¹ Ndji ku war'ande rushuwu rua sabata, Yesu ku nini u kata mburu a kumu moko ndjua bafarisayi shini ku dji bidjere, bafarisayi ba wara bi nende mishi poro. ² Ndo rende, moto moko u bosho buanda a wara ndjua wuru rutoko. ³ Yesu ku wuru bayishi bi mikendje ndo bafarisayi: Ndjiyi dja yemene u bereshe moto rushuwu rua sabate? Mbe kuapa djiyi ikini? ⁴ Kek'ake ka ba toko barara bi. Keke Yesu ku barama u mbete a yono a tataka, ya ku mereshe ndo ku nekere ya kuende. ⁵ A mbishi ya ku ba roro: Nani u ndenga yini yi mono muan'ande mbe ngomb'ande a muaka u ibembe rushuwu rua sabate yi bere mpunushu mun'anana? ⁶ Ndo ka ba toko wara a rueye ru marara. ⁷ Yesu ku mon'ande bana ba nguru banda ba ntshoroko maraka mi bukoto u mese. Keke ya ku ba bokosho nkondo munui: ⁸ "Itanga moto a maka ya yi wuru u manyaka m'ibaka, a reke we shikimi u iraka ri bukoto, u butete bua nde, dji ruere war'ande ba wuru moto ndjueke ndjua rutono u ireke wene. ⁹ Ndo yono a ma bu wuru penda yini yi iroro: Nyeke yande iraka rawa. keke, bushonyo bu iwata, we shikimi u iraka ri ma manasha. ¹⁰ Kek'ake itanga moto a make ya iwuru, yaka we shikimi u iraka ri mamanasha. U ipu rini, keke moto yono ndjua a ma iwuru a to ya yi mono yi iror'ande: "Mbayi, yaka ra bosho u iraka ri bukoto". Keke ba bakimi bana ba ntshikimi ando awu u mese bi mono ande wiyi ndjua rutono. ¹¹ Ishin'ande, yono amaka ya totoro bi nka nkarasha, ndo yono a maka ya karasha bi nto ntotoro." ¹² Yesu ya ku roro a yasha moto yono a ngur' ande:" Itanga ra noriki wene bidjere dja muanya mbeki dji ikokoro, a reke wa wuru bambayi shawu, baana ba nyowo ndo ba bot'awu mbe ake bini biroko bane bi ngam'awu, ishin'ande bi ruere kara iwuru a wene ndo ba u ikereshe a wene ipu imoko. ¹³ Kek'ake itanga rini ra noriyiki wene iyoro, wuru bapoto, bini bitowo, bane ba meke tikinyi ndo bane ba boriyo mishi. ¹⁴ Keke u wike wara a bunyaka ishin'ande ba kapa ruere kara ikarasha a rundu. Ishin'ande bi yika yikarasha à rundu u rushuwu ru ma wumuwu ma bate ba rongo. ¹⁵ Moko ndjua bane ba shikimi ando Yesu u meshe ma moko a woko yanda toto shini ngowo, ya ku nor'ande: "Bunyaka bu wara ku bora yono idji bidjere u kata bukumu bua Ndjambe." ¹⁶ Yesu ya ku marara : Moto moko ya ku roriyi iyoro ra rinene ri bunyaka, ndo ya ku wuru bate ba buiki. ¹⁷ U Itanga ri dji, ya ku tomo muina ngunu ya u we shosho bana ba wuru banda: Yi anana bidjere dji ngama. ¹⁸ Ba bakimi bana ba wuru banda ba ku punushu moto a moto runu rua ngubushu. Ndjua bukoto ku noro ya nde : Nda shombo ngondo ndo djiy'ande nde itombo, ndak'irombo u pokosho. ¹⁹ Ndo yindjueke ya nde: Nda shombo ba ngombo, n'nomo a ngara shoko itana, keke koyo ndende u ba kiki; ndak'irombo u pokosho. ²⁰ Ndo moto ndjueke ya ku noro ande : Nda ntsheke tombo ngata, irake rini a mereke miyi u wiyi. ²¹ Muina ngunu a karuwa u bora kum'ande ndo ku nondosho meyi mane ma makimi. Keke kuma mburu ya ku wata kabua ndo ya ku roro muin'a ngunu yande : Yaka mbanga u mingara nya boro ndo mimboshoro, yi rata bapoto ane, bina bitowo, ba boriy'a mishi ndo bane ba meke tikinyi. ²² Muina ngunu ku roro ande: Kumu, tshua kere runu rua we tshu tomo, ndo maraka mi munu Kate. ²³ Kumu ya ku roro muina ngunu: "Yaka u mboko sha shinene ndo ngama a mashobo. Bana bi monosho wene a banda, ba wandiya bi nini u boro buama. Keke, mbur'ami yara ndja yoro ²⁴ Keke a ngwo,ndaka ishosho rueyi rumoko: U ndenga ba bana ba nguru miyi bi bukoto, kuapa moto yi dji bidjere djama." ²⁵ Djoro dja bate ba buiki dji kuend'ando Yesu. Ya ku bamana u mbete a djindi ndo ku roro: ²⁶ "Mbe moto yiyi u boro buama, djiyi ande yi pondo miyi u reke ishanda, inyanda, ngar'ande, baana bande, ba binyande bi bawata ndo bi barungu ndo aki u reke a monyo muanda. Ngona ngono, moto yono a kapa ruere wara ngwek'ami bi. ²⁷ Yono a meke totoro nte mua wesheshe muanda ndo a meke we ndaba miyi, yono ngowo a kapa ruere wara ngwek'ami. ²⁸ Keke nana, moko a yini a noko ya u shoro mburu ndja ndembe a riki ndja u rende, yi bere shikimi bukoto a shini ndo yi kere nombo u yeb'ande: Dja nomboko biroko buiki mbuenye? Ndiyi a ndo biroko dja buiki miyi u we toro u mamanasha ma yinde? ²⁹ Kek'ake mbe a tapa u yi shoro ya u bere we yi manasha, ba bakimi bana bi yi mono ande she ya shiri bi tapa u ntsheye. ³⁰ Bi rooro: Moto yono a mana tapa u shoro mburu, keke ka toko yemene u imana bi." ³¹ Mbe kuapa kumu nane, mbe ye nana bukete ba kumu ndjueke, yi bere shikimi bukoto shini u ya wururu ande: ndo bate biy'ami binunu ishanga ndi ruere we nana a keket'ami wono a miki a bate binunu mashanga mapende? ³² Mbe a bere yemene, yi tomo ba nyamboko u boro kumu yono indjueke, itanga ri yande munu tamba, ndo yi nombo ba u dji nkondo mua poro. ³³ Idji ngosho, kuapa moko u ndenge a yini yi ruere ru wara ngwek'ami mbe a bere bere dja bikimi djini dji yande a djindi. ³⁴ Ngere mu ikete ra risheke, kek'ake mbe ngere mua shiri piyi a mundu, bi kara mu tushu piyi a yeye? ³⁵ Mua buaka ngona ngono mbe ishini shini, mbe ishini imbembere, bi mubo muboko u bushobo. Yon'ake yiyi a mato mi woko yi woko.