¹ Yesu ku shosho baweke a yash'ande: Moto muini biroko a wara a nondo bikete djande, yono bate a wi ba ntshosho ba nde, nondo bikete a make wono bikete djawu. ² Keke muina biroko ya ku nguru ndo ya ku nor'ande: Rueye nana rua ngoko miyi rua ntotoko banda a reke rawa? Shundju ndondor'awu ndja bikete, ishin'ande wa ka ruere kara wara nondo bikete djama. ³ Nondo bikete ku roro u kat'ande ya mene: Ndi kere mbuenye, ishni kum'ami a ma teye nondo bikete djande? U bendje shini? Ndapa shi yemene. U romboko? Ndara a bushonyo bu wete rombo. ⁴ Ndake yebe runu rukere miyi, ishini ku pete bate bana bi puaya u ma mburu ma banda itanga ri teye ba u ngunu muama. ⁵ Ndo ya ku wuru, moko moko, ba bakimi bana ba wara a mbata sha kum'ande. Ya ku wuru ndjua bukoto: U yeke kum'ami buiki mbuenye? ⁶ Ya ku barara: Ndjere rukama sha shara. Ndo ya ku nor'ande: Wosho ibeshe ra nkanda, shikimi a shini buasha ndo pundu mashanga ma tana. ⁷ A mbishi ku wuru indjueke: Ndo wen'ake, u yeke buiki mbuenye? Ya ku marar'ande: Ndjere rukama sha ble. Ndo ya ku nor'ande: wosho ibeshe ra nkanda u pundu mashanga inana. ⁸ Kumu ku tonosho nondo bikete yono a bere kere ngunu busheke ipu ra kere yande ngo moto a wibuwu. Ishin'ande baana ba shini yini biyi ba wibuwi buika buiki u mawokosho a bendje ba banda ipu ri bere wiyi baana ba muanya. ⁹ Ndo miyi ndake bu shosho ande: Ya ker'anana shini buin'amene bumbaya ando biroko dja bibe, kek'ande itanga ri bere dji kara wara, bi bu waya u kata matombo ma shera-shera. ¹⁰ Yono yiyi a bubara-bara u kata bikete dja bi keke yiyi a yasha a bundu u bikete dja binene, ndo yono yi bere wiyi a bubara-bara u bikete dja bi keke yiyi a yasha u kata bikete dja binene. ¹¹ Mbe djaraki nde ka bua toko wara a bubara-bara u biroko dja bibe, nane yono yi wondo u bu yeke biroko dja bisheke? ¹² Ndo mbe ka wa toko wara a bubara-bara u kata djini dji bakana, nane yi ruere bu yeke djini djiyi idjini? ¹³ Kuapa muina ngunu moko yi ruera kereshe ba ba kumu ba pende. Ishin'ande, mbe kuapa yi bere moko ndo yi wondo indjueke, mbe kuap'ake yi bama moko ndo yi mono indjueke ngona-ngono. Wa kapa ruera kereshe Ndjambe ndo biroko. ¹⁴ Ba Farasayi, bana ba wondo puaranga, a woko ba meye ma makimi mana, ndo ba ntsheyeke. ¹⁵ Yesu ya ku baroro: Buini bua ntshotoko ku ya shundju u mishi ma bate ande buiyi bina rongo, kek'ake Ndjambe a make yebe miteme nyini; shin'ande rini ra moko bate ande riyi a nganga, riyi kerere ndja ibe shini Ndjambe. ¹⁶ Mikendje ndo ba ngandjamba dja wara too u Yono. U tapa itanga rini, bu kumu bua Ndjambe bake bushosho bate, ndo moto a moto yi kere nkomo ishini ya u nini. ¹⁷ Ndo djiyi boro riki ndo shini a mana dji sha shamba, u reke kashonyo ka kakeke ki irete ri mikendje ka u buaka. ¹⁸ Itanga nungu a bingi ya ngar'ande, ndo a kara shike indjueke a nkereke bu ndumbu, ndo ndjua nkimi yono a ntshiki ngata yono a bingi ba u bora nom'ande, a nkereke bu ndumbu. ¹⁹ Dja ma wara a moto moko a wara muina biroko, yono a weke reye mapere ma masheke ndo ma nganga, yono rushuwu ru rukimi, a weke kere iyoro ri bunyaka. ²⁰ Poto moko, a wuruku banda Lazare, a weke ntshondjo u mboka mburu dja muini biroko, a wara a poto sha buiki u rotoko. ²¹ Yande a weke shoto ipu ra dji djini dja weke rokowo u shina mesa ma muina biroko: ndo ake ba mbua ba weke nengere poto. ²² Dji ku kerem'ande Poto yono ku wa, ndo bajero ba ku ntotoro ba kue nata u kata ikundu ra bora Abarapama, muini biroko ya ku wu a yande ndo ba ku n'neye. ²³ U kata iraka ra bate bawa, ya ku totoro mishi; ndo, ngo a wara ya yi mono ntanda, u tamba ya kumono Abarapama, ndo Lazaro u kata ikundu rande. ²⁴ Ya ku boko mbere: Tata Abarapama, poko irerere, ndo tomo Lazaro, yi bumbiyi shosh'ande a nembe u kata masha ndo yi shoposho u runeme rupete piyi; ishin'ande ndi ku ntanda u kata ineme ra tiya. ²⁵ Keke Abarapama ku marara: Muan'ame, wibuw'ande itanga ra wara wen'amonyo, wama wara a bikete dja buiki, ndo Lazaro a wara ku ntanda u monyo muanda; Kek'angowa, yande koyo ane a nkiti mbondo, ndo wene, koyo wa monoko ntanda. ²⁶ U runu rua ntshara, u ndenge a yiti ndo yini, ibembe ra rinene ra ngindi kara u kata, shin'ande bana bi u muiri muiti ko biyi ra muiri muini, ndo bana bi u muiri muini ko ba buere u muiri muiti. ²⁷ Muini biroko ya ku ror'ande: Ndaki bondoro, tata Abarapama, u tomo Lazaro u kata mburu a bora tata; ishin'ande ndiyi a bana ba manya ba tana. ²⁸ Djiyi ishini ya u we ba wibiri meye mana, ishin'ande a reke biyi a banda u iraka rini ri mitanda. ²⁹ Abarapama ku barara: Biya Mose ndo Bangandjambe; bi ba woko. ³⁰ Ndo muina biroko ya ku roro: Kuapa, tata Abarapama, mbe moto yono ndjua bana bawa yende u bina monyo, bi ba barara miteme. ³¹ Ndo Abarapama ya ku nor'ande: Mbe ba bere woko Mose ndo bangandjambe, bapa she weshe bi ishiki wara mbe moto yono a wu a wumuwu u iwa.