¹ Bapaanga ba guzolo, iya nuloomeene mu mudimi wuwosogo gugele Nzaama ni bayudu bahulugu; ² mutulu balu leede gugele Nzaama, asi bamu yabaga pima-pimi, ³ lowo bayaba buga gidiliga Nzaama baada pimi ya misi miana, gini gimbangi gi mee ⁴ Ginaga Yesu wuya nsugusu misigi mi Mose mutulu baada babosogo bana baya gwigili bayabeene abunu gugidigi pimi ya misi mi Nzaama. ⁵ Mose gasonogo ni muudu mugu hulugu galaba misigi ande gumi saleene. ⁶ Dalaana abunu muudu gama fana gugidigi mupimi ya misi mi Nzaama mu lugwigili. ⁷ Gudodo lowo ni naa wuma fana gwa gulumugu yaaya mu tsini? Naa wuma fana gubanaga gu tala? ⁸ Ndaga ayiyi mu kuuga nze, mu kebe ga mudimaaga ande mu gono lwaga, ndeyiyi yiduya longo bisi, ni wutu yiguumunu mu gono lwaga, wutu yisa mu kebe ga mudimi waaga wuwosogo, ⁹ wuma gwigili ni Yesu gigi wunu wunimisi Nzaama mu lufa, gigi Mfumu ande Muhulusu-baada, buwini hulugu. ¹⁰ Lugwigili lwigi mu mudimi, asi guguumunu gwigi mu gono. ¹¹ Basonogo ni Nzaama gadodo ni muudu wunu wuma mugele nde lowo gini wugu nsono. ¹² Ndelunu bayudu ande bigaana bimbaana bigi gifa gimoso ya misi mi Nzaama, gisobagani gubwasa; babosogo biginande Nzaama wumoso, ndewunu Mfumabiwi, wini gaaba bimi biana gugele baada babosogo bana baya musileene mudimi. ¹³ Ndebunu bu basonogo ni wunu wini saga mbunzu yi Nzaama bugini hulugu. ¹⁴ Abunu si baada bini musaga ni lowo bama gwigili? Abunu bini mugwigili ni lowo bama sala wugu Ndagaana? Abunu bini wugu Ndagaana ni lowo bama sala mono geele si muudu mu gwa balongo? ¹⁵ Ni lowo batu badumusu baada? Ndebunu bu basonogo ni gini gwigi pimi mu gumono baada bamaya dwala mapaana mapimi. ¹⁶ Asi lowo ni baada babosogo baguumunu Paana yi Pimi. Yesaya ni Mfumu, naa wusala guumunu paana yiduya longo? ¹⁷ Lugwigili lwiyiga mu paana yini yiduya wugu, paana yi Yesu, yiduya longo. ¹⁸ Bayudu lowo gabiwi bawugu paana yiyi? Ni buba yiwugu, lowo gabiwi bayi bagisi? ¹⁹ Mose gafudulu ni Nzaama gadodo ni baada ba bigaana bimbaana nwini basileene buhala ande guba wugeene kobo mutula meeme; bigi bazobo. ²⁰ Yesaya ni Nzaama gadodo ni baada bana bama kono gwansaga meeme, yiba we nzili mu gwa mono, yilu monogoso yagele biwi; bana bakono gundoomo si gimi gimoso, yiba zili bufugu bumutsini. ²¹ Gabwese mutula baana ba Yisaleele ni yidandalala miogo gugele baada bana bakono gunzidisaaga ande bana bigi mudwe bwidi.