¹ A mbishi a mana yande toto sha shikimi u bosho bua bate bana ba ngokoko, Yesu ku nini u kate Kapernawumu. ² Kuma mayoro rukama a wara tshowo djua weshe yanda buiki a buiki, ndo a wara yi tata, ngama ndja iwa. ³ A woko yande ba bitoto rueyi rua Yesu, ya ku ntomosho bawotara beke bi ba yuda, ishini ku mondoro ya u wiyi u bereshe tshow'ande. ⁴ Ba ku toro u bora Yesu, ndo ba ku mondoro buika-buiki, bi roro: A ma yemene ande u nkereshe ipu rishi; ⁵ Ishin'ande a ma wondo shini a yiti, ndo yande yi tshu shorosho sinangongo a yiti. ⁶ Keke Yesu, a mende yande ando banda, a ntshara dji ngama ndja u toro a mburu, itanga ra kumu mayoro a tomo ya bambayi shini ku ntshosho: Kumu, a reke u ya yeke ndjoro sha buiki; shin'ande shi nda yemene ande wene u nini u mbur'ame. ⁷ Iraka rini, a mere mi ya mono ndjua yemene, she ra weshe u wiyi miya mene u boro buawa. Kek'ake roro rutoto ru moko, ndo muina ngunu a me yi be beruwu. ⁸ Ishin'ande, miyi yono ndi u shini bu kumu, ndiyi a mayoro u shina toto shama; ndo ndake roro u moko: Yaka! Ndo yende; u yi ndjueke: Iya! Ndo yiyi; ndo u ntshow'ame: kere ngowo! Ndo yi ru kere. ⁹ Itanga Yesu a ngoko ya toto shande, ya ku nyaka a kumu mayoro, ndo, a marama yand u rende yoro rini ra wiki naba, ya ku roro: Ndake bu shosho, mbe ku Isarere, ka ra toko mono maweshere ma manene mi ipu ra ngowo. ¹⁰ A nkaruwa banda u mburu, bate bana kumu mayoro a tomo yande ba to mono ntshowo ndo bonono bu rutoko. ¹¹ A mbishi, Yesu kuende u kata boro bua bunene bua wuruku banda Nayini; baweke bande ndo yoro ra bate ra ri nene ba weke wende ando nde. ¹² Keke a ntoro yande ngama a maninini ma boro bua bunene, rende, ba wiki rata a shini moto ndjua wa, muana barungu pa moko u bora inyande yono a wushu nungu; ndo bate ba buiki ba boro bunu bua bunene ba war'ando nde. ¹³ Kumu, a ma ya mono, ntshongo mua shamba ku nguata shini yande, ndo ku noro: Kaka rere! ¹⁴ Ya ku karuwa ngama ndo ku kumunu buere. Bana ba totoro buere ba ku yembete. Ya ku roro: Irenge ra nungu, ndake iroro, katuwa! ¹⁵ Ndo niwi ku shikime, ndo ku tapa u toto. Yesu ya ku nyeke inyande. ¹⁶ Butete ku ba wata ba bakimi, ndo ba tonoshoko Ndjambe, ba roko: Ngandjambe ndjua nene a ma punu u ndenge a yiti, ndo Ndjambe a ma wi mono bate bande. ¹⁷ Rutoto runu a riki ra Yesu rua muamana ku kata shini ndja yi kimi ndja Yudaya ndo shini ndja ikimi ndja ngama. ¹⁸ Baweke ba bora Yone ba ku tshosho meyi mana ma makimi. ¹⁹ Ya ku wuru ba pende u ndenga banda ndo ya ku ba tomo u bora Yesu, ishini ku ngurur: Wiyi yande yono yi wiyi, mbe aki tshu kara baka yi ndjueke? ²⁰ A toro banda ngama a Yesu, ba ku roro: Yone Ntishi a ma tshu tomo u boro buawa, shini ku yi wuru: Wiyi yande yono yi wiyi, mbe aki tshu kara baka yi ndjueke? ²¹ Munu itanga rini, Yesu ku bowo bate ba buiki bina ma wara, bina matowo, ndo nyumu sha shibe, ndo ku ripiri ba boriyi mishi ba buiki. ²² Ndo ya ku ba barara: Yak'ana bu rondosho Yone mana ma mono buini ndo ma ngoko buini: Ba boriyi mishi bake mono, ba rembe mikoro bake boko para, bina bara ba ba yembeshe, bana ba koko mato bake woko, miniwi nyake wumuwu, ndo rushonga rua rusheke bake shosho a rundu ba poto. ²³ Bunyaka u yono yi bere mi wara mboko ndja mabuishiri. ²⁴ Itanga bana ba tomo yone a wende ba karuwa, Yesu ku tapa u shosho yoro, a riki ra boro yone: Bua we mono nane u kata ndenge a nenge? Minenge nya mitara nyini nya nyinyiki pungu ? ²⁵ Kek'ake, bua we mono yi yeyi ? Moto ndjua a reyi mapere ma nganga? Rende, bane ba neyeke mapere ma nganga ndja buiki ndo ba nguaraka u kata maraka ma masheke, biyi ku kata ma mburu mi bakumu. ²⁶ Keke bua we mono yi yeye? Ngandjambe ? Eh, ndake bu shosho a ma reke a yasha Ngandjambe. ²⁷ Yiyi yande yono ndjua a pundu bande: Rende, nda ntomoko u bosho buawa noriyi a mbok'ame, shini ku roriyo mbok'awa u bosho buawa. ²⁸ Ndake bushosho, u bana ba boto bande u ba wata, kuapa a moko bi yono a neke Yone bunene. Keke yono ndjua neke bu keke u kata bukumu bua Ndjambe a ma neke bunene. ²⁹ Ndo bate ba bakimi bana ba ngoko ndo ayasha ba putushu a namba, ba ku weshe rongo rua Ndjambe, u weke ya tishi u ibatishi ra bora Yone. ³⁰ Kek'ake ba farisayi ndo bayebe mikendje, ku bere we ya tishi u yande, ba ku buishi maroriyi ma bora Ndjambe ngona-ngono u mishi ma banda. ³¹ Ku nana yi rene biti koriyo bate ba kumbu yini ndo ba mpuanya a ba nane? ³² Ba mpuanya bana ba bakeke ba ntshikimi u moshoro. Ndo bana, baka ya roshono bana a ibeke, bi roro: Tshua ma bu bukosho mishembe, ndo she bua mini; Tshua bu barashe ndjembe shi mashaya, ndo she bua rere. ³³ Ishin'ande Yone Mubatishi a ma wiyi, ka sheke we djiki mampa ndo ka sheke we nyuku mana, ndo bua noko: Yiyi ndo demo, ³⁴ Muana moto a ma wiyi, a djiki ndo a nyuku, keke bua noko: Yiyi muina bidji-djiki, ndo bi nyunyuku, mbaya a ba putushu a namba ndo bate ba meyi ma mabe. ³⁵ Kek'ake buanya ba ma bu shiki u rongo u bana bande ba bakimi. ³⁶ Moko ndjua mu farisayi ku bondoro Yesu ya we dji ba nde. Yesu ku nini u kata mburu ndja mu farisayi, ndo ku shikimi u mese. ³⁷ Ndo rende, ngata nkere a meyi ma mabe a wara u kata boro bua bunene, a yebe ya ande yi u mburu a boro mu farisayi a ntshikimi u mese, ku rata nondo mua yoro ndo shara ndja shoro dja Albate. ³⁸ Ndo ya ku yembete u mbishi, u para sha bora Yesu. Ya a rereke: ndo u matanga ma makeke ya ku rorosho para sha Yesu ando djoshono djanda, a mbishi ya ku numunu ando puiyi shande, ku ntu numbu, ndo ku nkoro shara ndja shoro. ³⁹ Mu farisayi yono a nguru, a mono ya ngono, ku toto mbonda-mbondo: Mbe moto yono yara wara ngandjambe, yarake yeb'ande ngata yono a ma nkumunu yi nani ndo ndjua ipu ra mbuenye, yaraka yebe ande yiyi nkere a meyi ma mabe. ⁴⁰ Yesu ku wosho rutoto, ndo ku roro: Simo, ndiya rueyi rueke ru yi shosho. Ya ku marara: Muyishi, toto. ⁴¹ Muina puaranga a wara a bina mbata shande ba pende. Moko yare nyeke puaranga kama itana yi ndjueke ma shanga matana. ⁴² Ngo a bere ba wara ikete ra putu, ya ku ba wongo tshongo u ba rekeshe mbata pende a bande. Nana u kata bande yi ngondo dja shambe? ⁴³ Simo ku marara: Nda nguengiyik'ande, ya yono a rekeshe yande ibasha ra rinene. Yesu ku noro: wa yebe u batara makambu. ⁴⁴ Keke, a ma ya barara u mbeta ngate, ku roro Simo: Wake mono ngate yone? nda nini u mburu awa, ndo she wa peke masha ma woko para shama bi; yand'ake, a ma rorosho para shama a djoshono djande, ndo ku shi shitiri ando puiyi shande. ⁴⁵ She wa toko tu numbu bi; yand'ake, to itanga ra nini miyi, she a toko rekere u tu para shami numbu bi. ⁴⁶ She wa witiri shara u ntshu muama bi, yand'ake, a ma tshaka mananashe u para shame. ⁴⁷ Iraka rini, ndake yi shosho a rundu, mandimbi mande ma buiki ba mana ma rimbishi: Ishin'ande a ma shundju ruwondo buika-buiki ruwondo. Yon'ake a nimbishiki banda kakeke a ngondoko kakeke. ⁴⁸ Ambishi ya ku roro ngat'ande: "Mandimbii mawu ba yi rimbishi a mande." ⁴⁹ Bana ba war'ando nde u meshe ba ku ya wuru banda-banda: "Yono moto nana animbishiki a mandimbi?" ⁵⁰ Kek'ake Yesu ku roro ngat'ande: "Maweshere mawa ma yi wondjoro, yaka poro."