¹ God Yawe yu kisim mi long han bilong ol man nogut na lukautim mi long han bilong ol birua. ² Ol i pasim tok long bel bilong ol long mekim nogut na ol i kamapim pait long olgeta dei. ³ Tang bilong ol i tanim olsem snek nogut na posin bilong snek i stap long maus bilong ol. ⁴ Banisim mi long han bilong ol man nogut, God Yawe, lukautim mi long ol man nogut husat i tingting long daunim mi. ⁵ Ol man bilong apim ol yet ol i putim trep long mi , ol i tromoi pinis umben na ol i putim ol samting bilong grisim mi na holim pas mi. ⁶ Mi tok olsem long God Yawe, "Yu God bilong mi, harim ol krai bilong mi taim mi singaut long helpim bilong yu. ⁷ God Yawe, Bikpela bilong mi, yu stronpela tru inap tru long helpim mi. Yu karamapim het bilong mi long taim bilong pait. ⁸ God Yawe, yu noken larim ol laik bilong ol man nogut i kamap na yu noken larim ol tingting hait bilong ol i kamap tru. ⁹ Husat ol i raunim mi ol i apim het bilong ol na larim ol giaman bilong maus bilong ol yet bai i karamapim ol. ¹⁰ Larim ol ston paia i pundaun antap long ol. Tromoi ol i go insait long paia, i go insait long hul i no gat as bilong en na i nogat moa bilong kirap bek. ¹¹ Inap ol man i save mekim planti toktok bai ol i nogat gutpela sindaun long graun. Inap ol samting nogut i painim ol man nogut na kilim ol i dai. ¹² Mi save olsem God Yawe bai i mekim wok skelim na mekim gut long ol bagarap manmeri. Em bai i mekim stretpela pasin long ol trangu manmeri. ¹³ Tru tumas ol stretpela manmeri ol bai givim tok tenkyu long nem bilong yu na ol bai i stap long pes bilong yu.