¹ U itanga rina, bate ku wiyi u rondosho Yesu ipu Pirate a woshoro yanda makere ma bina Garera ba djaka yanda ando mi bashutu itanga ra wupushuku banda Ndjambe minamba. ² Yesu ku ba barara: Bua nguengiyike mbueye? Bina Garere bana ba mono ntanda ipu rini, bawara bakere bube ureke bina Garere ibeke? ³ Kuapa, keke ndake bu shosho; kek'ake mbe bua be barara miteme nyini, bu wuwu buini bakimi ipu ri moko ngo bande. ⁴ ndo ake bate bana ishanga a inana bana mbura a ndembe a riki dja Sirowe ndja u rende yi ba buere ndo ba kuwa, bua nguengiyike mbueye? Bawar'ando bube bua reke bana ibeke ba bakimi ba Yerusareme ? ⁵ Kuapa, ndake bu shosho: Kek'ake mbe bua be barara miteme nyini, bu wuwa buini bakimi ipu ri moko ngo bande. ⁶ A mbishi Yesu ku boko nkondo munu : Moto a wono nte mua fiki u ishobo rande ra vinye ndo kue yande u shoto ndombo sha fiki, keke kashe shi mono. ⁷ Ndo moto ku shosho nkere a ngunu'ande: Rende! Dja kere mashewe mashata a miki miyi u shoto ndombo u nte munu mua fiki ndo kara ntsheke shi mono. Mu kekere. Ishini yeye a nyiki mu iraka ngona ngono? ⁸ Kek'ake nkere a ngunu ku marara: Kumu toko kara murekere ishewe rini. Miyi ri titimi u kuandja mundu, ndi shi shiki bitete. ⁹ Shoko sheke, ishewe ra miki u bosho mu tutu ndombo, mbe mua bere tu ndombo u mu ba batare. ¹⁰ Yesu a yishike u kata imoko ndja Sinagongo rushuwu rua sabate. ¹¹ Mono, ngata a ma wara u nono a nyumu ndjua me a nembeshe rutoko mashewe ishanga a inana; a wara ndjua wumu kumbu ndo kasheke wara a bu nono bu shembuwu. ^{13 12} Itanga Yesu a mono yande, ya ku nguru, ndo kunor'ande : Ngata, buwara buawa bua kumbu bua shiri. v 13 Ya ku nyaya mayata, mun'anana ngata ya kushembuwu ndo ku tonoshe Ndjambe! ¹⁴ Kek'ake, kumu ndjua Sinangongo a woko bube ishini Yesu a bowo yande moto u rushuwu rua sabate. Kek'anana kumu ndjua Sinangongo ya ku shosho yoro ra bate: Tshuiy'ando matuwu mashamunu ishini kukere ngunu. Yi nanaki bi bu bereshe u matuwu mana ndo kuapa u rushuwu rua sabate. ¹⁵ Ndo Kumu ku ba barara: Buini bina mashe mapende, nana u ndenga yini ibere tunu pund'ande mbe ngombo u rupanga ndo ye nata u nyushu mashe? ¹⁶ Ndo ayashaki ngata yono, ndjua ikundu ra bora Abarapama, yono Satana a kande yande mashewe ishanga a inana, bara bere ntunu ishini yeye rushuwu rua sabate? ¹⁷ Itanga Yesu a totoko yande ngosho, bin'ikembe rande ba bakimi ba ku yoro a bushonyo, kek'ake yoro ra rikimi banyakaka u meyi ma masheke makereke yande. ¹⁸ A kaka ror'ande : Bukumu bua Ndjambe bua mpuanyasha ndo yeye, ndo ndi bu koriya a yeye ? ¹⁹ Bua mpuanyasha a rundombo ru mutarda runu moto a wono u ngond'ande; rundombo ru ku pushuwu, ru ku nanga nte mua munene, ndo bapuru bi tshondjo u kata tamba sha mundu . ²⁰ Yesu ku kara roro: A rinane ri ruene miyi u koriyi bu kumu bua Ndjambe ? ²¹ Bua mpuanyasha a levene rua wosho ngata u puturu ando ndjere ishata shi bunana, ndo musabu mua mukimi ku shenduwu mundu. ²² Yesu a wiki shamba u mara ma manene ndo ma makeke ndo a wiki yishi a weke ra Yerushareme. ²³ Ndo moto ku nguru : Kumu, djiy'ande pa ndamba a bate ndja ikeke iwondjowe? Yesu ku ba barara: ²⁴ Ker'anana bunono buini u nini u mboko ndja ikuku ra ikeke. Ishini ndaka bu shosho bate ba buiki bi ki kiki u nini ndo ko bishe nini bi. ²⁵ Itanga muina mburu yi katuwa yande ndo yi riti yande ikuku, buini, buwara ku bushobo, bu tapa u kokoro ikuku, bu roro: Kumu, Kumu tshu ripiri! Keke yi bu barara: Kara ntsheke bu yebe mbe buiyi ba nane ! ²⁶ Anana butapa u roro : Tshua djia ndo u nyo u bosho buawa, ndo wa ma yishi u mboko shiti. ²⁷ Keke yi kara bu barara: Kara ntsheke bu yebe mbe buiyi ba nane. karuw'anana tamba ndo me, buini bakimi bakere bube. ²⁸ "Ku nono iwara birere ndo ma shumunu ma mini, itanga ri mono Abarapama, Isaka ndo Yakobo ndo bangandjambe ba bakimi u kata bukumu bua Ndjambe, kek'ake buini, bi buboko u bushobo! ²⁹ Bate bi wiki punu u Esete, u Weste, u Noro ndo u Side. Bi wake wara u meshe u bukumu bua Ndjambe. ³⁰ Ndo rende, bane bi ma manasha bi wara bi bukoto, ndo bi bukoto bi wara bi ma manashe." ³¹ U itanga rini, Bafarasayi beke ba ku wiyi ngama a Yesu ndo ku noro : Kobuwa! Yaka tamba! Herode Antipase anoko ku idjaka. ³² Yesu ku ba barara: Yak'anana ndo bu shosho nguenge munu : Rende, ndake bingi ba demo ndo ndake bereshe bate a rina ndo a ngeshe, ndo rushuwu rua ntshata ndara nda manasha. ³³ Kek'ake a rini, a ngeshe ndo ngeshe mua wono, ndi wata mboko mi u wende. Ishini dja kapa busheke gandjambe iwa u mbete ndjeke u bere wara u Yerushareme. ³⁴ Yerushareme,Yerushareme, Wene wa meke djaka ba ngandjambe ndo wa meke kuete mamanya bana ba meke bande itomosho! Shoko buiki mbuenye a shotoko miyi u kokiyo baana bawa, ipu ra meke kokiyo koko baana banda u shini mayamba mande, ndo wene kawa sheke wondo bi. ³⁵ Rende, mbur'awa bi irerekere; ndaka bu shosho, wapa kara mbono bi inamana iroro buin'ande: Yara djua purushu yono a miki u rukombo rua Kumu.