¹ Mi litimapim nem bilong God Yawe wantaim olgeta laip bilong mi na wantaim bel bilong mi. Na mi bai litimapim stretpela nem bilong em. ² Mi litimapim nem bilong God Yawe wantaim olgeta laip bilong mi. Na mi bai tingim olgeta gutpela pasin em i bin mekim long mi. ³ Em i save lusim olgeta sin bilong yumi na em i save oraitim olgeta sik bilong yumi tu. ⁴ Em i save rausim yu long olgeta kain bagarap na em i bilasim yu wantaim kontrak bilong em we i pulap wantaim strepela pasin na bel isi bilong em. ⁵ Em i inapim gut laip bilong yumi wantaim ol gutpela samting, olsem ol yangpela bai i kamap nupela olsem tarangau. ⁶ God Yawe i save mekim olgeta samting i wankain. Na em i save soim strepela pasin long olgeta lain husat i kisim bagarap. ⁷ Em i soim ples klia pasin bilong en long Moses. Na ol pasin bilong em long ol tumbuna bilong Israel. ⁸ God Yawe i pulap wantaim bel sori na marimari. Em i save i stap isi, long wanem em i gat kontrak bilong bel sori. ⁹ Em i no save sakim tok wanpela taim na olgeta taim em i no save belhat. ¹⁰ Em i no save mekim save long yumi long mak bilong sin yumi mekim o bekim inap long mak bilong sin bilong yumi inap kisim long en. ¹¹ Olsem skai i stap antap tru long graun, bikpela na strepela kontrak bilong em i kam long husat i lotuim em. ¹² Olsem ples san i save kamap i longwe long ples san i go daun, dispela i soim pasin bilong God i rausim na surukim sin bilong yumi igo longwe long yumi. ¹³ Olsem papa i gat bel sori long ol pikinini, wankain tasol God Yawe i gat bel sori long husat i lotuim em. ¹⁴ Na em i save long yumi bin kamap insait long bel bilong mama na em i save olsem yumi das tasol. ¹⁵ Long ol man, taim bilong ol i olsem gras, we em i save kamap na i stap olsem flauwa bilong graun. ¹⁶ Win i ron antap long en na em i save pinis na nogat wanpela bai i save olsem em i bin kamap na i stap long dispela hap bipo. ¹⁷ Tasol kontrak na strepela pasin bilong God Yawe i nogat pinis bilong en antap long husat ol i lotu long em. Stretpela pasin bilong em i save surukim i go moa long ol lain tumbuna bilong ol. ¹⁸ Ol i lukautim kontrak bilong em na ol i save tingim yet long bihainim tok bilong em. ¹⁹ God Yawe i kamapim sia king bilong em insait long ol heven na kingdom bilong em i stap antap tru long olgeta manmeri. ²⁰ Givim biknem i go long God Yawe, yupela ol ensel na yupela husat i strong na tokaut long tok bilong em. Na bihainim nek bilong tok bilong em. ²¹ Givim biknem long God Yawe, yupela olgeta ol lain bilong em, yupela i wokman husat i save bihainim pasin bilong em. ²² Givim biknem long God Yawe, yupela olgeta ol samting bilong em, long olgeta hap ples we em i stap bikpela. Mi bai i givim biknem long God Yawe wantaim olgeta laip bilong mi.