¹ Yesu, a totoro yande mishi, ya ku mono bini biroko ba bi shiki nyambe nya banda u kata yawu. ² Ya ku mono a yasha poto a ngate moko a wushu nungu, ya yi shiki a yanda tshu puaranga tshu pende. ³ Ndo ya ku roro: U bara-bara, ndake bu shosh'ande: poto a ngata yono a wushu nungu a ma shiki u reke ibeke bana ba bakimi; ⁴ Ishin'ande bane ngowo ba bakimi ba neye mipoto nya banda nya rika-riki u kata yawu, kek'ake ngata yono ndjua wushu nungu, a neye dja bikimi djini djande dja ngwara shini monyo muanda. ⁵ Ngo puara ibeke a totoko ba rueyi ru mamanya ma masheke ndo nyamba djini dja kereke busheke bua Tempero, Yesu ku roro: ⁶ Matuwu mi wikiwiyi mana, u djini dja monoko buini, kua imanya ri karashara a riki ri imanya ri bere ba bongoro. ⁷ Ba ku nguru: Murongosho, meyi mane ngowo mi kereme itanga nani?, Ndo u yendje nani ri yebe biti ande meye mana miki wiye? ⁸ Yesu ku barara: Bua peny'ana ka bi bu rimbi. Ishin'ande ba buiki bi wiki wiyi u rukombo ruama, bi roko: Miyi yono, ndi Kristu, ndo itanga ra karuwu a ngama. A reke bu ba rabe bi. ⁹ Itanga ri woko buini ba bi toto rueyi ru matumbu ndo rua ndururu, a reke bua riti bi, ishin'ande dji romb'ande bukoto meyi mana mi she wiyi. Kek'ake djapa she waraki ma manashe bi. ¹⁰ Keke ya ku ba shosho: "Bubiri bu nanashe bubiri bueke, ndo bukumu bu nanashe bukumu bueke. ¹¹ Dji wake wara manyinyini ma shini ma manene, ndo u maraka ma buiki; djungu ndo ndjara; dji wake wara a meyi mi butete, ndo djendje dja binene u kata riki. ¹² Kek'ake, u bosho bua meyi ma makimi maana, bi bu bo buko djare, bi bu mo bumonosho ndjoro, bi bu re bureye u ba synagongo, bi bu bo buboko u ma mburu mi buroko, biweke bu shende u bosho bu ba kumu ndo u bosho bu ba gouvene, ishini rukombo ruama. ¹³ Dji buwi bu wiri shini buini u wara ba rondoro. ¹⁴ Keke a reke bua te wengiyi a bosho u miteme nyin'ande tshu ya shuwuru mbuenye. ¹⁵ ishin'ande miyi ndi buye bu yeke toto ndo buanya bunu bua nde bini ikembe bini ba bakimi ko ba she bere mbe ku shiki nyane bi. ¹⁶ Kek'ake bi bure bureye a yasha mbe ku bora ba bot'ayini, mbe ku bora ba binyini, mbe ku bora bina ngam'ayini ndo bora ba mbayi shini, ndo bi dja djaka ba buiki u ndeng'ayini. ¹⁷ Bi buwo bu woko pishi u bora bate ba bakimi, ishini rukombo ruama. ¹⁸ Kek'ake kua rupuiyi rua ntshu muawa ru moko ru rimi bi. ¹⁹ U ma bambata mini, buwo wondjoro nyonyo nyini. ²⁰ Itanga ri mono buini Yerushareme bayi ringi u bora tumu shi mayoro, kek'anana bu yeb'ande ma bongoro ma yindi ma karuwu ngama. ²¹ Keke, bana bi wara u Yudaya, bi we tini u mikondjo, bana bi wara u ndenge a boro bunene bua Yerushareme bi punu, ndo bane bi wara u mara manenge a reke bi nini u kata boro bi. ²² Ishin'ande dji wara matuwu mi manish'ikembe, shini mayemeshe ma meyi ma makimi mane ma pundu bande. ²³ Ntanda u bawata bana bi wara a makundu ndo bana bi wara bi nyomosho baana u matuwu mana! Ishin'ande dji wake wara ndjoro sha bwiki u kata shini, ndo kabua a mbura bate bana. ²⁴ Bi bua buaka u shini manga ma kweshe, bi weke ba shende ri bu showo u ndenge mabiri ma makimi ndo Yerushareme bi yinye yinyeke a para u bora mabiri inamana matanga mi mabiri iyemene manda. ²⁵ Djendje dji wake wara u kata itanga, u kata ngondo ndo u kata nyoto. Ndo a riki ra shina mana, ndjoro shi wake wara undenge mabiri mana mi bereke yebe runu ru kere u iweye ri iribi ndo mapakara ma masha. ²⁶ Bate bi wuwa u butete bu baka meyi mana mi wiyi a riki ra shini mana. Ishin'ande manono ma riki mi nyinyi. ²⁷ Keke, bi mo mono Muana moto ya yi punu a riki ri mabende ando bunono ndo rutono rua runene. ²⁸ Itanga meyi mana yi tapa manda u wiyi, ya shember'anana ndo totor'ana mitshu nyini, ishin'ande mawondjowo mini ma karuwu a ngama. ²⁹ Yesu ya ku ba bokosho nkondo moko: Rend'ana nti mua figi ndo miti nya mikimi; ³⁰ munu a pushuwuku nyindi, bu yebe buina mene a rendeke buini, muanya mua mburu mua karuwu a ngama. ³¹ Ipu ri moko, ayashe buini itanga ri mono buini bikete djini djawiyi, bu yeb'ande bukumu bua Ndjambe bua karuwu a ngama. ³² U bara-bara ndake bu shosho a rundu ande, kumbu yini ko yishe shamb'akapiti meyi mane ma makimi u bere wiyi. ³³ Riki ndo shini dji sha shamba, kek'ake toto shama ko she shamb'akapiti. ³⁴ Bu peny'anana buin'amene, u butete bua nde miteme nyini a reke nya yoro a ma shambasha mi madjiri ndo manyuru, ndo nyingi sha meye ma shini a mana, ndo ake rushuwu runu areke ruiyi a riki rini ipushumu; ³⁵ ngo irongo. Ishin'ande ru wiyi a riki ra bakimi bana ba meke wara a shini a mana ndja ikimi. ³⁶ War'anake bushungu matanga ma makimi ndo bu romboko Ndjambe shin'ande buara a bunono bu reke bikete dja bikimi djini dji wiyi, ndo bu monyiyi ba yembete u bosho bua Muana moto. ³⁷ U mua muanya, Yesu a weke yishi ku kata tempero ndo butuwu a weke tshondjo ku nkondjo mua wuruku bande nkondjo mu mi ti nyi ba Olive. ³⁸ Ndo bate ba bakimi, ba wiki ngeshe butuwu u mbet'ande u kata tempero shini ku ngoko.