¹ Yesu ku shosho baweke banda ya nde: Djiyi neende ande mapu mi buaka u bundimbi ko miyi; kek'ake ntanda u bora yono u mboko ande a miki mande. ² Djara ku wara busheke shini yande ande bi kanda imanya u moyo ndo bi moko u kata iribi. Mbe djar'ande a make tomo moko ndjua ndenga baana bane ba bakeke u kere bube. ³ Bua penye anana buini a mene: Mbe muana nyowo a ma kere bube, nkarasha a mboko keke mbe barara nteme, u nimbishi. ⁴ Mbe djar'ande a ma ikereshe bube shoko shamboro u rushuwu rumoko, ndo mbe shoko shamboro a karuwa u ishosho: Nda barara nteme, u nimbishi. ⁵ Ba postoro ku roro Kumu ande; Nangasha maweshere mitu! ⁶ Kumu ku barara: Mbe maweshere mini mara ngo rundombo rua seneve, bu rene roro nte munu ngow'ande: Tokowo ane ndo ya yawono u kata iribi, ndo mu buto-butomowu. ⁷ Ndo nana u ndenge a yini mbe yara a muina ngunu yono a munduruku mashobo mbe kuapa a makaka biboro. itanga ri ya karuwa u mashobo, "yi nnor'ande: Yiya buasha, ndo shikimi u meshe?" ⁸ Yape nnor'ake nde: "Ndambasha bidjere djama, barara mapere mawa, ndo shere bidjere, inamana yi dji miyi ndo u nyu miyi, ndo a mbishi yini, u dji ndo u nyu a wene?" ⁹ Ka nkarashaka muina ngunu maranga ishin'ande a ma kere rueyi runu rua ya ntome? ¹⁰ Dji ipu ri moko shini buini, itanga ri keere buini ra rikimi rini ri bu tomo bande, bu roro: Tshuiyi bina ngunu ba ngona-ngono. Tshua nkere pamunu runu rua nombo biti u kere. ¹¹ Dji ku kerem'ande Yesu a weke yande ra Yerushareme, ya ku shamba a kata-kata ndja Samariya ndo Ngarere. ¹² Ya ku nini u kata boro bua bukeke, ndo bina bara ishanga ba kwiyi u tashan'ande, ba ku to yembete tamb'ande, ndo ba ku boko mbere u roro: ¹³ Yesu, Murongosho, tshu woko ntshongo. ¹⁴ Yesu ku ba mono ndo ku ba roro: Yak'anana bue ya shundju u boro ba nganga-ndjambe. Itanga rini ra wara banda be wende a mboko, ba ku beruwu. ¹⁵ Moko ndjua bande a mono yande a ma beruwu, ya ku karuwa ndo, ya ku tonosho Ndjambe a nona-nono. ¹⁶ Ya ku to ya boko u para sha bora Yesu, ku tu mbombo a shini, ndo ya ku nkarasha maranga. Moto yono a wara mu Samariya. ¹⁷ Keke Yesu ku roro: Ba bakimi ishanga she ba beruwu? Ndo bana ibeke ribu bi kueye? ¹⁸ U ba bakimi, kua moto a mi karuwa shini ku roro ande rutono u bora Ndjambe, pa munu muenyambanga yono? ¹⁹ Ndo Yesu ku n'noro: Katuwa, yaka, maweshere mawa ma iwondjoro. ²⁰ Ba farisayi ku wuru Yesu: Itanga nana bukumu bua Ndjambe yi wiyi bunde? Ya ku ba barara: Bukumu bua Ndjambe buapa wiyi ngo ikete rini ra monoko bande a mishi. ²¹ Ko bi she roro bi ande: Ya koyo ani mbe kuapa: Ya kono u wono. Ishin'ande, bukumu bua Ndjambe buiyi u kata ndenge a yini. ²² A mbishi Yesu ku shosho baweke: Matuwu miki wiyi mana mi woko buini nyingi ndja u mono mbe rushuwu ru moko rua Muana moto, ndo ko bu she rumono. ²³ Keke bi busho bushosho: Rende Ya kono u wono mbe kuapa: Ya koyo ani, Kek'ake a reke buende bi, a reke bua tshuku mbanga bi. ²⁴ Ishin'ande, ngo iyarama ra ndjeshe a nyembesheke rindi shosho a riki imoko u we toro u shosho ndjeke, ipu imoko yi wara mawiri ma Muana moto. ²⁵ Kek'ake dji rombo bukoto ande yi mono ntanda mua buiki, ndo ake bate ba kumbu yini bi mere. ²⁶ Mana ma kereme u matuwu ma Nowo mi ke kereme ipu ri moko u matuwu ma Muana moto: ²⁷ Bate ba wara bi dji, bi nyu, bi tombosho, ndo ba yeke baana ba banda u mabaka, inamana rushuwu rua nini Nowo u buate, mburu sha buiki ku wiyi, ndo ku ba djaka ba bakimi. ²⁸ Dji wara ipu ri moko ngo u itanga ra bora Loto. Bate ba wara bi dji, ndo bi nyu, bi shombo ndo bi kapa, bi wono ndo bi shoro. ²⁹ Kek'ake rushuwu runu rua punu Loto u Sodomo, mburu ndua tiyi ndo pungu ku nyowo to rik, ndo ku badjaka ba bakimi. ³⁰ Dji wara ipu ri moko u rushuwu runu Muana moto yi ya monosho yande. ³¹ U rushuwu runu, yono yi wara a riki ra shamba ko yi she kara tshuerewu shini kue punushu bikete djande u kata mburu. Ndo yon'aki yi wara u kata ngondo ko yi she kara we karuwa bi. ³² Wibuw'anana runu rua kereme u bora ngara bora Loto. ³³ Yono yi shooto u rondo monyo muande yi muri murimishi. Yono yi murimishi yi muro mu rondo. ³⁴ Ngosho, ndake bu shosho: Butuwu bunu, bate ba pende bi wake wara a riki ri ishasha imoko. Bi wo wosho moko ndo bi sha rekere indjueke. ³⁵ Ba wata ba pende bi wake wara bi tu bishimi iraka ri moko. Bi wo wosho moko ndo bi sha rekere indjueke. ³⁶ Ba rungu ba pende bi wake wara u kata ngondo, bi wo wosho moko ndo bi sha rekere indjueke. ³⁷ Baweke ba ku nguru: Kumu, dji kereme u iraka nane? Ya ku ba barara: mbete yini yi wara rutoko rua niwi, kumbete yini ya kokomo mayapanga.