¹ Ba putushu a namba ba bakimi ndo bakere a bube ba ku karuwa a ngama a Yesu ishini ku ngoko. ² Ba farisayi ndo ba pundu mikanda ba shwereke-shwere bi roro: Moto yono ngowo a ngwayike a bakere bube, ndo a nyik'ando bande. ³ Kek'ake Yesu ya ku boko nkondo munu: ⁴ Nani u ndenga yini, mbe djar'ande yiyi ando bapanga lukama, ndo ake yi rimishi moko, yi bere sha rekere bana yi beke masha ribu a ribu u nenge mua yere ishini ya u we shoto yono moko ndjua nimi, too inama yi mono yande? ⁵ Itanga rini ri mono yande, yi ntotoro a riki ri mambanda mande ando bunyaka, ⁶ Ndo, a wuiyi ya karuwa u mburu, yi wuru ba mbayi shande ndo bana bina ngama ande, ndo yi ba shosho: Nyak'anana ando me, ishin'ande nda we mono shut'ame panga yono ndjua a rimi. ⁷ Ndake bu shosho, dji ipu rimoko: bunyaka bu wake wara bua buiki u riki shini nkere a bube moko yono ndjua marara nteme, a shumu ndja bina rongo masha ribu a ribu bane bi bere wiyi a nyingi ndja barara nteme. ⁸ Mbe aki ande: Ngata nana, mbe yara a puaranga sha ndjere ishanga, ndo a rimishi ru moko, yi namiyi muindi, yi bere wombo mburu, ndo yi bere shoto busheke busheke, inamana yi ru mono yande? ⁹ A nana yi ru mono yande, yi wuru ba mbayi shande ndo bina ngama a nde, ndo yi roro: Nyak'anana ando mi, ishin'ande nda mono rupuaranga runu rua rimishi miyi. ¹⁰ Ipu ri moko, ndake bu shosho, bunyaka buyi u ndenge banjero ba Ndjambe itanga ra mararaka nker bube moko nteme. ¹¹ Ya ku roro ande: Moto moko a wara a bana bi barungu ba pende. ¹² Ndjua irenge ku roro ishanda: " Tata, peke ikapa rami ri bikete," ndo ishaba ya ku ba kapasha bikete ndjanda. ¹³ A mbishi matuwu ma makeke, ndjua irenge, ya ku toro bikete djande dja bikimi, ya kwende ra boro bweke bua tamba, u mbete ya we ya pandja bikete djande u meye ma ngona-ngono ma mabe. ¹⁴ Itanga ra mana yanda turu dja bikimi, ndjare ndja bwiki yi ku nini u kata boro bunu, ndo ya ku tapa u shoto bikete dja bikimi. ¹⁵ Ya kue ya yeke u ngunu mua moto moko ndjua boro bunu, yono ndjua ntomo u ngond'ande shini ku boro ba nguru. ¹⁶ Muana a wara a nyingi ndja u wutu bidjere dji ba nguru, kek'ake kuapa moto a nyeke a djindi bi. ¹⁷ Keke ya ku tapa u wengiyi. ya ku ya roro: U bora tata, bina ngunu ba bakimi biyi a bidjere dja buiki dja dji, ndo biyi a djindi a yasha dja shamba buiki! Ndo miy'ani ngowo, nda nguku ndjare! ¹⁸ Ndeke wende u we karuwa u bora tata ndo ndi ntshosho: Tata, nda ma kere bube a mbura riki ndo a mbur'awa. ¹⁹ Shi nda kara yemen'ande bi puru muan'awu bi, u posho ngo moko ndjua bina ngunu bawu. ²⁰ Ndo ya ku katuwa, ndo ya kwende u mbete a bora ishanda. Ngo a wara yande munu tamba, ishanda ya ku mono ndo irerere ri ku nguata, ya ku tshuku mbanga ya ku moko nkondo u moyo ndo ku nguayi. ²¹ Muana ya ku noro ya nde: Tata nda ma kere bube a mbura a riki ndo a mbur'awu, Shi nda yemen'ande bi puru muan'awu. ²² Kek'ake ishanda ya ku roro bina ngunu band'ande: "Ishend'anana buashi buasha iyeke rini ra risheke ra neke, ndo n'ney'ana; n'ney'ana ka kana u nembe ndo poko sha para u mikoro nyanda. ²³ Yi rat'ana muana a ngombo ndjua nyutu ndo nyak'anana. Tshua dji anana ndo tshua nyak'anana. ²⁴ Ishin'ande muan'ami yono a monoko buini a wara ndjua wu, ndo a ma shakuwu. A wara ndjua rimi ndo a ma moniyi." Ndo ba ku tapa u nyaka. ²⁵ U itanga rini, muana ndjua ngotara a wara ku mangondo. A mi ya karuwa ndo a ntoro ya ngama a mburu, ya ku woko ngomo ndo mamini. ²⁶ Ya ku boko moko ndjua bina ngunu mbere ndo ku nguru runu rua shambaka. ²⁷ Muina ngunu ya ku ntshosho: Muan'a nyowo a ma wi karuwu, ndo, ishu a ma djaka muana ngombo ndjua nyutu, ishin'ande a ma wi karuwu a rutoko shanga. ²⁸ Muana ndjua bukoto ya ku wata kabu, ndo yaku bere u nini. Ishanda ya ku punu, ndo ya ku mondoro ya u nini. ²⁹ Kek'ake ya ku barara ishand'ande: Rende, dja kere mashewe ma bwiki a make mi ikereshe ngunu, u bere toko womono toto shawu, ndo kebe u toko peke mbe muana ngombo ande ndi nyaka ando ba mbayi shami, ³⁰ Ndo itanga ra miyi muan'awu, yono ndjua we dji bikete djawu ando bawata bi ba ndumbu, dji ishini yande a nyashi wene muana ngombo ndjua nyutu. ³¹ Ishande ya ku noro ande : Muan'ami, wiyi ando mi matuwu ma makimi, ndo dja bikimi djiy'ami, djiyi djawu. ³² Kek'ake dja rombo busheke biti u kere iyoro ri bunyaka ndo biti u nyaka, ishin'ande muana nyowo yono ndjua monoko wene a wara ndjua wu ndo a ma shakuwu. A wara ndjua rimi ndo a ma moniyi.