¹ God Yawe, mi krai i go long yu, kam hariap long mi. Harim mi taim mi singaut i go long yu. ² Larim beten bilong mi i kamap naispela smel long yu na larim han bilong mi i go antap bai olsem ofa bilong avinun. ³ God Yawe, helpim mi long mi noken mekim nogut toktok na was long maus bilong mi. ⁴ Yu noken larim bel bilong mi i kirap long mekim pasin nogut wantaim ol man husat i save mekim planti bikhet pasin. Noken larim mi kaikai ol kainkain switpela kaikai bilong ol. ⁵ Larim ol stretpela man i paitim mi, em bai i kamap gutpela long mi. Larim em i stretim mi, em bai i kamap olsem wel antap long het bilong mi na bai het bilong mi i no inap les long kisim. Tasol oltaim beten bilong mi i no wanbel long ol pasin nogut bilong ol. ⁶ Ol man bai tromoi ol hetman bilong ol i go daun long ol graun bruk bilong ol maunten na ol bai harim olsem toktok bilong mi i gutpela tumas. ⁷ Ol bai i ken tok, "Olsem wanpela i digim na brukim graun i go, bai ol bun bilong mipela i lus nabaut long maus bilong, ples matmat, em hul i nogat as bilong en." ⁸ Tru tumas, ai bilong mi i stap long yu, God Yawe, Bikpela, mi stap hait insait long yu, olsem na noken larim sol bilong mi stap i nogat banis bilong en. ⁹ Lukautim mi long ol samting bilong pundaun ol i putim antap long mi na long umben bilong ol man husat i wokim pasin nogut. ¹⁰ Larim ol manmeri nogut i pundaun i go insait long umben bilong ol yet taim mi ranawe i go.