¹ Rushuwu ru bukoto bu rubingi ru bayude, ba kuende ri ibandja ngebutuwu mua reke, ba ku totoro aromate sha roroyi bande. ² Ba ku tomon'ande imanya rawara bamane riburungu tamba u bosho bu ibandja. ³ A nini bande, ka ba toko mono rutoko rua bora Kumu Yesu, ⁴ Ndji ku kerem'ande itanga ra wara bande ba rimishi buanya u rueye runu, rende, bate bapende ku ba pununu a mapere ma kenyeke kenye. ⁵ Ndo puara bawata a wara bande a butete, ba ku turiyi mishi a shini, kek'ake ba ku ba ror'ande: "Shini yeye a ntshotoko buini moto ndjua monyo u ndenga bate ba wu? ⁶ A kapa yi kariwiy'ani bi, kek'ake a ma mana wumuwu. Wibuw'anana ipu nana ri bu shosho yande itanga rini ra wara yande aro u Garere, ⁷ aroro yanda: "Dji nde Muana moto bi neye u djara dji bakere bube, bi nnya-nyaka a riki ra nte mua wesheshe, ndo yi wumuwu rushuwu rua ntshata." ⁸ Ndo bawata ku wibuwu toto shini sha Yesu. ⁹ A karuwu banda u punu ibandja, ba ku rondosho meyi mane ngowo ma makimi u bor'ishinga ando moko ndo bate beke ba bakimi. ¹⁰ Bawata bana ba wara Mariyi ma Magadara, Jane, Mariyi inyand'abora Jake, ndo bawata beke bane ba war'ando bande ku rondosho bapostoro rueyi ipu rimoko. ¹¹ Rueyi runu rua rondoro banda rua wara u bosho bua banda ngo rueyi ru bere wiyi a mboko, ndo ka batoko weshere bawata bana. ¹² Kek'ake Petero ku katuwu, ndo ya ku tshuku mbanga u wende ri ibandji. A weteme ndo a rende, ya ku mono pa mapere manda mande. Ndo ya kuende ra boro buanda, yiyi ya wururu u rueyi runu rua kereme. ¹³ Ndo rende, rushuwu munu runu, baweke bapende ba wendeke ra boro bua wuruku banda Emawusu, ngama a Yerusareme, ¹⁴ ndo ba totoko ariki ra rueyi rua rukimi runu rua kereme. ¹⁵ Itanga ra totoko banda ndo a nanasheke banda, Yesu ku karuwu yand'amene ngama, ndo ku kere rende ando bande ¹⁶ Kek'ake mishi ma banda ka masheke kare nyebe. ¹⁷ Yesu ku ba roro: Bua miki toto rueye nana penda yini u wiyi?Ba wara ba ntshumu ba bondomo. ¹⁸ Moko wu ndeng'abanda, a wuruku banda Kleopas, ya ku marara: Wiyi pa wene moko yono a nguaraka u Yerusareme a mereke yebe runu rua nkereme matuwu mana ngowo? ¹⁹ Ru nanaki? a ba roro yande. Ndo ba ku marara: Runu rua nkereme ariki ra bora Yesu ndjua Nazarete, yono a wara ngandjambe ndjua nono wu mineme ndo u toto u mishi ma bora Ndjambe ndo u mishi ma bate ba bakimi, ²⁰ ndo ipu nana bawotara bi ba kubanganga ndo bakumu biti a ma ba nkampa shini ba u nyaka, ndo ba ku nyaka a riki ra nte mua wesheshe. ²¹ Ndo biti tshua guengiyi djara yanda yi wondjoro Isarere, kek'ake ando meye mana ma makimi, rende djiyi arini butuwu bua ntshata meye mana a kereme mande. ²² Ndjiyi bara-bara ipu ndambe bawata u ndenga yiti ba tshu kemeshe buika buiki; a wendere banda ngeshe mu butuwu mua shamba ri ibandja, ²³ ndo a bere banda to mono rutoko ruanda, ba kuiyi u rondoro banjero ba ba pununu ndo ba ba shosho yiyi ndjua monyo. ²⁴ Ndamba bate bana ba wwar'ando yiti ba ku wende ri ibandji, ndo ba to mono meyi ngo puara bawata a roro banda, kek'ake yanda ka ba toko mmono bi. ²⁵ Keke Yesu ya ku ba roro ya nde: Bate bi bere wiyi a buanya, ngo nteme muini mu bunono u weshe meyi ma makimi mane ma toto bangadjambe! ²⁶ Ka dja toko yemen'ande Kristu imono ndjoro wu meyi mane ngowo, shini ya inini u kata rutono ruande? ²⁷ Ndo u tapa to Mose ndo u shamba ba ngandjambe ba bakimi, ya ku ba shimbishi u kata ndja mikanda nya mikimi meyi mane ma ntomboko yanda. ²⁸ Itanga rini ra toro banda ngam'ando boro bunu bua weke bande, Yesu ku reshe ngo moto a meke tamba. ²⁹ Kek'ake ba ku ntshuku u nor'ande: "Shar'ando yiti, ishin'ande ikokoro ra wiyi ndo itanga ra kiti. Ndo ya ku nini, shini ya u shara ando bande. ³⁰ Dji ku kerem'ande itanga rini ra wara yand'ando banda u meshe, ya ku wosho djampa, ku ri romboshe Ndjambe, ambishi ku ri peshere ndo ku ba yek'a rindi. ³¹ Keke mishi ma banda ma ku ripuwu, ndo ba ku kare nyebe, kek'ake ya ku rimi u mishi ma banda. ³² Ndo ba ku toto banda a bande: Nteme muiti ka mua toko temuwu tiyi u kata yiti, itanga rini ra wiki yanda tshu shimbishi a mboko meyi mane ma pundu banda? ³³ A katuwu banda munu itanga rini rimoko ba kue karuwu ra Yerusaleme, ndo ba to mono ishanga, ndo bane ba kokom'ando banda, ³⁴ u roro: U bara Kumu ama mane wumuwu ndo ya ku monyiyi u bora Simo. ³⁵ Ndo ba ku rondoro meyi mane mi ba wiri a mboko ndo ipu nana Yesu a monyiyi yanda u banda itanga rini ra peshereyanda djampa. ³⁶ A wara banda bi toto meyi mane ngowo, Yesu yand'amene ku ya shundju u ndenga banda, ndo ya ku ba roro:" Poro shar'ando yini. ³⁷ Kek'ake ba ku tini ndo ba yoro butete, ba wengiyi band'ande ba mmono ngeshe. ³⁸ Kek'ake Yesu ya ku ba roro: Ishini iyeye yi buini 'ando u riti, ndo buaka ya wururu u miteme nyini ? ³⁹ Rend'anana djara djama ndo para shani, dji barabara miyi. kumun'anana ndo bu mono. Nyumu a kapa mbe ndo nyuwu mbe ndo iyoro bi, puara yini ya mbonoko buini miyi ndiyi a djindi. ⁴⁰ Ndo a totoko yanda ngosho ya ku ba shundju djara djanda ndo para shanda. ⁴¹ Ngo a wara banda u bunyaka bua banda ndo ba kemeke, Yesu ba roro: Buiy'ando ikete ri dji ane? ⁴² Ba ku ntshundju itenye ra shu ra wanga. ⁴³ . Yesu ya ku wosho, ndo ya ku dji wu mishi ma banda. ⁴⁴ A mbishi ku ba roro: Rundu runu ru bu shoshoko miyi itanga rini ra kara wara miyi ando yini, dja nyemen'ande meyi ma makimi mane ma punda shini miyi u kata mabenge ma bora Mose, u ukata bangandjambe,ndo wu kata mikanda nya ndjembe mi yemene. ⁴⁵ Keke ya ku ba ripiri buanya, ishin'ande bi shimbiri meyi mane ma pundu banda u mikanda. ⁴⁶ Ndo ku ba ror'ande: "Ba pundu Kristu yi momono ndjoro, ndo yi wu wumuwu u bate bawu rushuwu rua ntshata. ⁴⁷ Ndoki ma barara ma nteme ndo marimbishi mi mandimbi barake bi shono u rukombu ruanda u mabiri ma makimi, u tapa to Yerusareme. ⁴⁸ Buiyi ba temue ba meyi mane. ⁴⁹ Miyi ndi totomo ariki rini rini Tata a raya yanda; kek'ake buini, shar'anana u kata boro bua bunene inamana yi reye buini bunono bunu bu wi punu u riki. ⁵⁰ Ambishi Yesu ya kue ba rata u mbeta Betaniya. A totoro yanda djara u riki, ya ku ba purushe. ⁵¹ Dji ku kerem'ande itanga rini ra wara yanda yi ba purushu ya ku ba kobuwu ndo ya kuende ra riku. ⁵² Ndo banda a mana ba u ntonosho ba kue karuwu ra Yerusareme ando bu nyaka bua buiki. ⁵³ Ba ku wara matanga ma makimi u kata tempero u purushe Ndjambe.