¹ Bapaanga bayi zolo, iya nuloomo ni nulu leede bini beene gugele Nzaama nga magaba mapimi, numu saamaaga, dalaana guzolo gunde mutula bisi. ² Gulaba mapaana ma gisi gigi lowo, asi numu dele nde mutulu ganu bolomono midimi, ganu we ndungu yifini, nuyabeene mapaana mapimi maga zologa nde, mana mamu waaga kiesi. ³ Iya nulugisi mutula magaba maga ngwe meeme, mu guzolo gwana, bini se numa yaba, muudu gakono gulu sigisi, ⁴ bisi twigi gifa gimoso nga luudu lu muudu, lwigi ande bilama bivulu, hoso gilama gigi ande gisala gigiwi mu kebe ga luudu. ⁵ Mu gimvugu gi Yesu hoso muudu gigi ande magaba maana magisobagani ande makiene maga muwe Nzaama mu lugwigili. ⁶ Wunu wigi ande magaba ma gu dwalasa baada, gaba dwalasaaga pimi,........ ⁷ Wunu wigi ande magaba ma gulongo baada Ndaga-Nzaama, gabalongo, labeene lugwigili lwana, wunu wigi ande magaba ma gusiamisi baada bambaana, gaba siamisi, ⁸ wunu wigi ande magaba magu salasa baada bigi mu pasi, gaba salasaaga, wunu wigi ande magaba ma gu gaabeene baada bimi, gaba gabeene mu kiesi. ⁹ Nuzolaganaaga mu guzolo gu mudimi wu moso, mu guzolo gupimi bini ande bini, ¹⁰ nu galaaga nga bapaanga ba zumu lumoso, nu salasanaaga mu daanga lupasi, numu saleene Mfumu Yesu mu mudimi wumoso, ¹¹ gugalaaga bumoolo lowo, nusalaaga bisala, gusalanaaga gubiyi lowo, ¹² nusalanaaga mapimi mu kebe gabini. ¹³ Nugabanaaga bimi binwigabiwi mfunu. Nusaamaaga guvulu, nugalaaga mu kiesi mutula mudimi wunu si mu Nzaama, nugangaaga mudimi mu daanga lupasi. ¹⁴ Numu loomo Nzaama gasagamana baada bana baya numsese pasi, asi gakono guba hongo. ¹⁵ Dilaana ande baada bana baya dili, monaana kiesi ande bana bigi mu kiesi. ¹⁶ Nulu gulumunu ya misi mi baada, gugala luleene lowo, gulu leesaaga lowo ndungu mu kebe ga baada, gufilineege bisala bimfunu lowo. ¹⁷ Gusalaaga bagwene gubiyi lowo ni batu gusala gubiyi. ¹⁸ Nugalaaga pimi ande baada babosogo. ¹⁹ Mu daanga lukobo, guzolo lowo ni wusele gubiyi, ginaga basonogo ni dumu weseleene Nzaama gadu nwaneene. ²⁰ Ni muudu wunu wugu menge gigi nzala, muwe gudia; ni gigi pwisa-maja, muwe ganwi, asi gumu nangasa lowo. Ni wu masala bunu, gini luwugu nsono. ²¹ Guzolo lowo ni mapaana mafa magu yaala, asi salaaga mapimi mutulu wubelese gubiyi.