¹ Teni krastinic karafusi wainta kem beci tenti erare'kunaci ikeya antekeni wantim boko ware, Goti ikemi yareno ben awakuroko ware. ² Ikeye enu yiratinac beka, akac nanayim barec uwan yinkeka, akac maya maya waci, iye beni enu tasasiran anon indiric enafic, benac tasaseko. ³ Ikeye, erarac urec yocdecka manakim bam barac pakako. Spiritikim nanayim marec, akac ikeunamac mana ankumi banteko. ⁴ Mana bu nanam beno, akac mana spiriti manam beno. Micni mukami Goti ikemi yareno, mana andandakac anteko ware, minim benimi Goti benic promasi ikeunamac amankafic usinkarare. ⁵ Akac Iyeno beyam bemi, mana bilivi namac mana baptaisi namaci bemi. ⁶ Akac mana Goti ikeunamac tifom bemi, iyec anasi wanta yicnonkabena, akac beni umaden iniya waintaukim yokemi, akac beni umade usimi bemi. ⁷ Beni ikeunamac mana mana bilivi waintauc nanayini timemino, akac Kraisti ikeunamac maranuna amankaci presenti timemino. ⁸ Micni mukami Gotinic buku tewi, afo bena urene, beni karafusic ukeyom iniya wainta yivikem benamac undemi, akac beni presenti anasi wantan yiminteno. ⁹ Nec benic anda bena, becnamifac uron umbaekem awayic ukemi makakac kumonine? ¹⁰ Mini wainta acnani kumemoni, beni inarupac yemanande ureno, amankakac beni umaden andanda untika yinkanteno. ¹¹ Kraisti mana eyom bilivi waintauci aposoli yokani yimeno, akac ena profeti yokare, akac enan ivenjaristiki yokare, akac enan pasta yokare, akac ena tisan yokani. ¹² Beni bilivi waintauc mini presenti yimeno benic awokuc yokam marako ware, Kraistinic ocmana era oko wani micneno. ¹³ Beni Kraistin ockimi yokeno ikeunamac bilivi wantauc amankafi ono ware, akac amankafiuwe Gotin akakinkena indin maranoware. Beni ikeunamac eraruec akac Kraistinic awokuc baruc amankafic ono ware. ¹⁴ Ikeunamac make titoc intauci weyom barika ukanaino, akac enu sisowanic solwaran awekenini ure iyen tiwekanteyo, akac tivike marore umac bayayuc tisimin teyo, akac makatire yeni umac yokaric iye minteyo. ¹⁵ Afo, ikeunamac puka wayayac tekaci ena wani yiyenim barikac ono, akac ikeunamac minici umaden asapate eran dukeci akaec Kraisti namac manakin'nukami wantec, beni ikeunamac ticnomi bemi. ¹⁶ Kraisti beni umadem bilivi waintauc yu mandekem manakinic murukami wante, akac beni yu yicnun'naru mandekem manakinic murukami akac umade manakimi yekeno, mini bumi manakimi yokemi enawani yiyeyom wani bemi. ¹⁷ Micni mukai teni eram bayani Iyeno avitimi ikemi tiyimeko, ikeni iyewaka aideniuyic wantim manakini ukec bako. Yenyic wantimi anami uwantemino. ¹⁸ Newarafic, yenyic indintimi ayufumkam bani untikemi, akac yeni Gotinic ayintimi nekaci beyo, akac bayay iyewac indeyomi yenkimi beno, newarafic, yenyic indini akaci keno. ¹⁹ Yeni yiyoreyom bani iyen dukeyo, akac yenyic manda indintoni yeni manda mana uwareyo. ²⁰ Afo, mini bani ikeni Kraistin kinkewac maranaino. ²¹ Teni indiekec ikeni Kraistin awayay indec, akac ikeni benkinkena indim mareci, akac puka wayani Jisasin kimi beno. ²² Aci ikeni afoyic eci peyam baruc ikenyic bantin ecano, akac peyam bainta ecano, mini peyam bainta beni mandaci meno, newarafic, benkimi umac baruci untikakeno. ²³ Ikeni mini peyam baintawac tankaranaci akac ikenyic indin yeweken oyanic ino. ²⁴ Akac ikenci yewekec oyan iniya waintac inakono. Mini iniya wainta Goti mandekem oyanic uremi antekenim wantim demi akac mana mandawac iyem bantemi. ²⁵ Micni mukemifo umac bayayuc ecekac, ike maya maya puka bayaya ena bilivi wainta tameno, newarafic, ikeni buic mukano. ²⁶ Afo, ikena yiram mareke, ikeni pekarac pekako. Bakec sinic ive, iken yiram iyewakac ecam micnukem bana acamam kumpekano. ²⁷ Bakec ike bananoni ona dirana ikeyic awokuc arinino. ²⁸ Iyem baintac beni andanda umorenafic, iyewaka enayabac umorono, beni ben ayam pinkewac eraruren yodewac, aka, andanda dukewac andanda wanc iroc inayom waintauc tasaseno. ²⁹ Ikeni iyewakac manda bayani iken yofenka kumino, ikeni awokuc baya nanawac teko wanta umaren kumin'nanikim eraruyikako, micnukam bayani wantaci tasasewa indenone. ³⁰ Akac iyewaci yirac umani Gotinic Holi Spiriti amenone. Newarafic, Gotin ikemi Holi Spiritin yimirukemi, ikemi beyaric meno beni anasi wantaci kukam mono, akac beni iken yiwikananim kukakani wani beno. ³¹ Ikeni yirac mandacenimi barukac ecako, akac yisice akac yirankem akac yirim bayatec akac amambayasec akac umacdem manda baruc. ³² Afo, ikeye awokuc barac ena iniya waintan uwan yinkako, iken yindurac yenac yimeko, akac yenyic siniwac yomanan yinkano Gotin Jisasin awitimic ikeunamatic sinin yomana deninikac ekaci yemac micni wac oko.