¹ Gu ngoy'a mafugu molo gugele ni fedi lu Pagi lusalamana, bamfumu ba banganga-Nzaama we basonogo basaga gugama Yesu ni bazwe; ² si lo bazola ni gugele mu bufugu bunu, badina baada bomo. ³ Gu Betani, Yesu gagele mu nzo yi Simoni wunu wubela lebedi, bamono mukaada wumoso wuya wingini bi badiaya; gagele we masa ma nsungu matal yivulu lugadiagene Yesu yata mudwe. ⁴ Baada bamoso lo bagele kiesi, ni mutula ki gamabisi masa manaa? ⁵ Bawugeene mukaada wunu kobo bi ni duka madege mu tala yivulu, nzimi dugabeene bansukami! ⁶ Si Yesu ni numuwesele, pi pasi yi ki? Gamasala pimi mu gele meme. ⁷ Bansukami ga bigi we bini daanga lulwosogo, nufana gubasalasa hoso daanga; lo ge meme. ⁸ Gamasala yini yimafana gugele nde gamadiageene luudu lu meme lu malumu. ⁹ Gumusomo pana yimasala mukaada wuwu yini dulu bihene bibiosogo bi bini longaaga ndaga-Nzaama mu gisi gigiosogo. ¹⁰ Yudu Iskalioti wumoso mu guma-bolo gasege gudege Yesu lu gaya wugagana we banganga-Nzaama; ¹¹ Bagele kiesi, lu bawugagana tal'a nzimi; lulu Yudu gasaga mpila yi gumugemese. ¹² Bufugu bu fedi lu mampa makono mweme wungene lulubesagana balongogo basaga kihene gu gwa dia we Yesu; ¹³ ndelunu Yesu lugadumu balongogo bolo ni ndanwe gu bulu lunene bu nwa mono muudu wumoso we bungu yata mudwe, numulebe. ¹⁴ Yagawingini nde numulele mung'a nzo ni dulese gihene gi giya dia Longi fedi lu Pagi we balongogo baana. ¹⁵ Bu ganulese sugu lulunene lu lutala lunga yilamana, ¹⁶ Bamono bwi ndebunu bu gabaleele Yesu, bu babayidigi se. ¹⁷ Gandulu mu masisigi we balongogo baana guma-bolo. ¹⁸ Lubadiaya ya mese Yesu gabaleele ni gu mosomo wumoso mu kebe gabini bu bugatega meme. ¹⁹ Kiene luyibageme babosogo, bamuwufula wumoso-wumoso ni meme? ²⁰ Nde ni wumoso mu kebe ga bini, wunu wasa gogo mu longo we meme. ²¹ Mwana-muudu gaya gwene labene bisonamana muge nde; si pasi gugele wunu wumudega. Pimi gugele muudu wunu ni lo gwana gabudugu. ²² Lubadiaya Yesu lugasene lumpa, lugadono Nzaama, lugamana lugiese, lugamanawa balongogo baana ni lulu lugele luudu lumeeme. ²³ Lugaseene se gobo, lugadono Nzaama, lugabawe. ²⁴ Lubanwi, nde ni maama matsili mameeme, matsili ma guwugagana we baada babosogo. ²⁵ Iyanulele gu musomo ni lo ngini bisa nwa vinu tii bufugu bu ngina nwa vinu lu fini gu tala. ²⁶ Lubamenese gubigi, bagie gu to musele wu ba olive. ²⁷ Yesu ni bini nuwugusu nsono mutul basonogo ni ngini bulu mudisi mameeme, mameme bu mini pasagana. ²⁸ Lu ngini fudumugu, ngini dedegeene gu Ngalili. ²⁹ Piele ni lubini wugusu babosogo nsono, me lo bini ngugusu nsono. ³⁰ Yesu ni nze Piele wa nanga meme mbala dede, yana gwagala nsusu wuyolo lo yaana gugogolo; ³¹ Si Piele lugabulu tulu ni si gufa bungini fa we nze, babosogo se lubalebe ndaga yini. ³² Ludaduulu mu ngunu yi Getsemane, Yesu lugabaleele ni nusala yaya, me nga saama. ³³ Gagele we Piele, we Jagi we Yowani; gawuga bomo. ³⁴ Gabaleele ni mudimi lo iya guwugu pimi, zibilaana misi. ³⁵ Lugapusu bitsi, lugabulusu gusaama ni Mfumu digisi gobo luulu ni wumazolo; ³⁶ Gasaama ni Abba, Dawa, ni wumazolo digisi gobo luulu, sala luzolo lunze lo ni lu meme. ³⁷ Gaya baga balongogo bayama, lugawufulu Piele ni nze wuyama? lo wumasala si daanga lumoso? ³⁸ Zibilaana misi, nusaama, mapana maama madigi gamiwi. ³⁹ Lugabisa saama gandanda. ⁴⁰ Lugayafudugu, bi kaga gu dolo, lo budodo si gimi. ⁴¹ Mu mbal yidede, gabaleele ni yamaana luulu daanga lumagugu mwana-muudu lubadimini guge baada ba masumu. ⁴² Nimigaana, twenaana, dalaana muudu wu ya tege wumaduulu. ⁴³ Lugadoda bunu Yudu lugaduulu we baada baana, we mambese, we midi; bayi we banganga-Nzaama, we bosonogo, we bambudu ba lubundu. ⁴⁴ Gidimi gi gabawe gigele beze mu gumuyabeene we gumugama. ⁴⁵ Lugaduulu yana, lugamuwe beze ni Rabbi. ⁴⁶ Nde lunu lubamugeme. ⁴⁷ Muudu wumoso wutswili tswi lu muud'a gisala wu mfum'abanganga-Nzaama. ⁴⁸ Yesu lo gazolo bunu, lugafudulu tswi lunu, gabaleele ni numaya we mambese we midi nga gwi ni meme yigele mwibi. ⁴⁹ Me yigala aya we bini mugulongo ndag'a Nzaama hoso daanga, lo nusala kama. Gimi lo ndaga-Nzaama yimagugu. ⁵⁰ Babosogo lu bamudini. ⁵¹ Lubageme mwana-bagala wumoso wumulaba we luputu lu toso; ⁵² Lugadini buguulu. ⁵³ Badwala Yesu gugele bamfumu ba banganga-Nzaama we basonogo we bambudu ba lubundu. ⁵⁴ Piele lugamuleber tii mu kebe ga nzo yi mfum'a banganga-Nzaama, gabwanza we baada bagisala wuwoda mbaa. ⁵⁵ Bamfumu babanganga-Nzaama basaga pana yi gumuzwelene, si lo basa yimono; ⁵⁶ Bavulu baleda bimbangi bi bupal si lo bigugagana. ⁵⁷ Baada bamoso lubawugu kobo lubamudonene mapana ni: ⁵⁸ Ngina bubu nzo-Nzaama yiyi, ngini bisa yiduungu mu mafugu madede. ⁵⁹ Si ndebune lo bawisagana. ⁶⁰ . Mfum'a banganga-Nzaama lugabisa wufulu Yesu ni lo wufudulu si ndaga? ki bayagufunene? ⁶¹ Yesu lo gafudulu si gimi. Mfum'a banganga-Nzaama lugabisa muwufulu ni wugele Klistu, mwana-Nzaama wu lusagumunu? ⁶² Yesu ni: E. Bunwini mono mwana-muudu mu madudu mumbim'a Nzaama; gini yafudugu mu madudu. ⁶³ Mfumu wu banganga-Nzaama lugamana paaga milele miana ni ki se dusegene bambangi? ⁶⁴ Nuwugu masawala, ki numamono? ⁶⁵ Babosogo ni bugayafa kaga. ⁶⁶ Lugele Piele gu bana-lupangu, muuda-gisala mu mukaada wumoso wu mfum'abanganga-Nzaama lugayi; ⁶⁷ lugamono Piele wuwoda Piele mbaa, wutu mudala, wutumuleele ni nze se buwugele we Yesu; ⁶⁸ Lugananga ni yimuyabaga gwama, loyiyaba ki wuyadodo; lugayagala ya mbele nsusu lugagogolo. ⁶⁹ Muuda-gisala wu mukaada wumono Piele galele baada ni wu se bu gagele mu kebe ga baada baana; lugananga gwana. ⁷⁰ Gungoyo baada lubabisa lele Piele ni nze bu wugele mu gibugu gi baada bana, wugele mungalili. ⁷¹ Nde lunu Piele lugalusu gulala Nzaama: Gu musomo me iyabaga gwama muudu wunu. ⁷² Nsusu wumagogolo mbala yi yolo, Piele wumawibigi bu mulele Mfumu bu bu wini nanga me mbala dede yana nsusu lo yana gugogolo; Piele lugabulusu gudili we kiene.