¹ Daanga lumoso yimazolo gudodo ni gigidi lugigi mwana-mbeele, mu kebe ga nzo yi gidaanagigi gifa gimoso ande baada ba gisala ba gidaana si ndebunu bugigi munga-bimi ² mutulu gwigi baada ba gisala baya munsasa, biwi baya mugebe, gigi gu miogo mibiwi hoso. daanga tii gugini gulu. ³ Bisi se tomo dugele gu miogo mi Sadana, dugele nga baana, ⁴ asi luya gugu daanga luga zoloso Nzaama, luga dudumusu mwanaana Yesu, wuya dudogolo mu gihigi gi mihungu mifa, ⁵ dugidigi baana ba Nzaama, wudu dumusu Muhunga-mwanaana Yesu Mu midimi, wuyaya sa milolo ⁶ ni Abba Daada Nzaama mu guleese ni twigi baana baana. ⁷ Luulu, lowo se wigi muuda-gisala, asi wigi mwanaana; ndelunu buwini baga mbingi yiyosogo yiga swegeene baana baana. ⁸ Tomo nugele ande banzaama bana bakono gusalaga si gimi gimoso, banzaama ba bidegi, lowo numuyaba Nzaama wu moono, nugele bahigi ba mihungu mifa. ⁹ Asi luulu lunu tumu yabeene, nde se wunu yabeene, mfunu kiwi mu gubisa fudugeene mihungu mini mifa mipamba-pamba ande mu gubisa gidigi bahigi? ¹⁰ Nuya pa kiene ni nuya mono mfunu mu mafugu maama ande bangoono baaba ande mamvulu maama ande madaanga maama mamosogo manu mafudugu mu pasi ¹¹ yini yiyi mono meeme mutula bini. ¹² Bapaanga ba guzolo, nugidigi nga meeme mutulu meeme se buyi gele nga bini. ¹³ Luyi yi gugele bini, yigele mukaasa, yibeela misi, ¹⁴ asi lowo nutini mutula makaasa, nungiamba pimi, nunseene ngagwi ni wanzio; nkudu ngagwi ni Yesu Klisto. ¹⁵ Nunseene pimi tsili ngagwi ni bunu kaya sogolo misi mibini nupe meeme. Nugidi kiwi?Bunu beele nga meeme? Ganu gele mu kiesi givulu ! ¹⁶ Luulu numa menge mutulu yinu longo Paana yi Pimi? ¹⁷ Bapaanga ba guzolo, ngwigi kiesi mu kebe gabini, asi gwigi ande baada bambaana baya zolo gudu gabala bini ande meeme, ¹⁸ mutulu banu we manungu mabiwi mafa. Meeme ni kalaaga tii gunu, nga yima bisa nulongo mapaana mambaana. ¹⁹ Gwigi pimi mu gusala mapimi daanga lulwosogo, lowo ni lungwigi meeme mu kebe gabini peele. ²⁰ Iya mono pasi mutula bini, nga pasi yi misongo mi mukaada wuya zolo gubudugu; yiwaaga ni wumabudu mwana. Pasi yiyi yimeeme yini wa ni bini numa fanagana ande Mfumu Yesu. ²¹ Bini nuya zolo gulaba misigi, nundeeseede kiwi nuyaba mu misigi? ²² Basonogo mu misigi ni Abalayama gabudu baana ba babagala boolo, wutomo ande muuda-gisala kuumaana Agaala, labeene misigi mi gisi, ²³ wuyoolo ande mugesaana wu mfumu, kuumaana Sala, labeene lusili lu Nzaama. ²⁴ Paana yiyi iya leesege ni yigi lusili lutomo ande luyoolo. ²⁵ Agaala gigi lusili lu musele wu Sinayi, baana bande bigi bahigi, gwigi Yelusalemi lu loolo, ²⁶ asi lusili lu Saala lwigi Yelusalemi lutala, baana bande bigi bamfumu; bulu lunu lwigi maayabisi. ²⁷ Basonogo ni nze mukaada wukino gubudu gala mu kiesi, sa milolo, nze wukono guyaba pasi yi misongo, nze wuba tabana, wini budu baana bavulu gudigi wunu wuga zologa mudini. ²⁸ Bini bapaanga ba guzolo, nwigi baana ba lusili lu Nzaama gifa gimoso ande Yisagi. ²⁹ Daanga lumoso mwana wubudugu labeene misigi mi gisi gigi gamwesa wunu wubudugu labeene lusili lu Nzaama pasi. ³⁰ Asi basonogo ni kiwi? Basonogo ni muyidi muuda-gisala wu mukaada ande mwanaana; lowo gama fana gudia mbingi yi gidaana, kaga mwana du gimfumu. ³¹ Ndelunu bapaanga ba guzolo, bisi twigi baana ba gimfumu, lowo ni baana ba muhigi.