¹ Yesu lugabisa balele mu matigi ni muudu wumoso lugagwini vinu mu yongo, lugaganga lupangu, lugasimi zuingi, lugasi baada mu nzo yileye yigaduungu mu gudalaaga yongo; lugabasilene gisala nde lugagie gumbana ² Mu daanga lu guvini lugadumusu muuda-gisala wumoso mu gwasene gobo lu nde. ³ Si lubamugeme, bamana mubulu, bamusisi miogo. ⁴ Gadumusu muuda-mbaana wu gisala; ba mubulu mu mudwe, lubamana mudugu; ⁵ Lugadumusu wudede wu bazwe; gabisa dumusu baada bavulu; lubabazwe, bamoso lubamana babulu. ⁶ Gagele we mwanana wu luzolo; lugamudumusu guge bi ni bubini muzidisi ni mwan'ameme. ⁷ Bi ni: Dalaana gigidi ginde, dumuzwana, yongo nga lusaala lu bisi. ⁸ Lubamuzwe, lubamutabana yanzie yongo. ⁹ Lulu mungaa-yongo ki gagida? Gini mana zwa baada ba gisala babosogo, gawe baada bambaana yongo lunu. ¹⁰ Lo nudanga ndaga yiyi ni mudoyo wutbana baduungu-nzo wugidigi gunzu lu geme nzo? ¹¹ Lugel'abunu mu luzolo lu Nzaama, gugele mapimi ma Nzaama guge bisi? ¹² Basaga gumugama si badina baada. Bu bayabene tigi yini Yesu gadelene biwi; lubadogo yana, lubagie gabiwi. ¹³ Bamudumusu ndam'a bafadisi we ba ilodi mu gumugama mu mandaga maana. ¹⁴ Bayamulele ni Mfumu: Duyabene ni nze wudodoga gumundaga, lo wugalga kiena-kiene, lo wudalga mambunzu, wulongoga ndaga-Nzaama mu masongo. Paga dufuda guge Kaisala to lowo? ¹⁵ Yesu ni mutul'aki nuyamegeene? Yanwatwaleene nzimi me yiyimono. ¹⁶ Lubamuwe, nde ni mbunzu yiyi yi na we bisono bibi? Biwi ni: bi Kaisala. ¹⁷ Nde ni yi Kaisala gugele Kaisala, yi Nzaama gugele Nzaama. ¹⁸ Basaduse bakono gugwigilaka mu lufudumugu lubayi guge Yesu ni: ¹⁹ Mose gadulonga ni mukaada ni wumafileene mudima si lo gamabud'ande mwanabi gamutsidi mutulu gabud'ande. ²⁰ Gugele we bana-babagala nsambwadi, wutomo wumadwala mugese, gubud'ande lowo wumafa, ²¹ gifa gimoso se guge wuyolo we wudede; ²² lowo si wumosi mu kebe ga biwi nsambwadi wusisi mwana, mukaada se lugafi. ²³ Mugese gini gala wuna gungoy'a lufudumugu? ²⁴ Yesu ni lo nubilanga ndaga-Nzaama we ngolo yinde? ²⁵ mutulu mu lufudumugu mawala lo mini bisa gala, we bakaada we babagala bini gala nga ba wanzio. ²⁶ Mutul'a lufudumugu, lo nudanga magadodo Nzaama mu mugan'a Mose mu mana madelene mudi wulema mbaa ni me yigele Nzaama wu Abalahami, Nzaama wu Yisagi, Nzaama wu Yakobi? ²⁷ Lo gagele Nzaama wu baada bafi si wu baada bamono; nugele mu gifu. ²⁸ Musonogo wumoso wunu wuwugu ni Yesu galede mvudu yipimi guge basaduse, lugaya besagana, lugamuwufulu ni ki musigi wumadigi misigi mimiosogo? ²⁹ Yesu ni: Isaledi wigili, Mfumu Nzaama gagele wumoso peele, wumbana lo gagele. ³⁰ Wutomo awu: Wini zolaga Mfumu Nzaama mu mudim'aga wuwosogo, mu manungu m'aga mamosogo, mu moon'aga wuwosogo. ³¹ Wuyolo awu: Muzolo mugwene nga nzege bene. Musigi wumbana wumadigi misigi mimi lo wugele. ³² Musaduse lugamulele ni: Mfumu, wumadodod gu musomo ni Nzaama gagele wumoso peele, wumbana nga nde lo gagele. ³³ Gumuzolo nde mu mudimi wuwosogo, mu manungu mamosogo, mu moono wuwosogo, mu ngolo yiyosogo we guzolo mugwene nga nzege beene gumadigi magobo mamosogo. ³⁴ Yesu lugamono ni gafudulu mvudu yi ndungu lugamuleele ni gimfumu gi Nzaama lo gigele guley'ande nze. Muud'ambana lo gabis'a muwufulu si pana. ³⁵ Yesu lugalebe gulongo mu nzo-Nzaama, gadodo ni abunu basonogo bayadodo ni Klistu gagele mwana-Davidi? ³⁶ Davidi ndege beenebugayulu muhung'a Nzaama gadodo ni Mfumu gadodo guge Mfumu ni: Bwanzana ti gunu guyiniadasa bambeni ba'ga ³⁷ Davidi ndege gayamudemene mfumu, abunu gagele mwan'ande? Baada bavulu bamuwigila mu kiesi. ³⁸ Gabalonga ni: Gebaana guge basonogo bavadaga bamvele baleye, ³⁹ basagaga bihene bitomo mu nzo-Nzaama we mu mambese, babawaga mbodo munu, ⁴⁰ bawologa manzo ma bakaada ba mifidi, balulesga mu bisaama bileye. Bu bini samasama ngolo tsili. ⁴¹ Yesu lugabwanzana gungoy'a gidini gi mudi wudala buleeda baada magaba; bamvama baleeda magaba mavulu. ⁴² Guyi we mukaada wu mufidi wumoso lugasi nzimi yi bibende biolo. ⁴³ Yesu lugademene balongogo baana, lugabaleele ni: Iyanuleele gu musomo ni mukaada wu wu mufidi gamaleede gudgi gibegene ginde gigiosogo gudigi baada babosogo; ⁴⁴ mutulu bamasa ndaama si nde gamasa gibegene ginde gigiosogo gi nzo yinde.