¹ Bini bapaanga, nuyabeene mayi yazolo gunu leele mutulu nuyaba misigi mi Mose. ² Misigi migalaga mu daanga lunu lwigi muudu ande moono, gifa gimoso nga mukaada wigi mu waala, gagalaga mu misigi mi waala mu daanga lunu lugigi mu nzo yi mudimi. ³ Ni wumaya saga bagala wumbaana gama sala ginduumu, asi ni mudimi wuma fa, lowo gama saala mu misigi, wuma fana gudwala mudimi wumbaana. ⁴ Ndebunu se bisi baada dugala tomo mu gihigi gi misigi dusala mapaana labeene misigi mini miba sonogo, dusala bunu bu zola luudu lubisi, ⁵ asi luulu ludu doogo mu misigi, duwinigini mu Ndaga-Nzaama, mu gimvugu gi Mfumu Yesu, ⁶ mapaana mabisi masobogo, magidigi mapimi ya misi mi Nzaama, magidigi mafini, makulu mamosogo mawi. Luulu Muhunga-Nzaama wuyaya dudwala, ngolo yi misigi yiwi. ⁷ Misigi migi masumu? Lowo, ni misigi mikonaaga meeme lowo yikaya yabeene ni gusa misi mu bimi bi bagwene gwigi masumu. ⁸ Masumu mabudugu mu misigi ⁹ miwi mibolomono mudimi wu meeme mu gusala bisala-sala ande gwa budu lufa. ¹⁰ Ni misigi lowo, masumu nga migi ngagwi ni gimi ginga fa. Gwigi misigi miya ndeese masumu. ¹¹ Masumu makidigeene, matoneene, maya nzwa gungoyo yi misigi. ¹² Misigi miwi beene miduugu gugele Nzaama, migi mi Nzaamaa, migi pimi. ¹³ Gimi gipimi gigidigi gifa? Galowo gwigi bunu. Lufa ni luwingini, gwigi mutula masumu, gisini gigi ndegini. Gimi gigele gipimi gibolomogo, giya twaleene lufa gungoyo yi misigi. ¹⁴ Misigi migi gimi gi gimpeve, asi meeme lowo ngwigi ande ngolo yi gudini masumu, yigidigi muhigamiwi. ¹⁵ Gimi giyi mazolo gusala, yigi salaaga, iya salaaga gini giyi makono gugana mu gusala. ¹⁶ Ni yima sala gimi giyi makono guzolo mu gusala, lunu yima mono si ni misigi migi pimi ¹⁷ mutulu mu luudu lumeeme lunu luma kono ngolo, lowo ni meeme iya salaaga, gwigi masumu maya ngialaaga, ¹⁸ ndebunu meeme bu gusala mapimi mayi yazolo lowo; ¹⁹ iya salaaga gubiyi guyi makono guzolo mu gusala, asi pimi yiyi zolo gusala, lowo iya yisala. ²⁰ Lowo ni meeme iya salaaga bunu, asi gwigi masumu mu kebe gameeme. ²¹ Luulu yima mono ni mu kebe gameeme mwigi ande mihungu miolo miya nwananasa meeme. ²² Wunu wupimi wuya nzoleene Daada Nzaama, wuya tumu mu gulaba misigi mi Nzaama, ²³ asi luudu bulu makono ngolo, lwigi mu gubwa gu ndaama yi muhungu wufa, wu masumu. ²⁴ Kiene peele, naa wini togolo meeme mu gihigi gi luudu luulu lu masumu? ²⁵ Galumu gwana Daada Nzaama mu kuuma Mwanaana, Mfumabisi Yesu wuya togolo mu gihigi gi masumu, luulu yiwingini mu gisala ginde, yibege ngolo yi guyidi masumu.