¹ Mu lugwigili ndelunu Nzaama wudu gidili baada bapimi, mu nzila Mwanaana Yesu wuya dudwaleene Mapimi maana. ² Twigi mu kiesi givulu mutulu dusaaga mudimi ni butwini baga ndaama-lugugu lu Nzaama. ³ Dugalaaga kiesi mu daanga lu pasi mutulu nga duyabeene guganga mudimi pima-pimi ande gusileene Nzaama mudimi ⁴ ande gugala ande gibagala mu luudu ande mu kebe ga mudimi; ⁶ mu gumu sileene mudimi ndemunu dubege Muhungaana mu kebe ga midimi mibisi, gadu diageene Muhungu mu guzolo gwana. ⁶ Ludu kono ngolo yi gudini masumu, Mfumu Yesu luga ya dufileene mu daanga lunu luga zoloso Nzaama. ⁷ Gwigi pasi yivulu muudu mu gu guumunu ni gafi ya gihene gi muudu mupimi, wunu wuwaaga mapaana mana maga zologa Nzaama. ⁸ Asi Nzaama mu guleese guzolo gwana wuduwe Mwanaana, wunu wuya dufileene mu daanga ludu gele baada ba masumu, ⁹ luulu wudu wululu mu matsili maana, wudu hulusu, wudu gidili baada bapimi ya misi miana. ¹⁰ Luulu luga dudogolo mu kobo yi Nzaama, dugosagana ande Nzaama, lumenge ludu gelalwiwi ande Nzaama luwi, dubege moono mu nzila Mfumabisi Yesu, Mwana-Nzaama mu lufa lwana yataa kulunsi. ¹¹ Luulu dugalaana mu kiesi mutulu dugidigi baana ba Ndaama mu matsili ma Mfumabisi Yesu. ¹² Lufa luwingini mu gisi mutula muudu wumoso Adama, wusele masumu; ndelunu baada babosogo babwi mu masumu. ¹³ Luga kono guleede Nzaama misigi gugele Mose, Nzaama lowo gasala masumu ma baada. Duugu lusele Adama masumu, lufa lubwileene baada bavulu mutula muudu wumoso. ¹⁴ Asi mapimi ma Nzaama ande kiene yaana mutula baada, wudu leese ni Adama gabala gifani-fani giana , lufa lugama muudu muwosogo wunu wuma kono guzidisi Daada Nzaama. ¹⁵ Si ndebunu gubiyi gu Adama lowo guma fanagana ande magaba ma kiene yi Nzaama, maga duwe mu nzila muudu wumoso, Mfumu Yesu, magaba mama digi tala. ¹⁶ Magaba mama digi mfunu ma muudu wumoso, maya hulusu baada bavulu gudigi lufa lu baada bavulu mutula masumu ma muudu wumoso. ¹⁷ Baada babosogo babege magaba mana mapimi ande kiene yi Nzaama, ndebunu bubini galaagande ande guyaala mutula Yesu. ¹⁸ Ndebunu buwi baada babosogo mu masumu mutula Adama, ¹⁹ ndebunu se Mfumu Yesu wunu wudogolo baada mu masumu, wunu wuba gidili baada bapimi ya misi mi Nzaama, mu gulemvege gwana ²⁰ Nzaama luga si misigi, masumu luma hinagana, ²¹ asi mapimi ma Nzaama ande guzolo gwana gwigi yato, ngolo yinde ande kiene yaana yiduwe moono wu mvulande mvulu mu nzila Mwanaana-Yesu, Mfumabisi.