¹ Givim tenkyu long God Yawe, em i gutpela long yumi, em i save bihainim stret promis bilong em oltaim. ² Larim ol manmeri God Yawe i kisim bek yupela tokaut, husait em i bin helpim yumi long han bilong ol birua. ³ Em i bringim olgeta i kamaut long narapela graun, long hap bilong san kamap na bilong san i go daun na long hap not na long hap saut. ⁴ Ol i wokabaut i go long bikpela ples nating long rot i nogat wara na ol i no painim wanpela biktaun we ol i ken stap. ⁵ Long wanem ol i hangre na nek i drai long wara na ol hap i dai na pundaun. ⁶ Ol i bungim hevi na ol i singaut long God Yawe na em i mekim gut tru long helpim ol. ⁷ Em i kisim ol i go long stretpela rot na bringim ol i go bai ol i kamap long wanpela biktaun na i stap long en. ⁸ Orait dispela ol manmeri i mas litimapim nem bilong God Yawe long wanem em i save bihainim stret promis bilong em na wokim ol gutpela kain samting long ol manmeri. ⁹ Em i save inapim tru planti tingting bilong ol, givim wara long nek bilong ol manmeri i drai na em i save givim kaikai long ol manmeri i hangre na pulumapim ol wantaim gutpela samting. ¹⁰ Sampela i stap long ples tudak, insait long haus kalabus, ol i bin kalabusim ol long sen na givim hevi long ol. ¹¹ Dispela em i kamap, long wanem, ol i givim baksait long tok bilong God Yawe, husat i stap Antap Tru na sakim tok bilong em, tu ol i no bihainim gut skul tok bilong em. ¹² Em i daunim bel bilong ol taim ol i hatwok na ol i pundaun long graun, i nogat wanpela man long helpim ol long kirap gen. ¹³ Ol i singaut long God Yawe taim ol i bungim trabol na em i kisim ol i kam out long hevi. ¹⁴ Em i kisim ol i kamaut long tudak na brukim sen bilong ol na ol i no moa i stap kalabus. ¹⁵ Orait ol dispela manmeri bai litimapim God Yawe, oltaim em i bihainim tok promis bilong em na mekim gutpela wok bilong helpim ol manmeri . ¹⁶ Em i bin brukim bikpela dua ol i bin wokim long bras na katim gen ol ain. ¹⁷ Ol i nogat gutpela tingting na long pasin nogut bilong ol , ol i kisim bagarap. ¹⁸ Ol i lusim pasin bilong laikim kainkain kaikai na klostu ol i laik i dai. ¹⁹ Orait ol i singaut long God Yawe na em i kisim ol i kamaut long hevi bilong ol. ²⁰ Long tok bilong em yet, em i oraitim ol na kisim bek ol long kainkain hevi bilong ol. ²¹ Orait dispela ol manmeri bai litimapim God Yawe, long kontrak bilong stretpela pasin na gutpela kain samting em i mekim long ol. ²² Larim ol i mekim ofa long givim tenkyu na tokaut long ol gutpela wok em i mekim long singsing. ²³ Sampela i ron antap long bikpela solwara insait long sip na i wok bisnis na bringim kago long narapela kantri. ²⁴ Ol dispela man i lukim samting God Yawe i mekim, ol i lukim em i mekim gutpela samting long solwara. ²⁵ Bikpela i tok na em i kirapim strongpela win na dispela i kirapim bikpela solwara. ²⁶ Ol i kalap i go antap tru na i go daun tru long as bilong solwara na ol i pret nogut tru long laip bilong ol. ²⁷ Ol i wokabaut i go i kam olsem spakman long sip na ol i nogat strong long helpim ol yet. ²⁸ Ol i singaut long God Yawe taim ol i gat trabel na em i kisim ol kam aut long ol hevi bilong ol. ²⁹ Em i mekim bikpela win na ren wantaim solwara i stap isi. ³⁰ Orait ol i amamas long wanem ol i lukim solwara i stap isi na em i kisim ol i go kamap long ples ol laik i go long en. ³¹ Orait dispela ol manmeri bai litimapim God Yawe long kontrak bilong stretpela pasin na long gutpela na naispela samting ,em i bin mekim long ol. ³² Larim ol i bung wantaim ol manmeri bilong God na tokaut long biknem bilong em na litimapim nem bilong em namel long ol hetman. ³³ Em i mekim bikpela wara i drai olsem ples nating na ol liklik wara i drai olsem graun i drai, ³⁴ na graun i save karim planti kaikai em i kamap olsem graun i gat sol na i nogat wanpela samting inap kamap long en, long wanem, ol man long dispela hap i mekim ol pasin nogut,. ³⁵ Em i mekim ol bikpela wara i kamap ples nating na ol liklik wara i drai. ³⁶ Na em i larim ol man i sot long kaikai i sindaun long dispela hap na ol i wokim dispela bik taun na i stap long dispela hap. ³⁷ Ol i wokim taun long planim kaikai, planim ol diwai wain na long kamapim planti kaikai na ol i karim i kam. ³⁸ Bikpela i blesim ol na namba bilong ol i go planti tru. Em i no larim namba bilong bulmakau i go daun. ³⁹ Ol birua i winim ol long pait na daunim ol tru na givim bikpela pen na mekim ol i kisim bagarap. ⁴⁰ Bikpela i mekim hetman bilong ol lida i kamap samting nating na em i mekim ol i wokabaut long ples drai i nogat rot. ⁴¹ Tasol em i lukautim rabisman i stap nogut na helpim ol pikinini bilong ol i kamap planti olsem ol sipsip. ⁴² Ol stretpela manmeri bai i lukim na amamas na ol man nogut i nogat tok na bai pasim maus tasol. ⁴³ Husat manmeri i gat gutpela tingting i mas tingim gut ol dispela samting God Yawe oltaim em i save bihainim stret promis bilong em.