¹ Dumono bu guganga mudimi lowo, ndelunu ludu nungu ni dusaala bisi beene ya Atene, bini ludu nudumusu paangabisi Timote, muuda-gisala wu Nzaama mu gwa nulongo Ndaga-Nzaama ² ande gunu luugisi ni nugeme ngolo lugwigili lubini mu mpili ni muudu wumoso gakono gubwa mu daanga luulu lu pasi. ³ Nuyabeene ni Nzaama wudu sileene pasi yiyi yiduya mono. ⁴ Lwi ndelunu yimono bu guganga mudimi lowo, yisaga mu guyabeene ni lugwigili lubini lwigi kaga lungolo ⁴ mutulu Sadana gakono gwa bwisi si muudu wumoso, ni lowo gisala gibisi gima gweene pamba. ⁵ Ndebunu buyi nulongo ludu gele mu kebe gabini ni butwini monaaga pasi mu gisala gigi, ndebunu se duyi mono. ⁶ Lugaya fudugu Timote guugu, bu gadu deeleene mapaana ma lugwigili lubini ande guzolo gubini ande kiesi gibini ginu ya saga ni duwanagana, gifa gimoso bisi se duya saga ndebunu. ⁷ Duya mono kiesi givulu mutula bini si bunu buduya sala mu kebe ga pasi. ⁸ Si ndebunu bisi twigi bamoono mutulu mudimi wunu yasa bini mugele Daada Nzaama. ⁹ Ki madoono duma faana gumu wa Daada Nzaama mu kiesi giduya numoneene bini? ¹⁰ Duya saama ngolo pibi ande mooso ni Nzaama gadu zibileene nzili bisi twigi gunu, twa monaganaana, ¹¹ duya sa mudimi ni mu guzolo gwana butwini ya mu kuuma-Mfumabisi Yesu. ¹² Ndeege beene Nzaama ganu bwese guzolo yataa guzolo gunu gwigi mu kebe gabini ande gunuya zolaaga baada bambaana nga buduya nuzolo bisi. ¹³ Gwigi guzolo gupimi, guma kono si gifu gimoso ya misi mi Gidaabisi Nzaama tii bufugu bwini yafudugu Mfumabisi Yesu ande baada bana baya musileene mudimi.