¹ U Itanga rini Sesar Oguste ya ku punushu nkendje, mu bara bate ba bakimi bana ba wara u shina ande ndja Romo. ² Ma barara ma bata mana ngowo mi bukoto ma kereme itanga rini ra wara Kuiriniwus nguvene ndjua Siri. ³ Bate ba bakimi ba weke u ya pundushu kombo, mot'ando moto u boro bua bande bua bunene. ⁴ Yosefe a yande ku tetuwu u Ngarere, u boro bua bunene bua Nazarete, shini ya wende ra Yudayi, u boro bua bunene bua Davidi, bua nguruku banda Beterepeme, ishin'ande a wara ndjua mburu ndo ndjua ikundu ra bora Davidi, ⁵ shini kwe ya pundushu ru kombo, ba ngar'ande Mariyi yono a wara a ikundu. ⁶ U itanga ra wara banda u nono, matuwu ma bora Mariyi u boto ma ku yemene. ⁷ Keke ya ku boto muan'ande ndjua ba rungu, ndjua bukoto. Ya ku ningi mapere, ndo ya ku meye u ntshete mua meke ba djishi biboro, ishin'ande iraka ka ratoko wara ishini banda u kata mbura benyambanga. ⁸ U kata mbete yini, ba baka bapanga ba wara ba ntshondjo bi bake bapanga ba banda butuwu u nenge, ⁹ ndo rende, Muanjero moko ndjua bora Kumu ku ba pununu, ndo rutono rua bora Kumu ru ku temuwu u ndenge a banda. Ba ku wara a butete bua buiki. ¹⁰ Muanjero ku baror'ande: A reke buara a butete; ishin'ande nda mi bushosho rushanga rua rusheke runu ru wara rueyi ru bunyaka bua buiki shini bate ba bakimi: ¹¹ A rini u kata bora bua bunene bua Davidi, ba bu botosho ngondjoro, yono yiyi Kristu, Kumu. ¹² Ndo rend'anana u yendje nana ri nyebe buini: Bu toko mono muana ndjua booro ndjua ringi mapere ndo ba meye u kata ntshete mua meke ba djishi biboro. ¹³ Ndo mun' anana, tumu ndja inene ndja mayoro ma riki ba ku ya posho ando muanjero ndjua bukoto u tonosho Ndjambe, ndo barok'ande : ¹⁴ Rutono u bora Ndjambe u kata maraka ma ndemba riki, ndo poro u shin'amana u ndenga bate bana nyakasha yande. ¹⁵ Itanga ri ba kobowo banjero shini ku karuwa u riki, ba baka bapanga ku sha ya toto banda-banda: Tshuend'anana inamana Beterepeme shini biti u mono rueyi runu rua nkereme, runu rua tshushosho Kumu. ¹⁶ Ba kuende buashi-buasha, ndo ba kuto mono Mariyi ba Yosefe aki Muan'a booro ba meye u ntshete mua meke ba dJishi biboro. ¹⁷ A mbishi amana ba mono, ba ku rondoro meyi mana mi bashosho banda u rueye rua muana yono ndjua nkeke. ¹⁸ Bate ba bakimi bana bi ba woko ba wara bi keme u meye mana mi ba shosho ba baka bapanga. ¹⁹ Mariyi a rondo meyi mana ma makimi, ndo a wengiyiki u nteme muande. ²⁰ Ndo ba baka bapanga ba kwe karuwa, ba wiki tonosho Ndjambe ndo u marasha ndjembe ishini meye ma makimi mana ma woko banda aki mana ma mono banda, u raba ipu ra meye mana mi bashosho banda. ²¹ Rushuwu ru inana a yemene rundu, runu rua war'ande bi batara muana poto, ba ku nyeke ru kombo Yesu, rukombo runu rua roro muanjero bukoto inyanda ya u bere toko kere ikundu rande. ²² Itanga a yemene matuwu mi mayembeshe ma banda, puara yini ya wara mikendje nya bora Mose, Yosefe ba Mariyi ba kwe nata ra Yerushareme, shini kwe ntshundju Kumu, ²³ U raba runu rua pundu banda u kata mikendje nya bora Kumu: Nnomo ndjua nkimi yono yi boto banda ndjua bukoto yara ndjua u reye u bora Kumu. ²⁴ Ndo shini ku reye namba mu ba kumbu bapende, mbe aki bana bi tshukutukumbu ba pende, ngo ipu ra pundu ba u mikendje nya Kumu. ²⁵ Ndo rende u bora bua Yerushareme moto moko a mawara ba nguruku Simeo, a wara moto ndjua rongo ndo a weke tini Ndjambe, a weke baka mawindiri ma nteme ma Isarere, ndo Nyumu ndjua ntsheke a wara a riki rande. ²⁶ Nyumu ndjua ntsheke ya ku te ntshosho u bu Ndjambe ande: wene ko wu te wa, wene u bere te mono Kristu ndjua Kumu. ²⁷ Nyumu a Ndjambe ku tindiyi Simeon u wende ra tempero. Ndo, ngo ba bot'ande a wiki ba rata muana ndua nkeke Yesu shini ku yemeshe a riki randa runu rua roko nkendje. ²⁸ Ya ku nguaya u djare djanda, ku karasha Ndjamba maranga ndo ku roro: ²⁹ Kek'angowo Kumu, rekere muina ngun'awu yende a pooro ipu ri rutoto ruawa. ³⁰ Ishin'ande mishi mama ma mono mawondjoro mawu, ³¹ mawondjoro mana ma roriyi wene u bosho bua bate ba bakimi, ³² muanya shini ku yembeshe mabira, ndo rutono rua Isarere bate bawa. ³³ Ishanda, ba inyanda ba wara a bunyaka u meye mana ba roko banda a riki ra muana. ³⁴ Simeo ku ba nyaya ndjara ndo ya ku shosho Mariyi inyanda: Rende muana yono yi wara shini ku rata mabuishiri ndo matotoro ma bate ba buiki u Isarere, ndo yi kara wara ngo yendje rini ri wi rata mawenge u totoro sha bate. ³⁵ Wene we mene, kueshe yi ru yirushuru monyo muawa shin'ande manya mi miteme nya buiki mi pupunu u wororo. ³⁶ Ngandjambe ndjueke ndjua bawata a ma wara u nono rukombo ruande Ana, ndjua muana a bora Fanuere, ndjua irondji ra bina Asere. A wara ngotar'ando mashewe mabuiki, ya u bere yebe nungu, yanda a mashimi u ibaka mashewe shamboro ba nom'ande to. ³⁷ yanda ku shawara poto ikini nungu ndo mashewe masha inana ando mane, yande ka toko rekere tempero, ndo a weke washa Ndjambe ngunu butuwu ndo muanya u makinini mi bidjere ndo maromboro ma Ndjambe. ³⁸ U itanga munu rini ri moko, a yande ya kui punu, ya ku karasha maranga u bora Ndjambe ndo a totoko rueye rua bora Yesu u bate ba bakimi bana ba bakaka mawondjoro ma Yerushareme. ³⁹ Anana a mara ba manasha u yemeshe meyi ma makimi mana ma romboko mikendje nya Kumu, Yosefu ba Mariyi ba kwe Karuwa u Ngarere, u boro bua banda bua bu nene bua Nazarete. ⁴⁰ Keke muana a wiki nanga ndo a wiki pete bunono. A wara a nyoro a buanya ndo ntshongo mua Ndjambe mua wara a riki randa. ⁴¹ Ba boto ba bora Yesu ba weke wende ishewu ra rikimi u Yerushareme ishini bunyaka bu Paake. ⁴² A yemeshe yanda mashewu ishanga a mapende, baku tetuwa u Yerushareme u raba kerere ndja bunyaka. ⁴³ A mbishi matuwu a shiri manda ndo a we ba karuwa, muana Yesu ku sha shara u Yerushareme. Kek'ake ba bot'ande kaba sheke yebe bi. ⁴⁴ Ba wara bi wengiy'ande yanda yiyi ku kata bate bana bawar'ando banda u rende, ba ku kere rushuwu ru ibiti rua rende, ndo ba weteke ntshoto u kata bashi ba banda ndo bana ba yebeshe banda ndo ba. ⁴⁵ Kek'ake a bere banda u mono, ba ku kara karuwa u Yerushareme shini ku ntshonto. ⁴⁶ A mbishi matuwu mashata, ba ku to mono u kata tempero ya a ntshikimi u ndenge a bayishi ba bi ngoko ndo bi moko makongo. ⁴⁷ Bana ba bakimi ba ngokoko ba wara bikeme ishini buanya buanda ndo ma barara manda. ⁴⁸ Itanga a mono babot'ande, baku keme, ndo Inyanda ku nor'ande: Muan'ame, wa tshukere ngono shini yiye? Rende, ishua ndo miyi tshua nguara tshu ishot'ando pamba u nteme. ⁴⁹ Ya ku ba ror'ande: Bua nguara bu shoto ishini yeye? Ka bua nyebeke ande, djiyi ande ndi wete kere meyi ma bora tate? ⁵⁰ Kek'ake banda ka ba toko yebe shongo a runu ru ba shoshoko yande bi. ⁵¹ A mbishi Ya kuwomono ando banda ishini ku wende ra Nazarete, ndo ya ku ba tomuwu. Inyanda a weke rondo meye mana ma makimi u kata nteme muanda. ⁵² Ndo Yesu a wiki nanga u buanya, u butara ndo u ntshongo u mishi ma Ndjamba ndo u mishi ma bate.