¹ I no long mipela, God Yawe na i no long mipela tasol yu kisim ona i go long nem bilong yu yet na long kontrak promis bilong yu i stap oltaim na long bilip yu gat long mipela. ² Bilong wanem manmeri bilong olgeta hap graun bai i askim olsem, "God bilong yupela i stap we?" ³ God bilong mipela i stap long heven na em i save mekim wanem em i laik mekim. ⁴ Giaman god bilong olgeta manmeri bilong graun em silva na gol na em ol han bilong man i wokim ol long en. ⁵ Dispela ol god giaman i gat maus tasol i no save tok tok na ol i gat ai tasol i no inap lukim, ⁶ ol i gat yau tasol i no inap harim na ol gat nus tasol i no inap smelim. ⁷ Ol dispela god giaman i gat han tasol ol i no inap pilim, ol i gat lek tasol i no save wokabaut na ol tok tok bai i no inap kam aut long maus bilong ol. ⁸ Ol lain husat i wokim ol i olsem ol na ol lain husat i save bilip long ol. ⁹ Ol lain Israel i bilip long God Yawe, em tasol i helpim na hap plang bilong banisim yupela. ¹⁰ Ol lain bilong haus bilong Aron i putim bilip long God Yawe, em tasol i helpim na hap plang bilong banisim yupela. ¹¹ Yupela dispela ol lain husat i lotu long God Yawe, yupela bilip long em, em tasol i helpim na hap plang bilong banisim yupela. ¹² Luksave bilong God Yawe i save i stap long mipela na em bai i blesim mipela, em bai blesim ol femili bilong ol lain Israel na em bai i blesim ol femili lain bilong Aron. ¹³ Em bai i blesim olgeta lain husat i save lotuim em, ol yangpela wantaim ol lapun. ¹⁴ God Yawe i ken mekim namba bilong yupela i go planti moa, yupela yet na ol tumbuna lain bilong yupela long bihain'. ¹⁵ God Yawe husat i bin wokim heven na graun bai i blesim yupela. ¹⁶ Ol ples heven antap i bilong God Yawe yet, tasol graun em i bin givim long ol man. ¹⁷ Dispela ol lain husat i dai pinis i no inap long litimapim God Yawe, olsem tasol long ol lain husat maus i pas na i no inap long toktok. ¹⁸ Tasol long nau na oltaim oltaim mipela bai litimapim nem bilong God Yawe.