¹ Dji ku kereme, rushuwu ru moko rua sabate, Yesu a shambaka mangondo ma ble. Baweke banda ba ku kunu nyeshe ndo ba ku dji ndombo sha ble, a mbishi u mana shi nyuwu u kata djara dja banda. ² Ba farisayi beke ba ku ba roro: Ishin'iyeye a nkereke buini rueyi rua bere ba yeke mboko u kere u rushuwu rua sabate? ³ Yesu ya ku barara: Ka bua toko bara rini ra kere Davidi, itanga rini ra woko ya ndjara, yanda ndo bana ba war'ando nde; ⁴ ipu nana ra nini ya u kata mbura Ndjambe, ku wosho mampa ma namba mi kini, ya ku dji, ndo ya ku yeke a bane ba war'ando nde, ma wara ande pa ba ngangandjambe bi ma dji ? ⁵ Ndo yaku ba shosho: Muana a moto yiyi Kumu ndjua sabate. ⁶ Rushuwu rueke rua sabate, Yesu ya ku nini u kata sinangongo, ndo a yishiki. Moto moko a ma wara ndo iyata ri barungu ra wara ra womo. ⁷ Ba pundu mikanda ando ba farisayi ba rendeke Yesu, shini ku mono ande yi ruera bereshe moto yono a wara a rowo rua womo rushuwu rua sabate, ishini ba u mono rueyi ru mpundu. ⁸ Kek'ake yande a yebeke manya ma banda, ndo ya ku roro moto yono a wara a iyata womo ande: Katuwa, ndo yembete u wono a ndenge. Ndo ya ku katuwa, ndo ku yembete a nkiti. ⁹ Ndo Yesu ya ku ba roro: Ndake bu wuru mbe ba mayeke mboko, nkiri mua sabate u kere busheke mbe kuapa u kere bube, u wondjoro monyo mbe kuapa u mu ndjake? ¹⁰ Keke, a mana yande ba rende mishi ba bakimi, ya ku ro moto yono: shembere iyata rawu, ya ku ri shembere, ndo iyata rande ri ku karuwu busheke. ¹¹ Kabua sha shi nono ku ba wata, ndo ba ku ya wurushu shini ku yebe runu ru ruere ba kereshe Yesu. ¹² U rushuwu runu, Yesu ya kuende a riki ra nkondjo shini kue rombo Ndjambe, ndo ya ku rombo Ndjambe butuwu bua bu kimi. ¹³ Itanga butuwu a yembuwu bundu, ya ku wuru baweke bande ndo ashoro ishanga a ba pende u ndenge bande, ba yeke ya ru kombo a yasha ande ba tomo: ¹⁴ Simo, yono a yeke ya ru kombo ande Petero; Andre, mua inyande; Jake; Yone; Firipe; Barteremi. ¹⁵ Matayi; Thomas; Jake, muan'a bora Alfe, Simo, yono a nguruku ba ndjua Selote; ¹⁶ Yude, muan'a bora Jake ndo Yudase Isikariyote, yono a buake ntshenge. ¹⁷ Ya ku womono ando banda, ndo ku yembete u iraka ra shishiki, u mbete ya wara yoro ri baweke bande ndo bate beke ba buiki ba bina Yuda dja ikimi, ba Yerushareme, ndo bina kwandja masha ma Tyr ndo ba Sidone. Ba wiyi ishini ku ngoko, ndo ishini ku beruwa u mawara ma bande. ¹⁸ Bana ba tatishiki banda u bora nyumu sha mbidi ba ku beruwu. ¹⁹ Ndo yoro ra rikimi ra shotoko u nkumunu, ishini and bunono bumoko bua make punu u yande ndo bu ba beresheke ba bakimi. ²⁰ Keke Yesu a ntshendere ya mishi a riki baweke bande, ku roro: Bunyaka buinu bana bui ba poto, ishin'ande bukumu bua Ndjambe buiyi a yini! ²¹ Bunyaka buinu bane buiya ndjare norot'ane, ishin'ande buake wara ba wutu! bunyaka buini bana ba nereke norot'ane, ishin'ande buake wara u kata bunyaka! ²² Buake wara u bunyaka, itanga bate yi bu bere ba, itanga ri bu bindjiri ba, ri bu towo ba mishingi, ndo a ngoshoko ba kombo shini ngona-ngono ishini muan'a moto! ²³ Nyak'anana u rushuwu runu ndo buara ba yoro ando n'nyanga, ishin'ande iputu rini rara ra rinene u kata riku; ishin'ande djiyi ipu rini bi shaba a weke ba kereshe ba ngandjambe. ²⁴ Kek'ake, ntanda muini, bina biroko, ishin'ande buiy'ando makitishi ma mbondo mini! ²⁵ Ntanda u buini bane buiyi ba wutu, arini ishin'ande bu ku wara a ndjare! Ntanda u buini bana ba ntsheyeke norot'ane, ishin'ande bu wake wara u mashaya ndo u kata djoshono! ²⁶ Ntanda, itanga bate ba bakimi yi roro banda toto sha shi sheke u wene, ishin'ande djiyi ipu rini bi shaba a weke ba kereshe ba ngandjambe bi manimbi! ²⁷ Kek'ake ndake bu shosho, buini bana bua mpuoko: Bu wond'ana bina ikembe a yini, keresh'ana busheke bate bana bake bu woko bube, ²⁸ Nyakash'ana bana bake bu koko, rombosh'ana ba keresha yini bube Ndjambe. ²⁹ Mbe moto yi boro rukasha a riki ri itama, kara nyeke a yasha rini yi reke. Mbe moto a wosho mapere mawa, a reke wa nkara ya u wosho a yasha kazaka kawa. ³⁰ Yeke yono ndjua nkimi a make irombo, ndo a reke we rombo ikete rawa u bora yono a ma ri wosho a bunono. ³¹ Rueyi runu rua ngondoko wen'ande bate bi ikereshe, ba kereshe a wene ipu ri moko. ³² Mbe bua wondo bane bake bu wondo, mpoto nane mua muishiki buine? Ba kere bube a banda ba meke wondo a banda bana bake ba wondo. ³³ Mbe bua kereshe busheke bane bake bu kereshe busheke, mpoto nane mua muishiki buine? Ba kere bube a banda ba meke kere ipu imoko. ³⁴ Ndo mbe bua shombosho bikete u bate bane ba moko buini djengiyi ande bi karaka bu karasha djindi, mpoto nana mua muishiki buine? Ba kere bube a banda ba shombosho bate ba babe,ishin'ande bi kara ba karasha dji ipu ri moko. ³⁵ Kek'ake bu wond'ana bina ikembe a yini, ker'anana meyi mamasheke, ndo bu shombosho u bere kara boko djengiyi ande bi kara bu karashe. Ndo iputu rini ri wara ra rinene, ndo bu wara bana ba bora Yono ndjua ndembe a riki, ishin'ande yi ntsheke shini bana ba mereke we nkarasha maranga ndo shini bate ba babe. ³⁶ War'ana a irerere ngo ishini yi yande muin'irerere. ³⁷ A reke bua rumbushu, ndo ko bi bu rumbushu bi; A reke bua buishi bate makambu bi; ndo ko bi bu buishi makambu bi; Rimbish'ana ndo bi bu ri bu rimbishi. ³⁸ Yek'ana, ndo bi buye buyeke: Bi tu tururu u kata ibombo ri mapere mawa ruere rua rusheke, rua windjiwi, rua nyinyi, ndo rua shamba mayororo; ishin'ande bi buye buyeriye ando ruere runu rua nyeriyeke buini a rundu. ³⁹ Ndo ya ku ba bokosho a yasha nkondo munu: Moriyi a mishi yi ruera u shende moto ndjueke ndjua boriyi mishi? Bapa buaka penda bande u kata ibembe? ⁴⁰ Ngweke she a reke murongosho bi; kek'ake ngueke ndjua nkimi yono ndjua wekeshe bande busheke yi ruere wara ngo murongosho muande. ⁴¹ Mbuenye a monoko wene itete ra rikeke rini ri u rishi ra muan'a nyowo, ndo ake ka wa monoko nte munu muiyi u kata rishi rawu? ⁴² Mbe kuapa, mbuenye yi ruere wene roro muan'a nyowo: Muan'a mayi, Ndekere miyi nda teye itete rini ra rikeke riyi u kata rishi rawu,we yono wa mereke mono nte munu muiyi u kata rini yi rawu? Muina masha ma pende,teye bukoto nte u rishi rawa, ndo keke u mo mono ipu ra risheke ri teye itete ra rikeke rini riyi u kata rishi ra muan'a nyowo. ⁴³ Nte mua musheke ka mua meke tuku ndombo sha shibe, mbe ki nte mua mube ka mua meke tuku ndombo sha shisheke. ⁴⁴ Ishini nte mua mukimi bameke mu yebe ku ndombo sha mundu. Ka ba meke kakara ndombo sha fingi a riki ri minambe nyi mishueye ndo ka ba meke kunu ndombo sha raisins a riki ra mite nyi mishueye. ⁴⁵ Moto ndjua ntsheke, a meke punushu bikete dja bisheke u kombo dja isheke ndja nteme muanda, ndo moto ndjua me a meke punushu bikete dja bibe u komb'ande ndja yibe; shin'ande ku buiki bua meyi u nteme numbu muanda a totoko mundu. ⁴⁶ Ishini iyeye a mpuruku buini " Kumu, Kumu"! Ndo ka bua nkereke meyi mane ma noko miyi ? ⁴⁷ Ndi bushu bushundju ipu ra moto ndjua nkimi ndjua miki u miyi, a ngoko meyi mama, ndo ake a make ma kere. ⁴⁸ A mpuanyaka moto yono, ndjua shoro mburu, ya ku timi, timi shere ngindi, ndo ya ku nyaya matapara ma mburu a riki ri imanya. Masha ku yoro, ndo mingwishi nyi kuiyi a pungu shi kukwishi a riki ra mburu yini, u bere yi nyinyi, ishin'ande bi yi shoro busheke. ⁴⁹ Kek'ake yono ndjua ngoko, ndo a meke kere, yi ngo moto yono ndjua shoro mburu a riki ra manu, u bere wara matapara ma mburu. Mingwishi nyi ku kwishi a riki ra yindi: Mun'anana yi ku buaka, ndo ma wonyiyi ma mburu yini ma wara ma manene.