¹ Ba bakimi ba ku katuwa, ndo bakue rata Yesu u bosho bua bora Pirate. ² Ba ku tapa umpundu, uror'ande:"Tshua tomono moto yono itindiyi bu biri buiti u mapareshe, u ba kara uputu namba mua bora Sezare, ndo yande iyaroro yand'amene Kristu, Kumu. ³ Pirata ku moko ikongo u roro: "Wene wiyi kumu ndjua bina Yude?" Yesu ku marar'ande: "Wene wa ru roro." ⁴ Pirate ku shosho bawotara bi ba ku banganga ndo yoro ra bate ande : "Ka ra monoko rueyi u kata moto yono." ⁵ Kek'ake, ba ku shuku anono, ndo ba ku roro: "A paresheke bate, u yiishi u mbete sha shikimi sha Yude, utapa u Garere, u iraka ratapa yande, inamana ku wenye." ⁶ Itanga a woko Pirate bitoto rueyi runu, yande ku wuru mbe moto yono yiyi muina Garere, ⁷ ndo a yebe yande awara ku shini bukumu bua bora Herode, ya ku ntomo u bora Herode, yono awara a yanda u Yerusareme u matuwu mana. ⁸ Itanga Herode amono yande Yesu, awara a bu nyaka bua buiki, ishini utapa u wara, awara nyingi ndja u mmono, ishini meyi ma woko yande ariki rande, ndo awara yi wengiyi ummono ikere ndambe meyi mankama. ⁹ Yande ku moko makongo ma buiki, kek'ake Yesu katoko marara a rueyi rumoko. ¹⁰ Ba wotara bi ba kubanganga ndo ba pundu mikanda ba war'anana, ndo ba npunduku a bunono. ¹¹ Herode, ando ba bak'ande, ba meshereke ndo, ambishi amana banda ntsheye ndo nneye mapere makenye-kenye, ba ku nkarashe u bora Pirate. ¹² Herode ndo Pirate ba ku buaka ba mbaya munu rushuwu runu, bana bawara bini ikembe bukoto. ¹³ Pirata ya ku kokoyi bawotara bi baku banganga, ba kumu ndo bate, ¹⁴ ku roro: "Bua mindasha moto yono, ngo ntomo bate u ma parashe. Ndo rend'anana nda mmoko ikongo u mishi mini, ndo she ndamono a rueyi u moto yono u mana ma ku buini npundu. ¹⁵ Herode a yande she yi rumono ishini a maya tshu karash'ande, ndo rende, moto yono she kere rueyi rua nyemene iwa. ¹⁶ Keke ndi nenekeraki, ambishi u mare mmoro koro. ¹⁷ U iyoro ra rikimi Pirate awar'ande yi ba rekeshe muini buroko moko. ¹⁸ Ba ku wabuwu ba bakimi shoko imoko: Djaka moto yono, ndo tshu rekeshe Barabasa. ¹⁹ Moto yono ndjua shiki bande u buroko shini matumbu ukata boro bunene, ndo shini ma djara ma bate. ²⁰ Pirate ku kara ba shosho shoko ndja mpende, u buanya bu rekere Yesu. ²¹ Ndo ba ku wabuwa:" Nyak'anana u nte muawesheke, nyak'anana u nte mua wesheshe." ²² Ya ku ba shosho shok'a ntshata: Bube nana bua kere yande? She ramono rueyi ukat'ande rua nyemen'ande binyaka. Ndi nenekere amane miyi u mmoro koro. ²³ Kek'ake banda ku shuku wabuwu anono, u romb'ande binyaka u nte mua wesheshe. Ndo ma wabuwu ma banda ma kureke bunono. ²⁴ Pirate ya ku batara rueyi ipu ra nnombe bande nde ru kereme. ²⁵ Ya ku rekere yono awara a shiki bande u buroko shini matumbu ndo ma ndjara ma bate, yono aromboko bande. Ndo ku ba yeke Yesu ipu ri ruwondo rua bande. ²⁶ Ngo a weke bande nata, ba ku tashara a moto moko Simo ndjua Sirene, a wuku karawa u mangondo, ndo ku nyeke buriti bua nte mua wesheshe, shini ku mu totoro uraba Yesu. ²⁷ A wara bi naba ambishi u bora bate ba buiki ndo bawata bana bawiki ya kumu miteme ndo ba wuku rere. ²⁸ Yesu ku barama u mbete ya wara bande, ndo ku roro: "Bana bi bawata ba Yerusareme, areke bua ndere miyi, kek'ake rer'anana shini buini ndo bana bini. ²⁹ Ishini rende, matuwu miki wiyi iroro bande:" Bu nyaka wu bikutu, bu nyaka u makundu mana ma bere boto, ndo mabere mana ma bere nyomosho. ³⁰ Keke bitapa u roro mikondj'ande: "Tshu buer'anana ndo mikondjo nya mikeke: Tshu kukuy'anana." ³¹ Ishini, mbe djara ba nkere meyi mana u nte mua masha, dji waraki mbuenye u nte mua womo?" ³² Ba ku rata barungu beke ba pende ba monosho a bate ndjoro shini ku ba djaka iraka imoko ndo Yesu. ³³ Itanga ra toro bande u iraka ra wuruku bande: "Yoro ra ntshu", ba ku nyaka u nono u nte mua wesheshe ngono a ba monoshe a bate ndjoro bapende, moko u rowo ru barungu, yi ndjueke u rowo ru bawata. ³⁴ Yesu a rok'ande: "Tata ba rimbishi, ishini kaba nyebeke runu rua nkereke banda." Ba ku yakapasha mapere manda u boko mubere. ³⁵ Bate ba wara banyembet'anana ba rendeke keke ba kumu ba ntsheyeke u roro: "A wondjoro bate beke; yi ya wondjoro yand'amene, mbe yar'ande yiyi Kristu, ntshora a bora Ndjambe!" ³⁶ Mayor'amanda ma tsheyeke, ku karuwu a ngama ndo u ro nyushu vinegre, ³⁷ baroko: "Mbe war'ande wiyi kumu ndjua bina Yude, ya wondjoro wen'amene!" ³⁸ Dja wara u riki ra ntshu muanda ipunduru rini: "Yono yiyi kumu ndjua bina Yude." ³⁹ Moko ndjua mmonoshe bante ndjoro, yono a wara ariki ra nte mua wesheshe ku ntowo u nor'ande: "Wakapa Kristu?Ya wondjoro wen'amene ndo tshu wondjor'abiti." ⁴⁰ Kek'ake indjueke ku nkabashe ndo kunor'ande: "Kawa ntiniki Ndjambe, wene wiyi awene u ntanda munu mu moko? ⁴¹ Shini biti, ndjiyi ku mboko, ishini tshua ngoshoko runu rua nyemene a meye miti ma mabe. Kek'ake moto yono ka tokoro kere a rueye rua rube." ⁴² Ndo yandaki ku roro: "Yesu, wa puibuwu amiyi itanga ri wiyi wene u bukumu buawa." ⁴³ Yesu ya ku marar'ande: "Ndake yi shosho aru u bara-bara, arini wake wara ando mi ukata paradi." ⁴⁴ Dja waraki ngama a itanga ra ntshamuna ndo muimini ku wara a shin'amana ndja ikimi, inamana itanga ra ribua. ⁴⁵ Itanga ri ku buaka muimini, ndo mapere ma mburu ikini ndja Ndjambe maku pakuwu a kakata. ⁴⁶ Yesu ku boko noro a nono-nono: "Tata nda nkaresheka monyo muame u djara djawu. Ndo amana yanda punushu toto shini ku batuwu monyo. ⁴⁷ Kumu mayoro rukama, amono yande djini djakereme ku tonosho Ndjambe, ndo ya ku ror'ande: "U bara moto yono awara muina rongo." ⁴⁸ Ndo bate ba bakimi bana bawende u mono, ambishi amana banda umono meyi mana makereme, ba ku karuwu, wu ya boro nteme bi rere. ⁴⁹ Bana ba bakimi ba yebe Yesu, ndo bawata bana ba u ntshiki utapa u Garere, ba wara ba yembete tamba ndo ba rendeke meye mana ma keremeke. ⁵⁰ Rende, nnongo awara u rukombo rua Yosefe moto ndjua ntsheke ndo ndjua rongo, ⁵¹ yono a bere weshe runu rua batara banda ndo u bikerere dja bate beke; awara muina Arimate, u boro bunene bua bina Yude, ndo awara ibaka bukumu bua Ndjambe. ⁵² Moto yono kuende u mbete ya wara Pirate ndo ku rombo rutoko rua bora Yesu. ⁵³ Ya ku ru tshuerere, ku ruringi mapere, ndo ku rushiki u kata ngiri ndja a timi bande ukata imanya ra rinene u mbete ya bere banda toko reye moto. ⁵⁴ Dja wara rushuwu ru ya roriyi, ndo sabate ya wara yi ro tapa. ⁵⁵ Bawata bana ba wupunu u Garere ando Yesu ba kuende we shiki Yosefe, ba ku mono ibandja ndo ipu rawara bande bireyi rutoko rua bora Yesu, ⁵⁶ ndo a karuwu bande, ba ku roriyi aramata ndo manashe. Keke ba ku kite rushuwu rua sabate ipu rawara nkendje.