¹ A mbishi, Yesu a wiki ribiri, boro bua bunene a boro bua bunene ndo boro a boro,a yishiki ndo a wiki shono rushanga rua rusheke ru bukumu bua Ndjambe. ² Ishanga ndo ba pende ba war'ando nde aki bawata beke bana ba bereshe yande nyumu sha shibe ndo mawara: Mariya, yono ndjua Magadara, u bora yono a punu ba demo shamboro, ³ Janne, ngara bora Shuza, nondo bikete dja bora Herode, Suzane, ndo ibeke ba buiki, bana ba weke nguashe a bikete dja banda. ⁴ Yoro ra bate ba buiki a ya kokoyi rindi, ndo ngono a bate ba wi punu mbete a mbete u mara ma manene kuiyi a kor'ande, ya ku boko nkondo: ⁵ Ngono ku punu ishini ku wono ndombo shande. Ngo a wiki ya wono, ndamba ndja ndombo ku buaka u kuandja mboko: ba ku shi nyeke a para ndo ba puru ba riki ku shi dji. ⁶ Ndo ndambe ndjeke ku buaka a riki ri imanya: itanga ra mpushuwu shindi, shi ku womo, shin'ande ka sha shi pete piyi. ⁷ Ndamba ndjeke ku buaka u ndenge minambe nyi mishueye: minamba nyi ku nanga ando shindi, ndo ku shi ringi. ⁸ Ndambe ndjeke ku buaka u kata shini ndja isheke. A punu shindi, shi ku boto ndombo u shamba rukama. A mbishi u mana toto ngosho, Yesu ku roro a rutoto ru runono: Yono yiya matu shini ku woko, yi woko. ⁹ Baweke bande ku nguru banda runu rua noko nkondo munu. ¹⁰ Ya ku barara: Ba ma buyeke u yebe meyi mashuama mi bukunu bua Ndjambe; shini bande bana ibek'ake, ba meke ba shosho a manda ku mikondo, ishin'ande a monoko bande ko ba tararaka bi, ndo a wokoko bande ko ba yebeke shongo bi. ¹¹ Rende runu rua nesheke nkondo munu: ndombo, shiyi rutoto rua Ndjambe. ¹² Bana biyi u kuandja mboko, biyi banda bana ba ngokoko; keke djaboro yiyi, ndo yi teye u miteme nya banda rutoto, shin'ande ka baweshe ndo ka ba wondjoro. ¹³ Bana biyi ariki ri mamanya, biyi banda bana, itanga ra ngoko ba rutoto, bi ru wosho ando bunyaka; kek'ake ba kapa a nyiri bi, ba nguesheke shini itanga ra rikeke, ndo bake buaka u itanga ri makiriri. ¹⁴ Yini ya buaka u ndenge minamba nyi mishueyi, biyi banda bana, a mara ba woko rutoto, bende, ndo bi ya rekere ipu nde nyingi, biroko, ndo manyaka mi rutoko dji ba ringi, ndo ko ba tu ndombo sha mende wende bi. ¹⁵ Yini ya buaka u kata shini ndja isheke, biyi banda bana biy'ande,a mara ba woko rutoto ando nteme mua yembe ndo mua musheke, bi ru shuku, ndo bi tu ndombo ando mawindjuwu ma nteme. ¹⁶ Kua moto, a mara ya temeshe muindi, yi mu kukiyi poko, mbe kuapa yi mu shiki u shini ishasha; kek'ake a meke mu panyaye ku riki, shin'ande bana ba niniki bi mono yembe. ¹⁷ Ishin'ande kuapa a ikete ra shueye ri bere banda punushu u wororo, kuapa rueyi ru bushuama ru bere ba yebe ndo ru punushu u muanya. ¹⁸ Wosh'anana buany'ake u ipu rini ra ngoko buini, shin'ande bi ye yeke u yono yiyi a rindi, kek'ake yono yi bere wiyi a rindi bi, bi te teye a yasha rini ra ntshiki ya nteme u wara rindi. ¹⁹ Inyande ndo ba binyande ba bora Yesu ku wiyi u mono; kek'ake ka ba toko pete ipu ri toto a nde, ishini yoro ra bate. ²⁰ Ba ku ntshosho: Nyowo ndo bana banyowo kaba u bushobo, ndo ba ntshotoko ku imono. ²¹ Kek'ake ya ku barara: Maya ando bana ba maya, biyi banda bana ba ngoko rutoto rua Ndjamba, ndo baka rukere. ²² Rushu rueke, Yesu ya ku banda u kata buate bua bunene ando baweke banda. Ya ku baroro: Tshua shabuw'anana u muiri mua wono mu iribi, ndo ba ku wende. ²³ Itanga ra wuki ba ruwu, Yesu ku tshondjo. Pungu ndja inono yi ku wiyi a riki ri iribi, buate bua yoroko masha, ndo buate bua roko puruwu. ²⁴ Ba ku karuwu a ngama ndo ba ku ngumunu ba roko: Murongosho, Murongosho tshuak'wa! A ngumuwu yande, ya ku pangasha pungu ndo mapakara ma masha, dji ku rembe, ndo poro shi ku karuwu. ²⁵ A mbishi ya ku ba ror'ande: Maweshere mini mi kueye ? Butete ku ba wata ndo u keme, ba ku ya roro banda a banda: Yon'ake yi nane, a ntomoshoko a yasha mungu ndo masha rutoto, ndo djake ntomowu ? ²⁶ Ba ku we toro u mbongo ndja kata boro bua bina Garaseniye, buna bua neshene a NGarere. ²⁷ Itanga Yesu a ntshuerewu ya a shini, moto moko ndjua boro bua bunene a wara a ba demo ba buiki kuiyi u bosho buanda.To wara ka weke reye mapere, ndo ka sheke we wara u mburu, Kek'ake a weke wara ku mabandja. ²⁸ A mono yande Yesu, ya ku boko ruaba, ya ku buaka u para shande, ndo ya ku roro a nono a nono: Ru nana ruiyi u ndeng'ami bit'ape, Yesu, muana Ndjamba djua riki ? Ndake yi bondoro, a reke wa mbonosho ntanda bi. ²⁹ Shin'ande Yesu a tomo rueyi u nyumu ndjua mbindi ya u punu u moto yono, yono a weke nguata matuwu ma buiki; ba weke maka ba nkanda ba shene ndo mboro u para, kek'ake she batara, ndo ba weke nata u boro ba demo u kata ndenge bushobe. ³⁰ Yesu ya ku nguru: Rukombo ruawa we nane ? Ya ku marar'ande: Ba buiki. Ishin'ande ba demo ba buiki ba ma nini u kata nde. ³¹ Ndo ba ku bondoro Yesu a reke yi ba tomo u kata ibembe ra ngidi. ³² Dja ma wara u nono, u kata nkondjo, tumu ndja banguru ba buiki bana ba wara bi wete djiki ndo ba demo ku bondoro Yesu u bayeke mboko ndja u nini u kata banguru bana. Keke ya ku ba yeke mboko. ³³ Ba demo ba ku punu u moto yono, ku nini u ba nguru, ndo ba nguru ku kakuwu mbanga, ku womono u kata iribi, ndo ba ku ya kiti u masha ba ku wa. ³⁴ Bana bi ba djishiki, a mono ba runu rua kereme, ba ku tini, ndo kwe muanga rushanga u kata boro bua bunene ndo u kata mara ma makeke. ³⁵ Bate ba weke u mono runu rua kereme. Ba kwende a kora bora Yesu, ndo ba ku to mono moto yono bademo ba punu u yande, a ntshikimi u mikoro nyande, a neye mapere, ndo u kata buanya buande bua busheke; ndo butete bu ku ba wate. ³⁶ Bana ba mono runu rua kereme ba weteke ba rondosho puara yini muina ba demo a wondjowo yande. ³⁷ Bate ba bakimi bi itenye ra shini ra Gerazeniyi ku rombo Yesu ya u kobuwu u bora bande, ishin'ande butete bua buiki bua wara bua ba wata. Yesu ku nini u kata buate, ndo ya kwe karuwa. ³⁸ Moto yono ba demo ba punu u kata nde ya ku rombo Yesu mboko ndja ya ushara ba nde. Kek'ake Yesu ya ku nkarasha, ndo ku noro ande: ³⁹ Ya karuwa u kata mbur'awa, ndo u rondoro meyi ma makimi mane ma ikereshe Ndjambe. Ya kwende, ndo a muanga rushanga u boro bua bunene bua bukimi meyi ma makimi mana ma nkereshe Yesu ⁴⁰ U ma karuwu mande,Yesu ba nguaye u bora yoro ra bate. Ishini ba bakimi ba wara bi make. ⁴¹ Ndo rende moto moko kuiyi rukombo ruande Yarus awara kumu djua Sina gongo. Ya ku ya boko u para shanda, ndo ya ku mondoro u nini u mbur'ande, 42 Ishin'ande a wara muan'ande moko djua ngata ruere mashewe ishanga a ma pende a shotoko uwa. Itanga Yesu a weke yande bate ba u ku nyukunu. ⁴³ Ndo, dja ma wara a ngata ndjua buwara bua shopoko makere to mashewe ishanga ndo ma pende, ndo yono a mana ra rikimi irande shini minganga, keke kua a moko a toko mereshe. ⁴⁴ Ya ku karuwa ngama u mbeta mbishi, ndo ku kumunu shosho mapere ma bora Yesu. Mun'anana makere ma ku batuwu. ⁴⁵ Ndo Yesu ku ror'ande: Nane a nkumune ? ngo bato ba bakimi a tonoko banda, Petelo ndo bana ba wara ando nde ku roro: Murongosho, yoro ra yi rongo ndo raka yi nyukunu, ndo wa karake uru: Nane a nkumunu ? ⁴⁶ Kek'ake Yesu ku barara: Moto moko a ma kumunu, ishin'ande nda wok'ande bunono bu moko bua punu u miyi. ⁴⁷ Ngata, a mono ya ande a ma punu yembe, kuiyi ya yi riti ku ya boko u para shande, ndo a shono yande u bosho bua bate ba bakimi ishini yeye a ma ya nkumunu, ndo ipu nana ra meruwu yande mun'anana. ⁴⁸ Yesu ya ku noro: Muan'ami ndjua bawate, maweshere mawa ma yi wondjoro. Yaka u poro. ⁴⁹ Ngo a karaka ya wete toto, moto ndjueke a wi punu u bora kumu ndjua sinangongo a roko: Muan'awu ndjua ngate a ma wa, ka kara dja Murongosho rubua. ⁵⁰ Kek'ake Yesu a ngoko ya ngosho, ku roro kumu ndjua sinangongo: A reke wa woko butete, wara pa ndo maweshere, ndo yi wo wondjuwo. ⁵¹ Itanga ra me ya toro u mburu, ka toko weshe ande moto ndjueke yi nini ando nde, pa munu Petero, a yone ndo aki jake ndo ishanda ba inyanda muana. ⁵² Ba bakimi ba rereke ndo bi ya boroko a riki randa, keke Yesu ku roro: Kaka na rere bi; she ashe wa, kek'ake a make tshondjo. ⁵³ Ndo ba weteke ntsheye, a yebeke ba ande a ma mana wu. ⁵⁴ Kek'ake ya ku tshuku u yata, ndo ku noro a nono: Muana katuwa. ⁵⁵ Ndo monyo muanda ku karuwu u yande,ndo mun'anana ya ku katuwu; ndo Yesu ku reye rutoto ande bi nyeke ikete ridja. ⁵⁶ Ba boto ba irenge ra mua ngata ba ku keme, ndo ya ku bakara u bere shosho moto runu rua kereme