¹ Yesu ku ba bokosho nkondo shini ku shundju ande, dja nomboko shoko sha shikimi u rombo Ndjambe, ndo a reke bua rembe bi. ² Ya ku roro: U kata boro bua bunene bu moko, ngandji a ma wara. Ka sheke we tini Ndjambe ndo ka weke tini moto. ³ U kata boro bunu, ayasha ngata ndjua a wushu nungu a ma wara. Shoko sha buiki a weke wende u bora ngandji shini ku ntshosho: Kereshe rongo a riki ra muini ikemb'ami! ⁴ matanga ma makimi a weke bere. kek'ake ya ku ya roro ya mene: Dji sheke war'ande ka nda meke tini Ndjambe ndo ka nda meke tini moto, ⁵ Ishin'ake ngo, ngata yono a wushu nungu a ntekesheke ya u ndja rubu. Ndi nke nkereshe rongo. Keke ko a kara wiyi u mborosho ntshu. ⁶ Kumu ku kara nyayi: Wok'anana runu rua noko ngandji ndjua me. ⁷ Ndo Ndjambe yape kere rongo a riki ra bana ba shoro yande, bana bake m'moko mbere butuwu a muanye? Ndo yiba ba bakashe? ⁸ Ndaka bushosh'ande: Ndjambe yi ke ba kereshe rongo buashe-buasha. Kek'ake, itanga ri wiyi Muana moto, yi toko mono maweshere a shin'amane? ⁹ Ambishi ya ku kara boko nkondo munu, a riki ra bate beke bana bi ya monoko we ngat'ande biyi bina rongo, ndo ba meshere bate bana ibeke: ¹⁰ Bate ba pende ba kuende ra tempero shini ku rombo Ndjambe, moko a wara mu farisayi, ndo indjueke a wara nambasha namba. ¹¹ Mu farisayi ku katuwa u bosho ku rombo Ndjambe u meye mana ngowo u kat'ande: o Ndjambe, ndake iyeke maranga ma buiki shin'ande miyi nda kapa ngo bate bana ibeke, bana biyi bembe, bana bi bere wiy'ando bara-bara, ba ndumbu, mbeke ngo nambasha namba yono. ¹² Nda meke ya kiniyi bidjere shoko ipende u rubingi ndo nda meke reye itenye ri ishanga ri bikete djama dja bikimi dja meke mi buishi. ¹³ Keke nambasha namba, ya ku yembete tamba, ka toko mono mbe ipu ri totoro mishi manda u riki; kek'ake ya ku ya boro djara a riki ra nteme ya ku ror'ande: o Ndjambe, poko ntshongo, ndiyi nkere a bube. ¹⁴ Ndake bushosho a rundu, nambasha namba ya ku we karuwa ra boro buanda ndjua shuwuru, mu farisayi ake kuapa. Ishin'ande ndjua nkimi a make ya totoro bi nka nkarashe, ndo yono a maka ya karasha bi nto ntotoro. ¹⁵ Ba wiki nasha a yasha Baana ba bakeke, ishin'ande yi ba kumunu. Kek'ake baweke , a mono bande ngono, ku tapa u kanyina bana ba wiki ba rata. ¹⁶ Ndo Yesu ya ku ba boko mbere, ndo ku roro: Reker'anana baana ba bakeke bi wiyi u boro buama, ndo a reke bu ba wubu bi; ishin'ande Bukumu bua Ndjambe buiyi shini bande bana ba ba puanyi. ¹⁷ Ndake bu shosho a bara-bara, yono ngowo yi bere wosho bukumu bua Ndjambe ngo muana ndjua nkeke ko yishe bu nini a piti. ¹⁸ Kumu moko ku boko Yesu ikongo, ndo ku roro: Murongosho ndjua ntsheke, ndi ruena kere mbuenye shini miyi u pete monyo mua shera-shere? ¹⁹ Yesu ya ku marar'ande: Wa mpuruku ndjua ntsheke ishini ye? kuapa moto ndjua ntsheke, pa munu Ndjambe ya mene. ²⁰ Wake yebe mikendje: A reke wa kere bundumbu bi; a reke wa djaka bi; a reke wa wembere bi; a reke wa roro toto shi manimbi bi; tini ishu ndo nyowo. ²¹ Moto ya ku ror'ande: Nda meke tomowo meye mana ma makimi to burenge. ²² Itanga a woko Yesu meyi mana, ya ku nor'ande: ikete ri moko ra yi sharara: Kapa dja bikimi djiy'ando wa, u biyeke ba poto, ndo u wake war'ando bikete dja buiki u kata riki. A mbishi, iya, ndo ndaba miyi. ²³ Itanga ra ngoko yande toto shini, ya ku bua ndjua bondomo; ishin'ande a wara a biroko dja shamba. ²⁴ Yesu, a mono yande ande a ma bua ndjua bondomo, ku roro: Djiyi bunono u bana biyi a biroko ba u nini u kata bukumu bua Ndjambe! ²⁵ Keke djiyi bor'iwa ishini shutu ndjua Kamere u nini u itondoro ra kandongo, kuap'ake muini biroko ya u nini u bukumu bua Ndjambe. ²⁶ Bana ba ngoko ba ku roro: Ndo nan'ake yi ruere a wondjuwo? ²⁷ Yesu ku barara: Runu ruiyi nende shini bate rua kapa nende shini Ndjambe. ²⁸ Petero ku roro: Rende, tshua sha rekere dja bikimi, ndo tshua mi yi raba wene. ²⁹ Ndo Yesu ku ba roro: Ndake bu shosho a rundu u bara-bara, kuapa moto yono, a mara ya sha rekere, ishini bu kumu bua Ndjambe, mbur'ande, mbe ngar'ande, mbe babi nyande, mbe ba bot'ande, mbe baana bande, ³⁰ yi bere pete dja shamba buiki matuwu ma rini, ndo, u matuwu mana ma miki, yi pete monyo mua shera-shere. ³¹ Yesu ku wuru baweke ishanga a ba pende a kora nde, ndo ku ba roro: Rend'ana, biti kaba tshua ntetewuku u Yerushareme, ndo meye ma makimi ma pundu banda u bora ba ngandjambe a riki ra Muana moto mi ye yereme. ³² Ishin'ande bi ne neye u djara dja bana ba bere weshe Ndjambe; bi ntshe ntsheye, bi mo m'monosho ndjoro, ndo bi ntushuru mashonyo ³³ Ndo yi mana ba m'moro koro, bi nya nyaka; ndo u rushuwu rua ntshata yi wu wumuwu. ³⁴ Kek'ake ka ba sheke shimbiri mbe ikete ra meye mana; dja wara shini banda rutoto rua shueye, ndo ka ba sheke yebe shongo a rueye runu rua roko roro Yesu. ³⁵ Ngo Yesu a toro ya ngama a boro bua Yeriko, moto moko ndjua boriyi mishi, a wara a ntshikimi u kuandja mboko, ndo a romboko bate bikete. ³⁶ A woko yande yoro ra bate ri shamba, ya ku wur'ande rueye nana rua ntshambake? ³⁷ Baku ntshosh'ande Yesu ndjua Nazarete a ntshambaka. ³⁸ Ndo ya ku boko mbere: Yesu muana bora Davidi, poko ntshongo! ³⁹ Bate bana ba wiki wiyi u bosho ba ku mpangasha shini ya u boto poro. ; Kek'ake Ya ku kare boko mbere sha shi nono sha shamba: Muana bora Davidi, poko ntshongo. ⁴⁰ Yesu ya ku yete, ndo ku reye rutoto ande: yi na nata ane ngame a me. a ntoro ya a ngama, Yesu ya ku nguru: ⁴¹ Wa nguesh'ande ndi yi kereshe iye? Ya ku roro: Kumu, kere ande ndi kara mono. ⁴² Ndo Yesu ya ku noro: Kare mono; maweshere mawa ma yi wondjoro. ⁴³ Mun'anana, ya ku kara mono, ndo ya ku raba Yesu, yi tonosho Ndjambe. Bate ba bakimi, a mono bande rueye runu, ba ku tonosho Ndjambe.