¹ Bapaanga babisi, nuyaba bini beene ni gwiyi gubisi mu kebe gabini lowo gugele gupamba. Bunu numono pasi yiba duwe gu bulu lu Fidipo ande gudu duugu. ² Asi gwigi pimi mu guyabeene ni gisala giduya sala bisi lowo gigi gibisi gi gimuudu, ³ lowo ni gi manungu ma muudu wu gisi gigi, lowo se ni duya saga guwa baada kiesi, ⁴ gigi gi Daada Nzaama; nde wunu wudu waaga ngolo yiduya gisaleene, nde wunu wuduya saga guwa kiesi. ⁵ Bini beene munu guyabeene ni mu kebe gabini, bisi lowo dusala saga gulu Santana ni bisi twigi tsili batumu ba Mfumu Yesu, lowo dusala nuleele si paana yimoso yi bupala, lowo dusala gala nzala-dia, lowo dusala saga si mbala yimoso lugugu lubisi beene, ⁶ asi duya sala gisala gibisi pwede ande gulugulumunu ya misi mi baada bambaana ya misi mibini, ⁷ ndebunu bugalaga maaya wunu wuya nsasa baana baana. ⁸ Lowo duzolo ni dunu longo peele Ndaga-Nzaama, asi dumono ni mu guzolo gudu nuzolo bini, dunu we se ande miono mibisi. ⁹ Bini nwigi mu gu yabeene pasi yidu mono bisi ande gisala gidu sala pibi ande mooso mutulu gukono gunu wa bugogo bubisi; ¹⁰ bini beene ande Daada Nzaama nwigi bambangi, bunu mona mugeleene wubisi mu kebe gabini, lowo wugele si gifu gimoso. ¹¹ Nuyaba ni dunu sena ngagwi ni baana ya misi mi gidaabiwi mugu nusaangasa mu midimi ande mugu nulongo mugeleene wupimi ¹² ande mapaana ma Nzaama wunu wuya nudemene mu gimfumu giana ande mu mugieme waana. ¹³ Duya mudoono hoso daanga Nzaama bunu seene bini Ndagaana yidu nulongo, lowo nuyi seene ngagwi ni ndaga yi muudu, asi nga yindeege beene Nzaama wunu wuya sala mu kebe gabini. ¹⁴ Bapaanga, bini nugidigi gusala nga baklisto ba mabundu ma Yudeye, bapaanga babini beene banu waaya pasi ndebunu se buba mona biwi pasi gu miogo mi bayudu. ¹⁵ Bayudu biwi ndebana bazwe Yesu ande babigili baya ganga bampani nzili mu gukono guwugu Ndaga-Nzaama, bakono guhulugu, bamenge Nzaama ande baada babosogo, ¹⁶ baya sala bunu mutulu bagugusu masumu mabiwi ma hoso bufugu, asi Nzaama wuba we duumbu lubiwi. ¹⁷ Bapaanga ba guzolo, duugu ludu gabalagana, midimi mibisi, wumeme tsili Poolo, migalaaga pwede, duzologa ni duwanagana, ¹⁸ dusaga mpili ni twiyi gunu, asi Sadana wudu ganga nzili. ¹⁹ Mudimi wubisi wudu saaga ande kiesi gibisi ande mugieme wubisi bima faana gumonogo mugele nawa? Lowo ni mu kebe gabini ya misi mi Mfumu Yesu lugini yafudugu? ²⁰ Ga gwigi ndebunu, bini nwigi kiesi ande mugieme wubisi.