, wunimigi mu lufa, gigi ya googo lu gidaada lu Nzaama, munu gudu saameene. ³⁵ Naa wunu wuma fana gudu gabala bisi ande Yesu mu guzolo gugu gu gadu zolo nde? Si kiene, si boomo, si nzala, si lufa, si biduumu, si pasi yi hoso gifa gini, si gukono gu nzimi ni lowo hoso gimi gini, bima fana? ³⁶ Basonogo ni mutula nze bisi duguumunu gufa hoso daanga lunu, badu gidili ngagwi ni mameeme maba yaya zwa. ³⁷ Asi bisi duyaba ni twigi ande gibingi gima digi bunene gu miogo mi wunu wudu zolo. ³⁸ Lowo gwigi si gimi gimoso gini dugabala bisi ande Mfumabisi Yesu mu guzolo gunu gudu leese Daada Nzaama, gugele moono, gugele lufa, gugele mihungu mifa mi tala, si mi maana, si daanga luulu, si lunu lwini wiyi gungoyo, ³⁹ lowo si gimi gimoso gini gugu.