¹ Yesu, ya ku kokiyi ishanga a ba pende, ku ba yeke bunono ndo bundueyi a riki ri ba demo ba bakimi, ndo mangoro mi bereshe mawara. ² Ya ku ba tomo u yishi bu kumu bua Ndjambe, ndo u bereshe babere . ³ Ya ku ba roro ya ande, a reke bua wosho a ikete bi shini rende ruinu, mbe ikomboto, mbe kombo, mbe djampa, mbe puaranga, ndo a reke buara a ndju saka tshu pende. ⁴ U mburu ndjeke yini yi nini buini, share anana; ndo inamana yi punu buini . ⁵ Ndo, mbe bate ba bere bu waya, bu punu u boro bua bunene bunu, ndo bu pupuru mana ma shini sha para shini, dji wara nondo mu toto a reke ra banda. ⁶ Ba kwende ndo ba weke bora a ndo bora u muanga lushanga rua rusheke ndo wu bereshe bata u maraka ma makimi. ⁷ Itanga ra woko Herode, kumu meyi ma makimi mana ma kereme, keke a shoto rueyi ru wengeye ishin'ande bate beke ba rok'ande dji Yone a wumuwu wu kate a bate ba wu. ⁸ Ibeke bande Elie a nkara moniyi, ibek'ande dji moko ndjua bangandjambe ba war'awara moto ankare wumuwu. ⁹ Kek'ake Herode ya ku roro y'ande Nda mamane batere Yone ntshu. Yono aki nana ndjua ngoko miyi ankereke meyi mane. Ndo a shotoko ipu ri mono. ¹⁰ Itanga ra wi karuwu bapostoro ba ku nondosho meyi mamakimi mane ma kere bande. Ya ku ba wosh'ando nde ku pambuwu tambe mbete ndjeke u boro bunu bua nguruku bande Betesayida. 1 Keke yora ra bate a yebe rinde ri ku nabe. Yesu ya ku ba waya ndo ya ku ba shosho lushanga ru bukumu bua Ndjambe ndo ya ku bereshe bane ba wara nyingi dja u beruwu. ¹² A wiri butuwu, ishanga ndo bapende,ku shepere ngama ande ndo ku noro karashe bate wende u mara ndo mara ma nenge ma ngama ande be shoto iraka ri tshondjo ndo be ya shombeshe bikete bi ndji, ishin'ande tshuiyi ku ndenge bushobo. 3 Ndo ya ku ba roro ande ba yeka ana buini ikete ridja. Kek'ake ba ku marara band'ande: Tshuiyi pamun'ando mampa matana aki bashu bapende, pa ande tshu kara shombo biti bidjere shini buiki bua bate bane. 4 Ba wara ki ruere rua bate binunu bi tana. Ya ku roro baweke bande ande: Ba shikiy'ana wu djoro dja bate ruere mashanga matana. ¹⁵ Ba ku kere ngosho ndo bato babakimi ba ku shikimi. 6 Ya ku wosho mampa mane matana aki bashu bapende keke ya ku totoro mishu wu riki ndo ya ku karashe Ndjambe maranga, ya ku batara bitenye, ndo ya ku yeke baweke shini ku kapasha ndjoro dja bate. 7 Ba ku dji ba bakimi ndo ba ku wutu, ndo peshere shini sha shara ba ku shikokiyi ndo shi ku yoro mitete ishang'ando mipende. ¹⁸ Dji ku kerem'ande itanga rini ra romboke yande Ndjambe u mbete ndjeke, a nguara pa ando baweke bande, ya ku ba wur'ande bate ba noko mbuenye shini miyi. ¹⁹ Ba ku marar'ande wi Yone mu baptize ibek'ande wi Eliyi, ibek'ande moko ndjua bangandjambe ba wara a ngumuwu. ²⁰ Ya ku ba ror'ande buina ki bua nok'ande ndi nani? Petero ku marar'ande wu Kristu yono ndjua wi punu wu bora Ndjambe. ²¹ Yesu ya ku ba kara buika a reke bua shosho mbe moto a moko rueyi runu. ²² Ya ku nyaya ande dja nombok'ande muana a moto imomono ntanda mua buiki' bi mere wu bora bawotora aki wu bora ba kubangang'aki bapunda mikanda ndo bi nyaka ndo iwumuwu wu mbishi matuwu mashata. ²³ Ambishi ya ku ba shosho ba bakimi ande: Mbe moto a shoto wu ndabe miyi yi ya bere yand'amene itotoro nti muande mua wesheshe rushuwu rua rukimi ndo indaba. ²⁴ Ishini ndjuakimi ndjua ngwesheke wu wondjoro monyo muanda imuri murishi, Kek'ake ndjuankimi ndjua irimishi monyo muande ishini miyi, imuwo-muwondjoro. ²⁵ Ndo moto ibuishi iyeye mbe djar'ande ama buishi shin'amana ndja ikimi keke irimishi monyo muanda? ²⁶ Ishini ndjuakimi ndjua mpoko bushonyo a ngon'a meyi mama, muana moto yi ngongo ko ayande bushonye itanga rini ri wiy'ande wu rutono ruande ndo rua bora tata aki rua banjero bi kini. ²⁷ Ndaka bu shosho bara-bar'ande ibeke biyi ani, kobi she wu bi bande u bere mono bukumu bua bora Ndjambe. ²⁸ Ndji ku kereme ande Yesu a mana yande u toto meyi mana, ndo a shamba matuwu ruere inana, ya ku wosho Petero ,Yone, aki Yakobo kwend'ando bande a riki ra nkondjo shini ku rombo Ndjambe. ²⁹ Itanga ra romboko ya Ndjambe ipu ra bosho buande ri ku bamana ndo mapere mande ma ku buaka yeme ra buiki. ³⁰ Ndo bate bapende ba totok'ande dja wara Mose ba Eliyi, ³¹ Ba ku monyiyi wu rutono ba totoko shini ma were mande mane mara yemene u Yerushareme. ³² Itanga rini Petero ndo bane ba war'ando nde ba wara mishi ma komo buriti a ntshondjo. Kek'ake a yembeshe bande mishi, ba ku mono rutono ruande ndo bate bapende ba yembet'ando nde. ³³ Dji ku kerem'ande itanga bate bane a kapasha band'ando Yesu, Petero ya ku nor'ande: Murongosho dji bushek'ande tshuar'ani ngowo. Ndo tshu shoro ma tombo ma shata, imoko shini wene imoko shini Mose, ndo ireke shini Eliyi. Ka sheke yebe rueyi runu rua roko yande. ³⁴ Itanga ra totoko yande meyi mane, ibende ri kwiyi u ba kukiyi ba kwar'ando butete ishini ibende rini ri ba riti. ³⁵ Rutoto ru ku punu u ibende ku ror'ande: ³⁶ Itanga rutot'a shiri rundu, Yesu ku shashara ya mene. Ba ku boto poro ndo matuwu mane, ka ba toko shosho moto meyi mane ma mono bande. ³⁷ Dji ku kerem'ande rushuwu rua naba runu rua tshueruwu bande u nkondjo, yoro ra bate ba buiki ri ku tashar'ando banda. ³⁸ Lende, moto moko u ndenga yoro ku boko mbere wu ror'ande: Murongosho, ndak'ibondoro u rende rueyi rua muan'ami ndjua barungu ishin'ande yiyi pa yande muan'ami moko. ³⁹ Rende, nyumu ndja ibe a meke yindi ngwata ndo mun'anana itapa wabuwu i nyinyi u shushunu ndo i punu yuru wu numbu. Nyumu ndja ibe ka ya mek'nekere buashe, yi nembesheke biyere bukoto yi u nkobuwu. ⁴⁰ Nda mondoro baweke bawu u mingi tamb'ande, kek'ake shi ba yemene bi. ⁴¹ Irondjo ra shoto ma weshere ndo ri bikekere, a barara Yesu, inamana kueye yara miyi ando yini, ndo bu kereshe? Irata muan'awu ani ngowo. ⁴² Ngo a karuku ya ngama demo ku muishi a shini, ndo ku nyinyi buika-buiki. Kek'ake Yesu ya ku pangasha nyumu ndjua mbindi, ku bereshe muana, ndo ku nyek'ishande. ⁴³ Ndo ba bakimi ba shotoko rueye ru roro a bunene bua Ndjambe. Shoko inake moto a moto a wara yi ya wuru ishini meyi mamakimi mane ma kere yande, ya ku roro bawek'ande: ⁴⁴ Meyi mane ngow'mamakimi mi nini wu matu mini ishin'ande muan'a moto bi neneye wu djara dja bate. ⁴⁵ Keke banda ka ba sheke wok'ande rueyi runu rua toto iyeye. Rua wara rua riti ndo ka ba she ba ripishi a rundu ba wu yebe rua noko iyeye. Ndo ba wara butete bu nguru rueyi runu. ⁴⁶ Ambishi yini iweye ri ku katuwu u ndeng'a banda ishini ku yeb'ande nani a neke bate beke. ⁴⁷ Keke Yesu a yebeke yande manya mi miteme nya banda, ya ku wosho muana ndjua nekeke, ya ku ntshik'akor'ande. ⁴⁸ Ndo mbishi yini ya ku ba shosho ande: Mbe moto a waya muana ndjua nkeke ngo yono wu rukombo ruama, a npuayi miyi ndo mbe moto a puayi miyi a ma waya a yono ndjua tomo miyi. Ishini, yono yiyi ndjua nkeke undenga ini buini bakimi, yande yono yiyi djua nene. ⁴⁹ Yone ku wosho ru tot'ande: Murongosho tshua mono moto ibingi ba demo u rukombo ruawu ndo biti ku nkar'ishin'ande ka ntsheke u tshu raba. ⁵⁰ Kek'ake Yesu ya ku nor'ande: A reke bua nkara ishini yono ibere wiyi a yini rueye yi shini buini. ⁵¹ Itanga matuwu akaruma ngama wekaru ra riki Yesu ku wosho buanya bu wende ra Yerusareme. ⁵² Ya ku tomo bate ba pende u bosho buanda, ba kuende bande ndo ba ku nini u kata boro bua Samaliya bande u norosho mawiri manda. ⁵³ Kek'ake bina boro bunu ka ba toko nguaya ishini a weke yande ra Yerushareme. ⁵⁴ Itanga ra mono banda rueyi runu baweke bana Yone ndo Jake ba ku ror'ande: Kumu, wa wesh'ande tshu rombo tiyi tshu tshuerewu u riki ndo tshu ba shirishi?. ⁵⁵ Ya ku barama u mbete a bande ndo ya ku ba pagashe, ⁵⁶ ndo ba kuende u boro bueke. ⁵⁷ Itanga rini ra wara bande a mboko moto moko ya ku nor'ande: Ndi wek'iraba mbete ndja ikimi ye wene. ⁵⁸ Yesu ya ku marar'ande: 'Minguenge nyiyi ando nyende nya nyinde, bapuru ba riki biy'ando mayandja ma bande, kek'ake muana moto akapa ndo iraka ri wekeye ntshu muanda. ⁵⁹ Ambishi yini ya ku shosho moto ndjueke : Ndaba, ya kumarar'ande: Kumu toko pueshere mi toko we reye tata, ⁶⁰ Kek'ake Yesu ya ku nor'ande: Rekere bate bane ba wa bireye miniwi nya banda. Wen'aki, yaka we shosho bate u mbete sha shikimi lushanga ru bukumu bua Ndjambe. ⁶¹ Moto ndjueke a roro yand'ande Kumu, ndik'iraba, kek'ake toko puesher'ande ndende we raya bina mbur'ame, ⁶² Yesu ya nor'ande: Kuapa a moto a moko a tshuku katumbu ki bendje a kande ishobo, ndo a mbishi yini yi kara barara mishi u mbishi, a ka ndjua yemene ando bukumu bua Ndjambe.