¹ Yesu a nini yande u kata Yeriko, ku shamba u ndenga boro bua bunene. ² Ndo rende, muina biroko, a nguruku ba Zakaya, kumu ndjua ba rambasha namba, a shotoko yi mono ande Yesu yiyi nana. ³ Kek'ake Ka toko yemene ruere mono, ishini yoro ra bate, ishin'ande a wara moto ndjua nkuiyi. ⁴ Ya ku nerere mbanga u bosho, ndo ya ku banda u nte mua Sicomore shini ya u mono, ishin'ande yande yara shamba munu nono. ⁵ Itanga ra toro Yesu u iraka rini, ku totoro mishi u riki ya ku m'mono ndo ku nor'ande: Zakaya tshueruwu buasha, Ishin'ande a rini, dja nomb'ande ndare ku mbur'awa. ⁶ Keke Zakaya ku tshueruwu mbanga ndo ya ku nguaya a bunyaka. ⁷ A mono ba ngono, bate ba bakimi ku tapa u shuere-shuere, ndo ba roko: A ma we nini u mburaa nkere a bube. ⁸ Kek'ake Zakaya, ya ku yembete u bosho bua kumu, ku ntshosh'ande: Mono, Kumu! Nda ngondo ku yeke ba poto itenye ri bikete djama. Ndo mbe djar'ande nda make kereshe moto bube u ntambara ikete randa, ndi nka nkarasha a rindi shoko inene! ⁹ Ndo Yesu ku noro: Arini, mawondjoro ma nini u kata mburu yini, ishin'ande yono a yanda yiyi muana ndjua bora Abarapame. ¹⁰ Ishin'ande muana moto a wiyi ku shoto ndo u wondjoro rini ra rimi. ¹¹ Ndo a weteke ba woko meyi mana, ndo Yesu ku nyaya nkondo moko, ishin'ande a wara ngama a Yerushareme, ndo ba wengiyik'ande bu kumu bua Ndjambe bu rena monyiyi ani ngama-ngama. ¹² Ya ku roro ake ande: Moto moko ndjua mbura komono, kuende ra bora bua tambe, shini kue reye bu kumu, ndo yi kare u karuwa. ¹³ U bosho bua ya u wende, ku wuru bina ngunu muanda ishanga, ku ba yeke puaranga ishanga, ndo ku ba roro: Shi purush'ana inamana makaruwu mame. ¹⁴ Kek'ake bina boro buanda ba kungoko pishi, ndo ba ku tomo bate ba banda u mbish'ande shini ku ntshosho: Shi tshuawesh'ande moto yono yara kum'ayiti bi. ¹⁵ Itanga ra wiyi ya karuwa, ya ba mana n'neye bu kumu, ya ku wuru bina ngunu bana bayeke yanda pwaranga, ishini ya u yebe ipu moto ndo moto a purushu yande ikapa randa. ¹⁶ Ndjua bukoto kuiyi, ndo ku ntshosh'ande: Kumu, ru puaranga ruawa rua boto pwaranga ishanga. ¹⁷ Keke ya ku marar'ande: Dji busheke, muina ngunu ndjua ntsheke; ishin'ande wa monyiyi ndjua sheme u bikete dja bikeke, wosho bukumu bu rende mara ma manene ishanga. ¹⁸ Ndjua mpende ku wiyi, ndo ku ntshosh'ande: Kumu, ru pwaranga rua boto pwaranga itana. ¹⁹ Ya kunor'ande: A wene, wara kumu a riki ra mara ma manene matana. ²⁰ Ndjua ntshata kuiyi ndo kunor'ande: Kumu, rende ru pwaranga ruawa, runu rua rondo miyi u kata ipere; ²¹ Ishin'ande nda wara a butete buawa, ngo yi wene moto ndjua meyi ma manono, wa meke wosho rini ra bere we shiki, ndo wa meke kunu rini ra bere we wono. ²² Ya ku nor'ande: Wiyi muina ngunu ndjua kabua, ndake yi rumbushu ku toto shawa; wa ma mana yeb'ande ndi muina meyi ma manono, nda meke wosho rini ra bere miyi shiki, ndo ra meke kunu rini ra bere miyi wono; ²³ Ishini yey'ake a bere wene u we shiki ru pwaranga ruama u mburu ya meke ba rondo biroko? Shin'ande u ma karuwa mama ndarake wosho ando mpoto a riki! ²⁴ A mbishi ku roro bana ba wara anana: Ntambar'anana ru pwaranga runu, ndo bu yeke a rundu yono yiy'ando pwaranga ishanga. ²⁵ Ba ku marar'ande: Kumu, yiy'ando pwaranga ishanga. ²⁶ Ndake bu shosho a rund'ande, bi ye yeke yono yi to wiyi a ikete, kek'ake u yono yi bere wiyi a ikete bi nta ntambara a rini ra rikeke riyand'ando rindi. ²⁷ U runu rua ntshara, yi na rat'ane bini ikembe bama, bana ba berek'ande ko nda kere bu kumu a riki ra banda, ndo ba djak'anana u mishi mama. ²⁸ A mana yande u toto ngosho, Yesu a wiki wiyi u bosho bua yoro, shini kue tetuwu ra Yerushareme. ²⁹ Itanga ra toro yande ngama a Betafage ndo a Betaniya, u mbeta nkondjo mua nguruku banda nkondjo mu mite nyi ba Olive, Yesu ku tomo yande ba pende bi baweke banda, ³⁰ u ba roro: Yak'anana u kata boro bunu buiyi u bosho buini; itanga ri nini buini, bu toko mono muana pundu ba nkanda, yono moto a moko a bere ya toko shikimi a riki randa, ntun'anana ndo yi n'nat'anana. ³¹ Ndo mbe moto yi bu wuru: buake ntunu ishini iyeyi? Bu marar'ande: Kumu yiyi a nde nyingi. ³² Bana ba tomo yande ba kuende, ndo ba ku mono meyi ipu ri ba shosho Yesu. ³³ Ngo a tunuku banda muana pundu, ba kumu shanda ku ba wururu: Ishin'iyeyi a ntunuku buini muana pundu? ³⁴ Ba ku barara: Kumu yiyi a nde nyingi. ³⁵ Ndo ba ku rasha Yesu muana pundu, yono a wariyi banda mapere a riki randa, ndo ku bandashe bande Yesu a riki randa. ³⁶ Itanga ra tapa yande rende, bate ku wariyi mapere ma banda a mboko. ³⁷ Ndo itanga ra karuwu yanda ngama a Yerushareme, u ngomono ndja nkondjo mu mite nyi ba Olive, yoro ra rikimi ri baweke banda, riku yoro a bunyaka, ku tapa u tonosho Ndjambe a nona-nono shini bishana dja bikimi dja mono banda. ³⁸ Ba roko: Ndjambe yi purushu Kumu yono a miki u rukombo ruanda! Poro u riki, ndo rutono u maraka ma ndemba riki! ³⁹ Bafarasayi beke, u ndenga yoro, ba ku roro Yesu: Murongosho, kanyini baweke bawa. ⁴⁰ Ndo ya ku barara: Ndake bu shosh'ande, banda bi sheke boto poro, mamanya mi wa wabuwu. ⁴¹ Itanga Yesu a karuwuka yande a ngama a boro bua bu nene, yi bu mono yanda, ya ku rere shini bundu, ⁴² ndo ku roro: Yerushareme, wara yebe u rushuwu rua rini meye mana mi ruere yi yeke poro! Kek'ake norot'ane, djiyi dja shueye u mishi mawa. ⁴³ Ishin'ande matuwu miki wiyi shini wene, mana bina ikembe rawa bi yi buashe ba nkeke u yi nashe. Bi yi ro irongo, bi yi kanga, ndo bi yi nyuenge mbete sha shikimi; ⁴⁴ Bi yi ishashara, wene ndo baana bawa, ndo ko bi she sha rekere a riki rawa imanya a riki ri imanya. Ishin'ande, she wa she yebe itanga rini Ndjambe a miyi yande shini ku yi kereshe busheke. ⁴⁵ Yesu ku nini u kata tempero, ndo ya ku tapa u bingi bana ba kapaka bikete, ⁴⁶ yi ba shoshok'ande: Ba pund'ande: Mbura me yi wara mburu ndja maromboro ma Ndjambe. Kek'ake buini, bua yi kere ngo iraka ra shuama ba kere a meyi ma mabe. ⁴⁷ Yesu a wareka yi yishi matuwu ma makimi u kata tempero. Ndo ba kubanganga, ba punda mikanda, ndo bakumu ba djoro dja bate ba shotoko ipu ra ba nyaka; ⁴⁸ Kek'ake ka ba sheke yebe ande ipu nana ri ruere ba mpete, ishin'ande bate ba bakimi ba wara bi ngoko ando nteme moko.