¹ Bate ba buiki ba maya yeke upundu meye mana ma kereme u ndenga yiti. ² U raba runu ru tshu shosho ba teme bana ba mono to matapara, ndo ba buaka ba shono rushanga rua bora Ndjamba. ³ Keka a yasha miyi ku mono ande dji busheke, ambishi u mara shoto u mayebe ipu ra nomboko djindi a reke ra meyi mana ma makimi to matapara ma manda, u yi pundusha a manda u nongo we kumu Theofile; ⁴ Ishini we u yebe busheke mayishi ma wosho wene ande miyi ma bara-bara. ⁵ U itanga ra Herode kumu ndjua Yudaye, ngangandjamb'amawara u rukombo Zakari, djua ipoko ra Abia. Ngarande a wara ndjua kata bana bi ba wata ba bora Arone, rukombo ruanda Elizabete. ⁶ Pend'abanda ba wara bata ba rongo u mishi ma bora Ndjambe, ba weke tomowo mikendje nya mikimi ndo ma benge ma makimi ma bora Kumu ipu ra nomboko djindi. ⁷ Kek'ake ka ba she wara a muana bi, ishini Elizabete a wara ikutu, ndo mpe mua banda ba wara a mashewe ma shamba. ⁸ Keke itanga ra kereke yanda mingunu nyande u bosho bua Ndjambe, u shoko ndja ipoko ra bande, ba ku boko mubere ba ntshoro ya u kere ngunu; ⁹ u raba ruere rua ngunu mu ba ngangandjambe, u nini u kata ntempero ndja Kumu ishini ku reye namba mua shara ndja shoro. ¹⁰ Yoro ra bate ba buiki ra wara ku bu shobo ri rombo Ndjambe, itanga ri reye namba mua shara shoro. ¹¹ Keke muanjero mua Kumu ku pununu Zakari, ndo ku yembete u rowo ru barungu rua kindi ndja namba mua shara shoro. ¹² A mono yande muanjero, Zakari ya ku riti ndo butete bu ku nguata. ¹³ Kek'ake muanjero ku nor'ande: Zakari, a reke wa woko butete shin'ande ba weshe iromboro rawa. Ngarawa Elizabete yibo yi botosho muana ndjua barungu, ndo u nyeke rukomb'ande Yone. ¹⁴ Yi wara ishini wene rueyi ru bunyaka ndo nyanga mua shamba, ndo bate ba buiki bi nya nyaka u mabotoro mande. ¹⁵ Ishin'ande yi wara moto ndjua nene u bosho bua boro Kumu. Ko yi nyuku mbe mana, mbe mana ma manono, ndo yi wara ndjua yor'ando Nyumu ndjua ntsheke to ikundu ra bora inyande. ¹⁶ Yi ka karasha bana ba Isarere ba buiki u bora Kumu, Ndjambe a bande. ¹⁷ Yi wiki shamba u bosho bua bora Ndjambe ando Nyumu aki bunono bua Eliyi, ishini ku karasha miteme nyi ba tata u bana ba bande, aki u barara bina ntshu bunono u buanya bua bate ba rongo, ishini ku rorosho Kumu yoro ra bate ba bayemene. ¹⁸ Zakari ku roro muanjero: Ndi yebe rueyi runu ipu mbuenye ? Ishin'ande ndiyi inunu, ndo ngarami a ma shamba mashewe. ¹⁹ Muanjero ku marar'ande : Miyi, ndiyi Gabriel, nda meke yembete ku bosho bua bora Ndjambe; Ba ntomo shini ku toto awa, ndo shini ku yi shosho rushanga runu rua rusheke. ²⁰ Ndo rende u wara kamama ndo wa ka rere toto inamana ru shuwu meye mana yi yemene mande, ishin'ande she wa sheweshe u toto shama shini shi yemene itanga ra shindi. ²¹ Itangi rini, bate ba wara bi baka Zakari, ba kemeke ipu ra we ya yere u kata irak ri kini. ²² A punu yande, ka toko wara a ipu ri ba totosho, ndo ba ku yeb'ande a ma mono rueyi ru bere mono u kata iraka ri kini; a weteke ba kereshe djendje, ndo a shara kamama. ²³ Keke matuwu ma ngunu muanda a manda, ya kue karuwa ra mbur'ande. ²⁴ Ambishi matuwu mana, ngar'ande Elizabete ku kere ikundu. Ya ku shuama ngondo itana, a rok'ande: ²⁵ Munu mu ntshongo mua nkereshe Kumu, itanga ra nende yande mishi a riki rama, shini kuteye bushonyo buama u mishi ma bate. ²⁶ U ngondo a ntshamunu, Ndjambe kutomo muanjero Gabriel u boro bua bunene bua Garere rukombo Nazarete, ²⁷ u bora irenge ra ngata ratapa banda u bora nungu rukombo ruande Yosefe ndjua mburu a bora Davidi. Irenge ra ngata rukombo ruande rua wara Mariyi. ²⁸ Muanjero ku nini u mbur'ande, ndo ku roro: Ndake iwimbishi, we yono Ndjambe a ngoko ya ntshongo; Kumu yiyi ando wa. ²⁹ A woko yande ru toto runu ya ku rite, Mariyi ya ku ya wururu iwimbishi rini ra noko roro iyeye. ³⁰ Muanjero ku nor'ande: Mariyi a reke wa woko butete, shin'ande Ndjambe a ma yi woko ntshongo. ³¹ Ndo rende, u kekere ikundu ndo u boboto muana ndjua barungu, ndo u nye nyeke rukombo ande Yesu. ³² Iwara ndjua nene ndo bi nguru muana ndjua muina ndembe a riki, ndo Kumu Ndjambe yi nye nyeke nguasha ndjua bukumu dja bora mam'ande Davidi. ³³ Ikekere bukumu buande shere-shere a riki ra mbur'a bora Yakobo, ndo bukumu buande ko bu war'ando ma manasha bi. ³⁴ Mariyi ku wuru muanjero ande: Ipu nana rikereme rueye runu ngowo, miyi u bere toko wara bita nungu iraka imoko bi ? ³⁵ Muanjere ku marar'ande: Nyumu ndjua ntsheke yiki wiyi a riki rawa, ndo bunono bua yono ndjua ndemba riki bu yi riripiyi irurumbu ra bundu. Iraka rini muana ndjua ikini yi boto wene bi nguru muan'abora Ndjambe. ³⁶ Rende ntshibuawa Elisabete a makere a ya ikundu ra muana ndjua barungu u bununu buande,ndo yono ndjua wuruku ba ikutu, yiyi ku ngond'ande ndjua ntshamunu. ³⁷ Boo,kuapa ikete ri n'nende shini Ndjambe. ³⁸ Mariyi ku ror'ande : Ndiyi muina ngunu a bora Kumu; dji kereme a riki rama u raba rutoto ruawa! Ndo muanjero ku sha nekere kuende. ³⁹ Itanga munu rini, Mariyi ku katuwu ndo ya kuende buashe-buasha u mbete minkondjo, u kata boro bua bunene bua Yude. ⁴⁰ Ya ku nini u kata mbur'abora Zakari ndo ya ku wimbishi Elizabete. ⁴¹ Pa munu Elizabete a woke yande iwimbishi ra bora Mariyi, muana ku nyinyi u ikundu rande, ndo ya ku yoro a Nyumu ndjua ntsheke. ⁴² Ya ku wabuwa anono ku roro: Wiyi ndjua nyakesha u ndenge ba wata, ndo yono yiyi u ikundu rawa yiyi ndjua nyakasha. ⁴³ Ipu nana ra nkereme djindi u miyi ande inyanda a bora Kum'ame yiyi ngama a ndo me? ⁴⁴ Ishin'ande rende, munu'anana matu mama angoko mande iwimbishi rawa, muana a nyinyi u ikundu rini yi rama ndo bunyaka. ⁴⁵ Bunyaka u bora yono angueshe, ishin'ande mana ma makimi ma ntshosho bande u bora Kumu mi ye yereme. ⁴⁶ Ndo Mariyi ku roro : Monyo muama mu tonosho Kumu, ⁴⁷ ndo nyumu ame inyaka u Ndjambe, ngondjor'ame. ⁴⁸ Ishin'ande a ma shiki mishi mande a riki ra muina ngun'ande ndjua bawate yono yi ya karasha u shini. Ishin'ande rende u tapa a rini, kumbu sha shikimi shi weke ndoro ndjua bunyaka. ⁴⁹ Ishin'ande yono yiya ndo bunono bua bukime a makereshe meye ma manene, rukombo ruande ruyi ndjua Ikini. ⁵⁰ Ndo irerere rande rake wara u kumbu a ndo kumbu a riki ra bana bake ntini. ⁵¹ Ya ku shundju bu nono bua rowo ruande ndo ku pandja bate bana ba wara ando manya mi ya wondo u miteme. ⁵² Ya ku buishi banono u nguasha sha banda shi bukumu. Ndo ku totoro u riki bana bi ya karasha u shini. ⁵³ Ya ku yorosho bikete u bana ba wara a ndjara, keke bina biroko ya ku ba karasha ndjara bu kara. ⁵⁴ Ya ku kereshe busheke muina ngunu'ande Isarere, ndo ku kanana tshongo muande, ⁵⁵ ngo ipu rashosho yande bi shiti, u Abarapama ndo bakana shande shera -shere. ⁵⁶ Mariyi a sha shara ba Elisabete ruere a ngondo ishata. A mbishi ya kue karuwa ra boro buande. ⁵⁷ Itanga ri boto ra bora Elizabete ri ku yemene, ndo ya ku boto muana djua barungu. ⁵⁸ Bina ngam'ande ndo ba shibande ba kuwok'ande Kumu a ma muanga ntshongo muande a reke rande, ndo ba ku nyak'ando nde. ⁵⁹ A yemene matuwu inana ba ku wende a ndo muana u matara poto barungu, ndo ba nguruku Zakari, rukombo rua bora ishande. ⁶⁰ Kek'ake inyande ku wosho ru toto ndo ku ror'ande: Kuapa, bi nguru Yone. ⁶¹ Ba ku nor'ande kua moto a moko ndjua irondjo rawa yiya a rukombo runu. ⁶² Ndo ba wara bi kereshe ishanda djedje ishini ku yeb'ande a ngondo bi nguru nani. ⁶³ Ya ku ba rombo itara ndo ya ku pundu: Rukombo ruande Yone. Ndo ba bakimi ba ku keme. ⁶⁴ Mun'anana numbu muande mu ku ripuwu ndo runeme ruande ru ku tunguwu, ndo ku toto u tonosho Ndjambe. ⁶⁵ Ndo butete ku wata bate ba bakimi ba ngama, ndo bi mikondjo nya mikimi nya Yudayi, ba totoko ishini meyi mana. ⁶⁶ Bate ba bakimi bana bi mawoko ba ku ma rondo u miteme nya bande, bi ror'ande: Muana yono iwarake nane? Ndo iyata ra bora Kumu ra ma war'ando nde. ⁶⁷ Ishande Zakari, ku yoro a Nyumu ndjua ntsheke, ndo ya ku shakara ru tot'ande: ⁶⁸ Rutono u bora Kumu, Ndjambe ndjua Isarere, shini a wiya mono ndo a wondjoro yande bate bande. ⁶⁹ Ndo a ma tshu tomosho ngondjoro ndjua nono djua ikundu ra bora Davidi, muina ngun'ande, ⁷⁰ ngo ipu ra toto yande u numbu mu ba ngandjamba bande bi ikini to itanga ra wara, ⁷¹ ngondjoro yone a make tshu wondjoro u bini ikembe biti ndo u djara dji ba woka yiti bube ba bakimi! ⁷² U ipu rini ra shundju yande bishiti ntshongo muande, ndo ku wibuwu nkondo muande mu ikini, ⁷³ u raba ikoko ri ya koko yande u ishiti Abarapama, ⁷⁴ u tshu yeke mboko, a mbishi ya u mana tshu wondjoro u djara dja bini ikembe a yite, ndo u nkereshe ngunu u bere wara a butete, ⁷⁵ wuku shamba u bosho buanda u kata ikini ndo u rongo matuwu ma makimi ma monyo muiti. ⁷⁶ Ndo wene, muana ndjua nkeke, bi yi wuru ngandjambe a muina ndemba riki; ishin'ande weke wende u bosho bua Kumu shini ku roriyo mboko shanda. ⁷⁷ Keke ande u yeke bate bande buyebere bu mawondjuwu ma monyo u mboko ndja marimbishi mi mandimbi ma bande. ⁷⁸ Ishini ntshongo mua munene mua Ndjambe a yiti; ku mundu itanga ra punu rindi u tshu mono u riki, ⁷⁹ shini ku yembeshe bana biyi ba ntshikimi u kate muinini ndo u irurumbu ri wa, shini kwe rata para shiti u mboko ndja poro. ⁸⁰ Keke, muana a nangaka, ndo a koroko u bunono bua Nyumu. Ndo weke wara u ndenge nenge, inamana rushuwu rua wiyi yande u ya monosho u bosho bua isarere.