¹ Iyoro ra mampa mi bere wiyi a levire, ra nguruku bande Paka, ra karuwu a ngama. ² Bawotara bi ba kubanganga ndo ba pundu mikanda bashotoko mapu ba u djaka Yesu, kek'ake ba tiniki bate. ³ Satana ya ku nini u kata Yudasa iskariote, m'moko ndjua ishanga a bapende. ⁴ Ya kuende u wokosho ando bawotara bi ba kubanganga ndo bakumu bi ba baka, a riki ri ipu ri ya bayeke Yesu. ⁵ Ba ku nyake ndo ba ku wokoshe u nyeke puaranga. ⁶ Ya ku weshe ambishi a tapa ushoto itanga rayemene ishini yande u ba yeke Yesu u bushuama bua bate. ⁷ Butuwu bua mampa mabere shiki levire bu ku yemene, u itanga rara ba djaka muana pundu shini Paka. ⁸ Yesu ya ku tomo Petero ndo Yone, ya ku ba shosho: Yaka nana bu tshu rorosho bidjere dja Paka shini biti udja. ⁹ Ba ku ntshosho wa ngueshe shini biti we biroriyi kueyi? ¹⁰ Yaku ba barara : Wok'anana itanga rinini buini u bora bua bunene, bu momono moto a ntotoro mbenda masha bunaba anana u mburu inini yande. ¹¹ Ndo bu shosho kuma mburu: Murongosho amak'iroro: itenye ra mburu rikueyi ridji miyi bidjere dja Paka ndo baweke bama. ¹² Ibushu -bushundju itenye ra mburu ra rinene u riki ba mana ri roroyo. Buende u nonon u roriyi. ¹³ Ba kuende ba kumono bikete puara yi ba shosho yande, ndo ba ku roriyi bidjere dja Paka. ¹⁴ Itanga a yemene rindi, ya ku shimi u meshe ando batomo. ¹⁵ Ya ku baroro: Nda wondo buiki udji bidjere djini dja Paka ando yini u bosho mi mmono ntanda. ¹⁶ Ishini, ndake bu shosho a rundu, ndi rene kara bidji bi inamane iyemene djindi u bukumu bua Ndjambe. ¹⁷ Ambishi, Yesu ya ku wosho nteke ndo a karesha yande maranga, ya ku roro: Wosh'anana rini ndo ya kapash'anana; ¹⁸ ishini, ndake bu shosho, kori shekara nyo imomo ra vinyi u tapa a rini, inamana iwiyi bukumu bua Ndjambe. ¹⁹ Ambishi, ya ku wosho diampa, ndo a karasha maranga, ya ku ripeshe ndo ku ba yeke u roro: "Runu ruiyi rutoko ruama runu rua yeke bande shini buini. Kerana runu ngowo shini buini u kaneshe miyi." ²⁰ Ipu rimoko, a mana banda udja, ya ku wosho nteke ya ku roro: "Nteke munu muiyi nkondo mua yembe u makere mama mana ma shopo shini buini." ²¹ Kek'ake rende, yono a nkapaka yiyi ando me u meshe mana. ²² Ishini Muana moto yeke wende puara dja batara banda. Kek'ake ntanda ubora moto yono ameke nkapa. ²³ Ndo ba ku tapa u ya wururu banda-banda nana yono ukata ndenge a bande yi ruere kere rueyi runu. ²⁴ Dji ku kereme ayasha mananashe u ndenga banda, nana iyiyi ndjua nene. ²⁵ Yesu ku ba shosho: Bakumu bi mabiri baka maketere, ndo bana biyi a bukumu ariki ra manda ba nguesheke bi ba wuru bakereshe busheke. ²⁶ Kek'ake ko dja shewara ipu rimoko shini buini. Dji ki nde yono yiyi nene u ndenge a yini yande yara ngo muana ndjua nkeke u reke. Ndo yono yi kumu u ndenga yini iwara muina ngunu. ²⁷ Keke nana yiyi ndjua nene: Yo yono yi u meshe mbe yande yono a ntshiki bidjere? Ndjapa wara yono antshikimi u meshe? Kek'aki ndiyi u ndenga ini ngo muina ngunu. ²⁸ Kek'ake buini buiyi bande bana ba mambat'ando mi u ndjoro shama. ²⁹ Irake rini ndake bu yeke a miyi bukumu, ipu Tata yono indjuama apeke yande bukumu. ³⁰ Ishin'ande buini bu dja ndo bu nyo u meshe mi bukumu buama. Ndo buini u shimi ariki ra nguasha shi bukumu u rumbushu marondji ishanga a mapende ma Isarere. ³¹ Simo, Simo, rende, Satana ama yi rombo u ipete ishini yande u shambishe u ntshowo ngo ble ³² Kek'ake miyi nda yi rombosho Ndjambe ishin'ande maweshere mawa areke ma buaka bi. Itanga ri karewu wene u miyi, windjiri baana ba nyowo. ³³ Petero ya ku noro, Kumu, ndiyi ngama wend'ando wa u mburu buroko ndo u iwa. ³⁴ Yesu ku noro, Petero: Ndak'ishosho, koko yapa she beke arini wene ubere mbere shoko ishat'ande kawa ntsheke ndjebe. ³⁵ Ya ku ba shosho: Itanga ri bu tomo miyi ubere wara ndo puaranga, ubere wara ndo kombo ndo ubere wara a poko shapara, bua mashoto ikete? Ba ku barara: Kuapa ikete. ³⁶ Ndo ya ku ba roro: Kek'ake ani ngowo, yono yiya ndo puaranga yi wosho ndo yono yiya a kombo yi iwosho a yindi. Ndo yono ibere wiyi a kueshe ikapa mapere mande ndo yi shombo imoko. ³⁷ Ishini ndake bushosho a rundu, dji nde runu ruapundu banda areke rama ruyemene: Ba ku ngosho u nongo mua nkere meyi ma mabe. Ndo runaki rua pundu bande rua ndeke miyi rua yemene ³⁸ Ba ku roro: Kumu mono kueshe ipende. Ndo ya ku ba roro: Rua yemene. ³⁹ Ambishi Yesu ku punu ya kuende puara kerer'ande u nkondjo mu miti nyi ba Olive, ndo baweke bande ba ku naba. ⁴⁰ Itanga a toro yanda u iraka rini, ya ku ba roro: Romb'anana Ndjambe ishin'ande areke bua buaka u ma kikiri. ⁴¹ Ambishi ya kuende tamb'ando bande wu ruere rua raya imanya ndo ya ku boro mamango ya kurombo Ndjambe. ⁴² Ku roro: Tata, mbe wa weshe, teye nteke munu u miyi. A reke ndjaraki u ruwondo ruama, kek'ake ruwondo ruawa ru kereme. ⁴³ Keke muanjero ya ku punu u riki shini ku nangasha nteme. ⁴⁴ A yoro yanda a irere ra buiki, ku rombo Ndjambe ureke ndo itutu rande ku buaka ngo matobo ma manene mi makere ma shopoko a shini. ⁴⁵ A katuwa yande u marombo mande, ya ku karuwu u mbete ya wara baweke, ndo atoba mmono ba ntshondjo ishini mabondomo ma banda. ⁴⁶ Ndo ya ku bawuru: Bua ntshondjoko ishini yeye? Katuw'anana ndo romb'anana, ishin'ande kabua-buaka u makikiri. ⁴⁷ Itanga rakaka yande utoto, mono yoro ra bate riku punu ando Yudasa, moko ndjua ishanga ndo bapende awiki barata. Ya ku karuwa ngama Yesu ishini kutu numbu. ⁴⁸ Ndo Yesu ku noro: Yudasa djiyi kutu moto numbu anoko wene kapa Muana moto! ⁴⁹ Bana ba wara ando Yesu ba kumono runu ruashambaka, ba kuroro: Kumu, tshu u ba boro kueshe? ⁵⁰ Ndo moko ukata banda ya ku boro muina ngunu ndjua bora ngotara kubanganga, ndo ya ku matara itu ra rowo ru barungu ⁵¹ Yesu ya kuroro: Bua shambasha, reker'anana! Ndo ya ku nkumunu itu rande ndo ya ku mereshe. ⁵² Yesu ya ku kara roro bawotara bi bakubanganga, u bakumu ba tempero ndo bawotara bana ba wiyi ambur'ande: Bua miki ando kueshe ndo mite ngo ambura nkere a meyi ma mabe? ⁵³ Itanga ra warake miyi matuwu ma makimi ando yini u tempero ka buatoko mboko djara. Kek'ake djiyi itanga rini ane ndo rini ri manono ma muimini. ⁵⁴ Ba ku nguata, ba kuend'ando nde ndo ba kue nata ukata mbura a bora ngotara bakubanganga. Petero awiki naba tamba. ⁵⁵ Amana banda uteme tiyi undenge ruanda, ndo ashimi banda iraka rimoko, Petero ya ku shimi u ndenga banda. ⁵⁶ Muina ngunu ndjua ngata ya ku mmono ishini a shikimi yande u muere mua tiyi, ku nende mishi ndo ya kuroro: Moto yono a yanda ama war'ando nde. ⁵⁷ Kek'ake Petero ya kutono ku roro: Ngata, kara ntsheke nyebe. ⁵⁸ Ambishi itanga ra rikeke, nungu ndjueke ya ku mmono ndo ya kuroro: "Awene wiyi ayasha u moko ndjua bande."Kek'ake Petero ya ku roro: Nungu, kuapa miyi. ⁵⁹ Ashamba ruere itanga imoke, indjueke ya ku windjire wu roro:" Djiyi bara-bara, ayasha nungu yono a ma war'ando bande ishini yiyi muina Garere." ⁶⁰ Kek'ake Petero ya ku barara: "Nungu, kanda ntsheke yebe rini ra ntotoko wene." Ndo mun'anana itanga ra kaka ya toto, koko ku beke. ⁶¹ Kumu Yesu, a barama yande, ku rende Petero. Keke Petero ya ku wibuwu rutoto rua noro Kumu: "Bukoto koko ubere beke arini, wumbe-mbere shoko ishate." ⁶² Ndo a punu yanda, ya ku rere buika-buika ⁶³ Barungu bana ba shuku Yesu ba ntsheyeke ndo ba mmoro. ⁶⁴ Ndo a niti bande bosho, ba ku moko ikongo uroro: "Shakara! Nana amayiboro?" ⁶⁵ Ba ku roro bikete idjeke dja buiki u ntowo. ⁶⁶ Itanga ra yembuwu butuwu, irongo ri ba wotara ba bate, ba wotora bi ba kubanganga ndo bapundu mikanda ba ku kokomo. Ba kuerata Yesu u ikindi ra bande ri makamb ra bina Yude. ⁶⁷ Ndo ba roko: "Mbe war'ande wene wiyi Kristu tshu shosho."Ndo ya ku ba barara: "Mbe ndi bu shosho a rundu, buapa she ru weshe bi." ⁶⁸ Ndo mbe ndi bu boko ikongo, buapa she mbarara bi. ⁶⁹ Wutapa arini, Muana moto yara ndjua shikimi u rowo ru barungu ru bunono bua Ndjambe. ⁷⁰ Ba ku roro ba bakimi: "Wene wiyaki muana bora Ndjambe?" Ndo ya ku ba barara: "Bua roro, miyi ndiyi yande." ⁷¹ Keke ba ku roro: Tshua nkaka shoto buteme bua yeye? Ishini tshua ngoko bitamene u numbu muande.