¹ Leboh maya nya Saulus, agi majak ngerembak lalu munuh murid Tuhan, betemu enggau imam besai ² Lalu minta surat penerang kena iya madahka pejalai diri ngagai rumah adat ba Damsyik, ngambi, enti iya bisi tetemu lelaki tauka indo ke nitih Jalai Tuhan, iya tau nangkap sida, lalu mai sida ngagai Yerusalem. ³ Lebuh Saulus benung ba rantau jalai damping enggau Damsyik siti penampak alu ayan ngenyit mancar ari langit ngelingi iya. ⁴ Iya rebah ke tanah, alu ninga nyawa bejako ngagai iya, “Saulus, Saulus,Nama kebuah nuan merinsa Aku?” ⁵ Iya lalu nanya, “Sapa nuan, Tuan?” Nyawa nya lalu nyaut, “Aku to Yesus, ke diperinsa nuan.” ⁶ Tang angkat nuan, lalu tama ngagai negeri nya, lalu nuan deka dipadah utai ti patut dikereja nuan.” ⁷ Urang ke bejalai sama enggau Saulus bediri degi degi enda bejako, laban sida bisi ninga munyi nyawa nya bejako, tang nadai meda urang. ⁸ Saulus angkat ari tanah, tang taja pen mata iya encelak, iya nadai meda utai. Nya alai sida megai jari iya, alu ngiring iya age Damsyik. ⁹ Dalam kandang tiga hari, Saulus nadai meda utai, enda makai, enda ngirop. ¹⁰ Lebuh maya nya siku murid ba Damsyik, benama Ananias. Tuhan bejako age iya dalam senera, “Ananias!” Ananias alu nyaut, “To aku, Tuhan.” Tuhan ¹¹ Lalu bejaku ngagai iya, “Angkat nuan, lalu bejalai ngagai jalai ti dikumbai Rurus, lalu leboh nuan datai ba rumah Yudas, giga meh urang Tarsus ke benama Saulus laban,peda meh,iya diato benung besampi, ¹² Alu iya udah buleh senera meda urang ke benama Ananias tama, alu ngengkahka jari ba atas iya ngambi iya ulih meda baru.” ¹³ Tang ko Ananias nyaut, “Tuhan, aku udah ninga rita iya nya ari urang mayoh, naka pemayoh penyai di kerja ya ka udah merinsaka bala nembiak Nuan ba Yerusalem, ¹⁴ Lalu dito iya bise kuasa ari tuai imam deka nangkap semua urang ke ngangauka nama Nuan.” ¹⁵ Nyak kebuah, Tuhan bejako age iya, “Mupuk meh nuan, laban iya udah dipilih Aku nyadika perengka kena Aku madahka nama Aku ngagai urang bansa bukai, ngagai raja, enggau ngagai urang Israel. ¹⁶ Laban, Aku Empu deka madah age iya naka pemayuh iya ngetat pemerinsa iya ketegal nama Aku.” ¹⁷ Ananias lalu mupuk, lalu tama rumah nya. Iya ngengkahka jari iya atas Saulus, lalu bejaku. “Menyadi aku, Saulus, Tuhan Yesus Kristus, ke udah Ayan ba mua nuan lebuh nuan di rantau jalai mansang kitu, udah ngasuh aku datai, ngambika nuan ulih meda baru, lalu dipenuhka enggau Roh Kudus.” ¹⁸ Tekala nya utai ti baka tisik ikan lalu labuh ari mata Saulus, lalu iya ulih meda baru. Udah nya iya angkat lalu dibaptis, ¹⁹ lalu lebuh iya udah makai, iya lalu berasai kering baru. Saulus lalu diau dua tiga hari enggau sida murid di Damsyik ²⁰ Alu tekala nya belabuh nusi pasal Yesus dalam rumah adat. Ko iya, “Iya Anak Allah Taala.” ²¹ Semua urang ke ninga iya balat alit ati. Ku sida, “Ukai enda iya to ke udah munuh orang ke pecaya ka Yesus ba Yerusalem suba?Alu iya udah datai ditu deka nangkap lalu mai sida ngagai bala tuai imam?” ²² Tang Saulus majak mansang dalam kuasa, datai ke urang Yahudi ke diau ba Damsyik nyau enda ulih mantah iya agi lebuh iya besaksi madahka Yesus nya Kristus. ²³ Nyau kelama udah nya, urang Yahudi Alu besemaya deka munoh iya, ²⁴ tang Saulus nemu sida besemaya ngelaban iya. Sida ngelila ba mua pintu negeri tawas malam, deka munoh iya, ²⁵ tang bala murid iya mai iya lebuh malam hari, Alu ngulurka iya ngena bakul ari lubang ti ba dinding kuta. ²⁶ Lebuh Saulus udah datai ba Yerusalem, iya nguji ngulaika diri enggau bala sida murid. Tang sida takutka iya, laban sida enda arapka iya amat udah nyadi murid. ²⁷ Tang Barnabas ngambe iya, Alu mai iya betemu enggau sida rasul, Alu madah ngagai sida pasal iya ke meda Tuhan lebuh iya ba rantau jalai, pasal Tuhan ke udah bejaku ngagai iya, enggau pasal iya ke berani nusi Berita Manah di Damsyik dalam nama Yesus. ²⁸ Nya alai Saulus diau enggau sida, Alu bejalai ba serata negeri Yerusalem, lalu bejako enggau ati ti berani dalam nama Tuhan. ²⁹ Iya bejaku Alu becekeh enggau orang Yahudi ke bejaku ngena jaku Yunani, tang sida nguji munuh iya. ³⁰ Lebuh sida ke pecaya nemu nya, sida Alu mai iya ngagai Siseria, Alu ngasuh iya mupuk age Tarsus. ³¹ Nya alai bala jemat ba serata menua Yudea,Galilea, enggau Samaria nadai agi pengacau sereta mansang dalam pengarap. Sida nangika Tuhan alam pemerindang Roh Kudus, bala sida majak nambah-menambah. ³² Nyadi lebuh Petrus bejalai kia-kia age semua urang ke pecaya iya mega nemuai ngagai bala nembiak Tuhan ke diau ba Lida. ³³ Dia iya betemu enggau urang siku ke benama Eneas, ke sakit tungkut lapan belas taun, Alu nadai kala angkat ari peninduk iya. ³⁴ Petrus Alu bejaku ngagai iya, “Eneas, Yesus Kristus ngeraika nuan. Angkat nuan, lalu kemas peninduk nuan.” Tekala nya Eneas Alu angkat. ³⁵ Semua orang ke diau ba Lida enggau ba Saron bela meda Eneas,Alu sida nguingka diri ngagai Tuhan. ³⁶ Nyadi ba Yope bisi siku murid, ke benama Tabita. (Dalam jaku Yunani nama iya Dorkas, reti nya “Kijang.”) Iya sige meruan ngereja utai ti manah, sereta nulung orang ke umang. ³⁷ Lebuh maya nya, iya sakit, Alu mati.pengudah meri iya mande, sida Alu ngalik iya ba sadau. ³⁸ Laban Lida enda jauh ari Yope, sida murid di Joppa ke ninga Petrus bisi di Lida lalu ngasoh dua iko urang mansang ngagai Petrus, minta iya datai, “Datai enggau jampat ngagai kami.” ³⁹ Petrus angkat, Alu mupuk enggau seduai iya. Lebuh iya datai, sida Alu mai iya ke sadau. Semua indu ke janda bediri ngimbai Petrus, nyabak sereta mantai ka semua baju enggau gari ti udah digaga Dorkas lebuh iya agi begulai enggau sida. ⁴⁰ Petrus Alu ngasuh semua sida pansut. Udah nya iya besugang, Alu besampi. Iya lalu nguing nunga age bangkai Dorkas, alu bejaku, “Tabita, angkat nuan!” Tabita Alu encelak ka mata, tepedaka Petrus, alu duduk. ⁴¹ Petrus alu nyurungka jari age iya, alu nulung iya angkat. Udah nya Petrus alu ngangauka bala nembiak Tuhan, enggau sida indu ke janda, alu ngayanka iya amat idup. ⁴² Berita pasal nya nyebar ba serata negeri Yope, alu mayuh orang pecayaka Tuhan. ⁴³ Petrus alu diau lama ba Yope, ba rumah siku tukang samak ke benama Simon.