¹ Yesu ya ku kara tapa u yishi u kuandja iribi. Bate ba buiki ba ku nyororo kiri kiri, ipu rande ya ku katuwu, ya ku shikimi u kata buate ariki ri iribi. Bate ba bakimi ba wara ba nyoro munu ba me yembete a shini u kuandja iribi. ² Ya ku bayishi meyi ma buiki u mikondo. Rende mana mi bayishiki yande : ³ Wok'anana : Ngono bikete apunu ishini kuwono. ⁴ Itanga ra wonoko yande, ndambe ndjeke dja ndombo i ku buaka u kuandja a mboko; ba puru ba ku wiyi ndo ku shi dja sha shikimi. ⁵ Ndambe yini i ndjeke ku buaka a riki ra shini dja ma manya, u iraka ra bere wara mana ma buiki. Mun'anana shi ku pushuwu, ishin'abere wara mana ma buiki. ⁶ Kek'anana a bara muanya mua buiki, shi ku rebere ndo ku womo, ishin'ande nyiri ka nya she nini u shini. ⁷ Ndambe yini i ndjeke ku buaka u kata marungu: Marungu ku nanga ndo ma ku shiringi, keke ka sha she tu ndombo. ⁸ Ndambe ndjeke dja ndombo ku buaka u mana ma masheke: Shi ku pushuwu, ku nanga ku tu ndombo: Ishini imoko ri ku punushu ndombo masha mashata, ireke masha ma shamunu ndo ireke rukama. ⁹ Ambishi ya ku roro: Yon'ake yiyi ando matu mi woko yi woko. ¹⁰ Itanga ra sha ya shara ya mene, bana ba wara ba nongo ando baweke ishanga ando bapende ku nguru makongo u rueye ru mikondo. ¹¹ Ya ku bashosho: Rueye rua shuama ru bukumu bua Ndjambe bi bu yeke buinu arundu; kek'ake ishini bande bane biyi u bushobo, dja bikimi dja ntshambaka ku mikondo; ¹² Shin'ande u marendere birende keke ko ba monoko bi, ndo u mawokoro biwoko, keke ko ba yebe shimbi bi, ishin'ande ka ba barara miteme, ndo aki areke bi ba rimbishi ma ndimbi ma bande. ¹³ Ya ku kara ba roro ande: Ka bua ntsheke yebe shimba a nkondo mune? Ipu nana ri rene buini yebe shimba mikondo nya mikimi? ¹⁴ Ngono a ngonoko rueyi rua Ndjambe. ¹⁵ Bate bana ba moko biyi ngo ndombo sha buaka u kuandja mboko, mbete ya wono ba rutoto; itanga ramana ba woko, mun'anana Satana yiyi ndo yi teye rutoto runu rua wono ba u kata bande. ¹⁶ Ibeke abanda ipu imoko biyi ngo ndombo shini sha buaka u maraka mi ma manya: Itanga ra ngoko banda rueyi rua Ndjambe, bake ru wosho ando bunyaka.17 Kek'ake ngo yi bere ba wiyi a nyiri u kata banda, bakapa mangoro mi shumu. Ndo pa a yi punu ntanda mbe itumbu ishini rueyi rua Ndjambe, bi mono mboko ndja u buaka. ¹⁸ Ibeke biyi ngo ndombo shini sha buaka u ndenge marungu: Biyi banda bana ba ngoko rueyi rua Ndjambe; 9 kek'ake nyingi sha keke yini ngowo, ndjara biroko, nyingi sha shamba sha meye meke, dji dja ngubushuku rueyi rua Ndjambe, keke ko rua tu ndombo. ²⁰ Ibeke aki biyi ngo ndombo sha buaka u kata mana ma masheke: Biyi bate bana ba ngoko rueyi rua Ndjambe, bake ruwosho, ndo ba ntuku ndombo: Yono masha mashata, indjueke masha mashamunu, ndo indjuek'ake rukama. ²¹ Ya ku kara ba roro ya nde: Ba meke wosho muindi ishini ku mushiki u shini kantini, mbe ku shini ishashe? Kuap'aki ishini ku mushiki ariki ri itara ra muindi? ²² Shin'a nde kuapa ayi ikete arimoko rashueye banda ribere moniyo wora woro bi, kuapa rueyi arumoko ru bushuama rubere banda ushono wora woro bi. ²³ Yon'aki yiyi ando matu miwoko, iwoko. ²⁴ Ya ku kara ba roro: Bua npenye anana ando meyi mana ma ngoko buini. Bi bu bo bokoshe ruere ando runu rua mokoshoko buini bate, ndo bi bu nya bu nyayishe ushamba. ²⁵ Ishin'ande bi ye yeke moto yono iya ikete, kek'ake yono ibere wiyi a ikete, bi ntatambara rini ra nguengeye ya yiyi a rinda. ²⁶ Ya ku kara ba roro: Bukumu bua riki buiyi ngo moto yono a wono ndombo u ishobo rande. ²⁷ Ngono yono itsho mbe ibereke tshondjo, butuwu mbe muanya, ndombo shi pu pushuwu ndo shi nanga ikini ya uyebe ipu rini ra ngueteke dji kereme. ²⁸ Shini ya meke meneshe yinda mene bikete: Bukoto ntimbi, ambishi mueshe, ambishi yini ndombo shi yoro u kata mueshe. ²⁹ Ndo ndombo a wende shindiu, bi shikekere a rukuru ishini nde itanga rikunu ra yemene. ³⁰ Ya ku kare roro: Tshu kara koriyi bukumu bua bora Ndjambe ando yeye? Mbe kuapa ande tshu kara bu roro ando nkondo munana? ³¹ Bu kumu bua Ndjambe bua puanya rundombo rua nguruku ba mutarda. A ru wono ba a shini, ruiyi rua rukeke u ndombo sha shikimi shini shiyi ani a shina mane. ³² Kek'ambishi itanga rini ra ba ruwono rupushuwu ndo anangake rundu rukoro nte bunene ureke miti nya mikimi nyi ishobo. Rua meke yeke tamba sha shinene ipu nde bapuru ba riki biyi u shoro ma yandja ma ba ushini rumbu ra mundu. ³³ Yesu a ba yishiki rueye rua Ndjambe u mikondo nya buiki nyini nya wara bande ruere yebe shimbi. ³⁴ Keke kaweke ba shosho rueyi ubere boko nkondo bi; kek'ake awarke yande ando baweke bande ba mene a weke ba ripishi shimba nyindi. ³⁵ Ikokoro ri rushuwu runu awuiri rindi, Yesu ku roro baweke bande: Tshua shabuwu anana wu muiri mua wono mui iribi. ³⁶ Ba ku rekere bate, ndo ba kuwe shende Yesu ukata buate bunu bua wara yanda, mate meke ake ma buiki ma ma wara anana a ngama nde. ³⁷ Pungu dja inono iku kuishi, ndo ku katesha mapakara ma mashe, mashe ku nini ukata buate, u raba yoro buika buiki. ³⁸ Keke yanda ki, awara a tshondjo utoyo a mbishi a buate ariki ra kuse. Ba ku ngumunu ba nde: Murongosho, ka wa monok'ande tshua ku we, ka dja ki roro rueyi bo? ³⁹ A wumuwu yanda, ya ku pangashe pungu ndo ya kuroro mashe ande ya kiti poro'o, keke pungu yi ku ya kiti, ndo poro'o shi ku nini. ⁴⁰ Keke ya ku ba shosho ya ande: ishini yeye yi buini ando butete bua buiki? Ishini yeye ibere buini wiyi ando maweshere a mbura ame? ⁴¹ Butete bua buiki bu ku ba wata, keke ba ku ya roshoro banda banda ande: moto yono yi nana ndo pungu ngona a ma pakara ma mashe djake ntomowu?