¹ Micni muke mifo, ikeye, Goti nic barukaci marako. Newarafi, ikeu namac wen akafan dacui we'i on aman kaci banami, weni ikeu nama kani ayikemi. ² Akac ikeye, ena wainta wani yiyi kenim wantinaci boko. Yewekem, Jisasin ikeu nama kani ayenimi, awokuc amunkuc ewan ofan Gotin paci weyani ame ni nic kaci ono. ³ Afo ikeye, iye wakaci, pamuki baruc uwararani indeko. O manda barukafi, akac iyewac ante keninafi o, yeya nanan indeyom baruc uwarako. Mini baruci micnu ranani, ena iniya waintauci, yewekeni Gotin kim biliwie eyon iniya waintauc kani manda baya yuci tiyin kanteno. ⁴ Ikeye iyewakac ena waintauc manda bayayuc teko warafi, o tampiukam bayayue teko warafi, manda amam bayayuc teko wani, enuyirapim ukuka yinkako. Mini baruci iyewaci antekemi. Ikeye Goti naraci tusu seko. ⁵ Afo ikeye, manawac indeko. Wanta ma pamuki bana uwarem, akac iyewac antekenim baruc uwarem, akac weyana na indenim baruc uwarene, weni yewekemi umac Gotinkaci mami tenim wainta ami dakemi. Micne yom waintauci iyewaci Jisasi na Gotiuc yic Kindomi kim binteno. ⁶ Ikeye, iyewakac ecanac mana wainta ikemi payam bayayuc poni, ikemi umac tiyin kano. Newarafi, mini anda kaci, Goti awayani iyen indeyon waintauci weni arami yimin temi. ⁷ Micni mukemifo, ikeye, iyewakaci micneyom waintauc namac mana kinkac noko. ⁸ Bani ayufumkimi ikeni bakomi. Afo makewe ikeni Iyenonic kakantimi bami. Micni mukemifo ikeye, kakantakena intauci weyonic kaci oko. ⁹ Kakani awokuc andan dauci ampa memi. Afo anaci waintan yeni Jisasinic kakantimi weyouni ante kana nim ba namac, puka baya namaci ampa minteno. ¹⁰ Akac ikeye, erarac urekaci afa kako, ne andandadukanaci Goti weni mana arackakukam dukenafi. ¹¹ Ikeye, iyewakaci ayufum karic manda yokam mare wana you namac munko ko. Wenic yunam mac iyewaci wemino. Ikeyac yenyic manda baru karaci pacbanac oko. ¹² Mini manda baruci ayofareni uwareyone. Afotac pacban iran yiyorami wemino. ¹³ Afo umacden andandan kakani mande kem afotapaci dami, mini andandauci afotac kukami wemino. ¹⁴ Kakanı umacden andanda mandekem afotpac demi, akac andanda mandemi kaka ankemi. Micni mukami bayani wemi. Ukukano, wantan eni maken oni wake weono. Masipinkepwa ukukanaci Jisasinic kakara enarokewa kakano. ¹⁵ Mini mukemifo,ikenyic yaunkakaci awoku dafisirika oko. Iyewakaci, manda indin dukam waintauci weyon amankaka bako. Afo ikeye, awoku indi dukam waintauci weyon amankakaci bako. ¹⁶ Ikeye, ikenyic taimi kakaci dafi seko. Bakena ikenyi taimi wa payukam dompirinino. Newarafi make mana yamuci manda baruci unti kakaraci memi. ¹⁷ Micni mukemifo, ikeni iyewakaci ocenicukekac bako. Afo ikeni ne uwara kowa raci, iyeno mi ayikenafi mini wara indewakao. ¹⁸ Akac ikeye, iyewakaci amucna waini nama dekac sipakic oko. Newarafi, mini foni ikenyic yaumi mandemi mandac emi: Holi Spiriti waci iken kimi unti kakano. ¹⁹ Ikeye, ic bukukin kena ikaci enawac da-ankeka, aka mam icdeka, akac spiriti ikuc dekaci akac awokuc yimen tinkewaci, ikenyic Iyeno naci, umacden yirapinkewaci icda- ankako. ²⁰ Masicden nuranac ikeye, umaden andanda wani, Iyeno, Jisasi yewekem Goti ikeu tifom paci tusu seno. ²¹ Akac ikeyaraci enu yirafin umandekec makafim danaci, mini bantoni, Jisasin iyena wici maran temi. ²² - Anasiuko, ikeye iken yiwafun arafina bako. Ikeni Iyenon arafimi wekon amankake. ²³ Newarafi, wantan anasi acnon kac yanic ukemi. Jisasin siosi acnon kaci yanic ukenin amankake. Akac siosin Jisasin o wami, akac Jisasin yemi awikemi. ²⁴ Micni mukami siosin Jisasi arafimi wemi. Micni mukemifo, masicden andanda kinaci, anasi, eni wanta arafinaci bano. ²⁵ Wantauko, iken yina karaci yiyi karakai oko. Jisasin siosi wani aye nimi, wenafoni wen aumi siosin amenim amankake. ²⁶ Jisasin wenafoni wen aumi siosin amemi. Siosi mandekim ako anda nic irare. Weni non namac wen awaya so namaci siosi mandem yo dawandemi nono kemi. ²⁷ Weni micni rana na siosi wen okankac awokufi kukan uka na siosi konkon mac, afundacbac iyewac bena, siosi ako andanic ukem akac uman dacbac iyewac duka no ware. ²⁸ Micni mukemifo, wantauc yen yina karaci yen yuwani yiyenim amankakaci yiyino. Iyen baintac wen ana kani ayi karaci enafi, weyani ayemi. ²⁹ Mana wainta wac iyewaci we yowani arac umani maremifo, we yokaci awokuc dafisiric muremi yunami amemi. Yewekem Jisasin siosin awokufic urem yunan amiremi awokufic u' ankenin amankake. ³⁰ Newarafi, ikeu namake, wenic mana wu arani wenin amankaci weko. ³¹ Mini andakac mana mana wainta wen ano afo ma yere yinkarem wen anac namac owene yekanda mana wu banteno. ³² Mini puka bayani ayom pakenimi, Iyena baya yukami wemifo, teni Jisasi namac siosi nama kana na teko. ³³ Minic mukemifo, ikeni maya maya bekoke, eyani ayeona amankakaci, en anakani ayikano, ake anasi wen awafun arafinaci bano.