¹ Bunwigi baana ba gazolo Nzaama, saana ngolo nugidigi nga nde. ² Mugeleene wubini wugele wunu wu guzolo nga buga duzolo bisi Nzaama, mu guzolo gunu Yesu wululeede yataa kulunsi nga magaba ma nsungu yipimi yini yiwaaga Nzaama kiesi mutulu guduwa bisi moono. ³ Bini nwigi baada ba Nzaama, lowo gumafana si bitsi mu kebe gabini ni gubiyi gumoso gu hoso gifa gini gumonogo ni lowo yiwugagana. ⁴ Si ndaga yifa yikono guduugu mu magono mabini, si yi buzobo, si yi jili. Nuduusaga mandaga mapimi mana mawaaga Nzaama kiesi nga bisaama bimadoono mutula mapimi maana. ⁵ Nuyabeene ni lowo si muudu wumoso wu masumu wini wingini mu Gimfumu gi Tala yi Nzaama ande Yesu. ⁶ Muudu gakono gunudoneene, kobo yi Nzaama yiyiga mu bifu bi gifa gini, mu masumu. ⁷ Gugosaganaaga lowo ande baada ba masumu mutulu bini nudoogo mu gimvugu gini ⁸ ginugele tomo mu kebe gapibi, luulu numono mooso, nuwingini mu gimvugu gini gimonogoga mooso wunu wigi Mfumu Yesu; ⁹ mooso wunu wuleesega mapimi ande nzili . ¹⁰ Saana ngolo mu guyabeene mapaana mapimi ande mapaana mafa. ¹¹ Nukono guwinginaaga mu bimvugu bi baada ba pibi, nuba duusu ya misi mi baada. ¹² Gwigi nsono mu gudodeene mapaana maya sala baada bambaana mu gubadamana. ¹³ Mapaana ni mama duugu yanzie, mamonogoga wangala, ¹⁴ baada babosogo bu bama yabaga. Basonogo ni wusugu nze wunu wigi gu dolo, nimigi nze wunu wigi gu tsina bafa, Yesu nga gagu leese mooso. ¹⁵ Gebaana mugeleene wubini, gugala nga biyungu lowo, asi galaana ndungu ¹⁶ ginaga maama migi gubiyi, si muudu ni lowo hoso gini gunu doneene geele lowo. ¹⁷ Gufa buyungu lowo, asi nubagisi Nzaama kigimi gaya zili gugele bini. ¹⁸ Guwudu mono lowo, ni lowo matu nudwala gisaga-saga, asi nuyulu Muhunga-Nzaama. ¹⁹ Nusiamisaganaaga bini ande bini mu migungu mi Nzaama mini leese Muhunga-Nzaama. Nubigaaga migungu mi gulumusu Nzaama mu kebe ga midimi mibini. ²⁰ Numu doonaaga hoso daanga Daada Nzaama mu kuuma Mfumu Yesu mu mapaana mamosogo. ²¹ Nuzidisanaaga bini ande bini mu kebe ga manzo, ²² bagese balabaaga ndaga yi badimi babiwi, baba zidisaaga; ²³ badimi bigi bamfumu babiwi mu kebe ga manzo ²⁴ ndebunu bugigi Yesu, Mfumu mu kebe ga Dibundu. ²⁵ Badimi gazolo bagese babiwi nga Yesu buga zolo Dibundu, galu leede mu lufa mutulu gahulusu baada babosogo; ²⁶ wulu gidili lupimi ya misi mi Nzaama, wulu wululu mu maja ande mu Ndaga-Nzaama. ²⁷ Lowo lwigi ande gifu gifa si gimoso. ²⁸ Badimi bazolo bagese babiwi nga buba zologa luudu lubiwi beene; lowo gwigi ande muudu wusala menge luudu lwana. ²⁹ Muudu muwosogo wuzolo luudu lwana, galu waaga madia ande gulu gebe ndebunu bu gebega Yesu Dibundu. ³⁰ Bisi babosogo twigi bidini ni luudu lu Yesu. ³¹ Basonogo ni bagalaaga gini sisi gidaana ande maana, gini ya gosagana ande mugesaana, ndebunu gibiwi aboolo bini gidigi muudu wumoso. ³² Gigi giswaama ginene gi Nzaama mutula Yesu ande Dibundu. ³³ Ndelunu mudimi gazolo mugesaana nga buga zologa luudu lwana, mugese gazidisi mudimaana.