¹ Ngo Yesu awara yanda ngama a iribi ra Genezarete, ndo ake yoro ra bate ra wete ri were ngam'ande shini ku woko rueyi rua Ndjambe, ² ya ku mono u kuandja iribi mate ma manene ma pende, u mana ma punu ba djaka bashue shini ku kuishi manda ma bande. ³ ya ku nini u kata buate bu moko bunu bua wara bua bora Simo, ndo ku mondoro ande yi pambuwu kakeke tamba a mana. A mbishi ya ku shikimi u kata buate ndo a yishiki yoro ra bate. ⁴ Itanga ra rekere yande u toto, ya ku roro Simo ande: Tindi u ndenga masha, ndo bok' anana manda mini shini ku wate bashue. ⁵ Simo ya ku marara: Muyishi, tshua kere ngunu butuwu bua bu kimi ikini ku wata mbe ikete; kek'ake u rutoto ruawa ndi bo boko buanda. ⁶ A bu boko yande, ba ku wata bashue ba buiki, ndo buanda bua banda bu ku pakuwu. ⁷ Ba ku wuru bendje ba banda bana ba wara u kata buate bueke bua wuiyi u ba washe. Ba ku wiyi ndo ba ku yorosho mata ma pende, u ipu rande ma ku tapa u ya kiti. ⁸ Simo petero a mono yande ngono, ya ku buaka u mamango ma bora Yesu, ndo ku roro: Kumu kobuwa a kor'ame, ishin'ande ndiyi nkere a bube. ⁹ Ishin'ande butete bua wara bua nguate, yande ndo bana ba bakimi ba wara ando nde, ishini buiki bu bashue ba wata bande. ¹⁰ Dja wara ipu ri moko u bora Jake aki Yone, bana ba bora Zebedayi, bendje ba bora Simo. Keke Yesu ku roro Simo: A reke wa woko butete, u tapa a rini u wara nyombo bate. ¹¹ Ndo a nkarasha ba mate a mbongo, ba ku rekere dja bikimi, ndo ba kue naba. ¹² Itanga Yesu a wara ya u kata bora bu moko bua bunene, ndo rende, moto moko a wara a buwara bua bara, a mono yande Yesu, ya ku buaka mbombo a shini bosho buande, ndo ya ku nombo ngowo: Kumu, mbe wa bara weshe, wa nguara ruere ndjembeshe. ¹³ Yesu ya ku shembere iyata, ku nkumunu, ndo ku roro: Nda ru weshe, yembuwe. Mun'anana bara yi ku shiri yande. ¹⁴ A mbishi yini ya ku nor'ande a reke wa borosho moto ntiki. Kek'ake u ya monosho u bora ngangandjambe, ndo nyeke namba shini iyembeshe rawa u ipu runu rua pundu Mose, ishin'ande muara ngo indje ra nondo mu iyembuwu rawa ubora bande. ¹⁵ Rushanga ruanda rua muamuwuka buika buiki, ndo bate ba wiki u djoro shini ku ngoko ndo shini ku beruwe u mawara ma bande. ¹⁶ Ndo yande, ya kuende u kata ndenge shi bushobo, ndo a romboko Ndjambe. ¹⁷ Ndja kerm'ande butuwu bueke Yesu a yishiki. Ba farisayi ndo ba yebe mikendje ba wara ba ntshikimi anana, ba wi punu u mara ma makimi mana ma Ngarere, ma Yudayi aki ma Yerushareme; ndo bunono bua Kumu bua monoyoko u maberuwu. ¹⁸ Ndo rende, bate ba totoro a riki ri ishasha moto yono a wara ndjua rembe mikoro, ba shotoko ipu ra nishi ndo u ntshiki u bosho buande. ¹⁹ Ngo a bereke ba yebe ande mbete nana yi ruere ba nishi, shini yoro ra bate, ba kubanda a riki ra shamba mburu, ndo ba ku ntshuerere u itondoro ando ishasha rande, u ndenge a yoro bate u bosho bua bora Yesu. ²⁰ A mono yande maweshere ma bande, Yesu ku roro: Nungu, mabe mawa ba yi rimbishi a mande. ²¹ Keke ba pundu mikanda ndo ba farisayi ba tapa u wengiyi, ndo u roro: Moto na yono a ntowoko Ndjambe? Nana yi rene rimbishi bate bube, mbe dja bere wara Ndjambe ya mene? ²² Yesu, a yebe yande manya ma banda, ku wosho ru toto ndo ku ba roro: Manya ma nana miyi a yini u kata miteme? ²³ Iyeye ri robo wiyi boro u roro: Mandimbi mawa ba yi rimbishi ma, mbe aki ku roro: wene katuwa, ndo boko pare? ²⁴ Ishin'ande bu yebe ande muana moto yiyi a bunono ani shini bu rimbishi mandimbi. Ndake iroro ande a roro yande a yono muini mikoro nya rembe, katuwa, wosho ishasha rawa, ndo yaka ra mbur'awa. ²⁵ Ndo, mun'anana, ya ku katuwu u mishi ma banda, ku wosho ishasha rini ra wara ya a ntshondjo, ndo ya kuende ra mbur'ande ya ye tonosho Ndjambe. ²⁶ Ba bakimi ba wara bi keme, ndo ba tonoshoko Ndjambe; ba yoro a butete, ba rok'ande: Tshua mono a rini meyi ma bere biti toko mono. ²⁷ A mbishi yini, Yesu ku punu, ndo ya ku mono mputushu a namba, rukombo ruande Lewiyi, a ntshikimi u iraka ra putushu namba. Ya ku noro: Yi ndaba. ²⁸ Ndo, ku rekere dja bikimi, ya ku katuwa, ndo ya kue naba. ²⁹ Ndo Lewiyi a nkereshe fete dja inene u kata mbur'ande, ndo ba rambasha a namba ba buiki ndo bate beke ba wara u mese ando bande. ³⁰ Ba farisayi ndo ba pundu mikanda ba weteke shuere shuere, ndo ba roko ba weke bande: Ishini yeyi bua nyiki ndo bua nyuku ando ba putushu a namba ndo ba kere bube? ³¹ Yesu, ku wosho rutoto, ya ku baroro: Kuapa bana biy'ando bunono bi ya rueye a munganga, kek'ake pa bande bana biy'ando mawara. ³² Ka nda toko wiyi u wuru bina rongo, kek' ishini ba kere a bube u barara miteme nya bande ³³ Ba ku ntshosho: Baweke ba bora Yone, ngono bana bi ba Farisayi, ba meke kini bidjere shoko sha buiki, ndo ba meke rombo Ndjambe, ban'ake yi bawa ba miki ndjiki ndo ba miki nyuku. ³⁴ Ndo Yesu ku babara: Bua nguara ruere kiniyi bi ndjere ba mbayi ba bora muina ibara, itanga ya muina ibara a nguara ando bande? ³⁵ Kek'ake matuwu mi wiki wiyi mana mi teye banda muina ibara, keke u matuwu mana bi ki kini bidjere. ³⁶ Ya ku kara ba bokosho a yasha nkondo: Kua moto a meke batara ipere ra yembe itenye shini ku ri bamba u ipere ra wara; shin' ande, a ma karara ipere ra yembe ndo yaya ra matara yanda ngo ra wokosho ando ipere ra wara. ³⁷ Ndo kua moto a meke shiki mana ma nkepe u kata mbende sha wara; keke mana ma nkepe mi ru rupuru mbende sha wara, mi tshanuwu, ndo mbende shi boriyi; ³⁸ Kek'aki bu shiki mana ma nkepe u kata mbende sha yembe. ³⁹ Ndo moto, a mbishi u mana nyu mana ma wara, ko a kara weshe ma yembe, ishin'anokande: Ma wara mi busheke.