¹ Paulus merening ngagai raban Kunsil lalu bejaku, “Menyadi! Nyentuk ngagai sehari tu aku udah idup enggau ati ti beresi di mua Allah Taala.” ² Imam Besai Ananias lalu ngasuh orang ke bediri semak Paulus nampar mulut Paul. ³ Paulus lalu bejaku ngagai iya, “Allah Taala deka nampar nuan, nuan ti pura-pura ngapa! Kati nuan ngakim aku nitihka Adat, tang nuan empu ngelanggar Adat ngasuh orang nampar aku?” ⁴ Orang ke semak Paulus lalu bejaku, “Berani amat nuan mecat imam besai Allah Taala!” ⁵ Paulus lalu bejaku, “Menyadi, aku enda nemu iya imam besai. Laban endang udah ditulis, ‘Anang bejaku jai pasal kepala bansa kita.’ ” ⁶ Lebuh Paulus nemu sekeda orang ke dia nya orang Saduki, lalu sekeda ti bukai orang Parisi, iya lalu bejaku enggau nyawa ti inggar dalam balai Kunsil nya, “Menyadi, aku tu orang Parisi, anak orang Parisi. Aku kena jil laban aku arapka orang deka diangkatka ari mati!” ⁷ Lebuh iya udah nyebut nya, orang Parisi enggau orang Saduki lalu belabuh bekelikuh, lalu raban Kunsil beserekang penemu, ( ⁸ laban orang Saduki madahka nadai utai ti dikumbai pengangkat ari mati, tauka melikat, tauka roh, tang orang Parisi ngumbai semua utai nya bisi magang.) ⁹ Sida lalu inggar amat. Sekeda pengajar Adat ke orang Parisi bediri lalu bejaku, “Kami nadai nemu penyalah orang tu! Kada enda roh tauka melikat udah bejaku ngagai iya.” ¹⁰ Lebuh sida majak balat agi bekelikuh, kepala soldadu lalu irau ati enggai ke Paulus abis dijil sida. Nya alai iya lalu ngasuh bala soldadu nurun lalu ngerampas Paulus ari jari sida, lalu mai iya ngagai berek. ¹¹ Malam nya Tuhan bediri ngimbai Paulus, lalu bejaku, “Anang takut! Baka nuan ke udah besaksika pasal Aku di Jerusalem, baka nya mega nuan deka besaksika pasal Aku di Roma". ¹² Pagi hari siti, orang Yahudi lalu bepekat. Sida besumpah enda makai, enda ngirup, datai ke sida udah munuh Paulus. ¹³ Lebih empat puluh iku sida ke bepekat nya. ¹⁴ Sida lalu mansang ngagai sida tuai imam, enggau tuai bansa, lalu bejaku, “Kami udah besumpah enda makai, enda ngirup, datai ke kami udah munuh Paulus. ¹⁵ Nya alai kita enggau raban Kunsil enda tau enda ngirumka pesan ngagai kepala soldadu, minta iya mai Paulus betemu enggau kita, lalu kita ngaga diri baka ke deka mansik pekara pasal iya enggau silik agi. Lalu kami deka sedia munuh iya sebedau iya datai ditu.” ¹⁶ Tang anak menyadi indu Paulus bisi ninga pasal sida ke deka ngipa Paulus. Nya alai iya mansang ngagai berek lalu dikemendarka tama, lalu madah ngagai Paul. ¹⁷ Paulus lalu ngangauka siku pemesai soldadu, lalu bejaku ngagai iya, “Bai orang bujang tu ngagai kepala soldadu, laban iya bisi utai ti deka dipadahka iya ngagai iya.” ¹⁸ Nya alai pemesai soldadu nya lalu mai orang bujang nya betemu enggau kepala soldadu. Ku iya, “Orang jil ke benama Paulus dah ngangauka aku, lalu minta aku mai orang bujang tu ngagai nuan, laban iya bisi utai ti deka dipadahka iya ngagai nuan.” ¹⁹ Tuai soldadu nya lalu megai jari orang bujang nya lalu mai iya ke tisi, lalu nanya iya, “Nama utai ti deka dipadahka nuan ngagai aku?” ²⁰ Orang bujang nya lalu nyaut, “Orang Judah udah besetuju deka minta nuan mai Paulus ngagai Kunsil pagila, pura-pura baka ke deka mansik pekara pasal Paul silik agi. ²¹ Tang anang nurutka peminta sida, laban lebih empat puluh iku orang deka ngipa Paulus. Sida udah besumpah enda makai, enda ngirup datai ke sida udah munuh iya. Sida diatu udah sedia, lalu nganti saut ari nuan.” ²² Kepala soldadu nya ngasuh orang bujang nya pulai, lalu bejaku ngagai iya, “Anang madahka diri udah nusui tu ngagai aku.” Paulus Dianjung Ngagai Gabenor Peliks ²³ Kepala soldadu nya lalu ngangauka dua iku pemesai, lalu bejaku, “Aku ngasuh kita besedia mupuk ngagai Sisarea pukul semilan malam tu, enggau dua ratus iku soldadu enggau tujuh puluh iku soldadu ke nepan kuda, enggau dua ratus iku soldadu ke besenyataka sangkuh. ²⁴ Sediaka mega dua tiga iku kuda ke Paulus, lalu bai iya enggau likun ngagai Gabenor Peliks.” ²⁵ Iya lalu nulis sepucuk surat ti munyi tu: ²⁶ “Ari Klaudius Lisias, ngagai Iya Ke Dipebasaka Tuan Gabenor Peliks: Tabi. ²⁷ Orang tu udah ditangkap orang Yahudi, lalu baru deka dibunuh sida, tang lebuh aku tetemuka iya nya peranak Roma,aku lalu mai bala jejaga, lalu nyelamatka iya. ²⁸ Laban aku keran deka nemu penyalah ti dikena sida bedawaka iya, aku lalu mai iya ngagai Kunsil. ²⁹ Aku lalu tetemuka iya udah kena dawa ketegal Adat sida empu, lalu ukai patut tau ngasuh iya diukum bunuh, tauka ditutup dalam rumah jil. ³⁰ Lebuh orang madah ngagai aku pasal orang Judah ke bepekat deka munuh iya, aku lalu tekala nya ngirumka iya ngagai nuan, lalu ngasuh orang ke bedawaka iya mantaika dawa sida di mua nuan.” ³¹ Nya alai bala soldadu lalu nitihka atur kepala soldadu lalu ngambi Paulus, lalu mai iya malam nya ngagai Antipatris. ³² Hari siti bala soldadu ke bejalai kaki, pulai ngagai berek sida, ninggalka bala soldadu ke nepan kuda bejalai enggau Paulus ³³ Lebuh sida datai di Siseria lalu nyuaka surat nya ngagai gabenor, sida lalu nyerahka Paulus ngagai iya. ³⁴ Lebuh tuan gabenor udah maca surat nya, iya lalu nanyaka menua asal Paulus. Lebuh iya ninga Paulus datai ari menua Silisia, ³⁵ iya lalu bejaku, “Aku deka mendingka nuan lebuh orang ke bedawaka nuan datai.” Iya lalu ngasuh Paulus dijaga dalam istana Herod.