¹ U itanga rina, bate ba ku yakokiyi u binunu-binunu, u ipu ra nde ba weteke ya nyekeshe bana a ibeke, Yesu ya kutapa u shosho baweke bande: Bukoto bua meyi ma makimi, bu ya rondo u luevene ru ba farasayi, ruiyi rueye rua masha mapende. ² Kuapa ikete ra shuama ri bere punu u yembe ndo ra shueye ri bere banda u yebe. ³ Irake rini mana ma makimi mi roro buini u kata muimini bi mawo mawoko u kata yembe, ndo mana mi toto buini u itua u ma mburu ma kata bi masho-mashono a riki ra shamba mburu. ⁴ Ndake bushosho, buini bana buiyi bambayishame: A reke buawoko butete bana ba nyaka rutoko ndo a mbishi yini, ko ba kara kere rueyi rueke rua reke. ⁵ Ndi bushu bushundju nana yi rene buini u tini: Tin'anana yono, a mbishi u mana djaka, yiya ndo bu nono bua boko u kata ibembe ra ngindi ra tiyi; Eh, ndake bushosho, yande yono iruere buini tini. ⁶ Ma tshodjo matana ka ba ntoko ma kapa a puaramga ipende sha shikeke? Keke, kuapa a imoko u kata manda ra ngu banda pimbi u bosho bua bora Ndjambe. ⁷ Ndo ayasha puiyi sha ntshu muini bake shi bara sha shikimi. A reke bua woko butete: Buiyi a nganga ndja inene ureke matshodjo ma buiki. ⁸ Ndake bushosho, ndjua nkimi yono a mpuesheke u bosho bua bate, Muana moto yi ngwengueshe ayande u bosho bua banjero ba bora Ndjambe; ⁹ Kek'ake yono a mbereke u bosho bua bate bi me mere a yande u bosho bua banjero ba bora Ndjambe. ¹⁰ Ndo ndjua nkimi a ntotoko bube a riki ra Muana moto, bini nimbishi mandimbi manda; kek'ake yono a ntowoko Nyumu ndjua Ntsheke, yanda ko bi nimimbishi bi. ¹¹ Itanga ri we ba burata u ba Sinangongo, u bosho bu ba rumbushu ndo bakumu, a reke bu ya tatisha u ipu nana ri rene buini u ya shuwuru mbe aki ipu ri rene buini toto; ¹² ishin'ande Nyumu ndjua Ntsheke yibu yi buyishi u itanga rini mana mi rene buini u toto. ¹³ Moto moko ku roro Yesu, u ndenge a yoro ra bate: Muyishi, shosho muan'amaya tshua kapara ando nde bikete djiti dja sha biti kiti. ¹⁴ Yesu ya ku marara: Oh moto, nana a ntshiki miyi u wara shushu, mbe kuapa shini ku bu kapasha bikete djini? ¹⁵ Ndo ya ku ba ror'ande: Buara buanya bui ya rondo u ma bororo ma nteme; ishin'ande monyo mua moto mua kapa shini buiki bu biroko djini djiyi yande ando djindi. ¹⁶ Ndo ya ku ba boko nkondo munu: Ma shobo ma muini biroko ma punushu bikete dja buiki. ¹⁷ Ndo ya ku boko buanya ya mene ku ror'ande: Ndi kere mbuenye? Ishin'ande nda kapa a iraka ri rondo bikete djame. ¹⁸ Keke ku ror'ande, Rini ri kere miyi: Ndi pa pandja djanga djama, ndo ndi sho shoro dja binene u reke, ndi yo yorosho bikete djama dji mashobo ndo bikete djama dja bikimi; ¹⁹ ndo ndi shosho monyo muam'ande: Monyo muama, wiyi a bikete dja buiki dja rondo shini mashewu ma buiki; ya kiti, dja, nyua, ndo u nyaka. ²⁰ Kek'ake Ndjambe kunor'ande: Ipushuru, u butuwu bua rini monyo muawu bi karaka mu rombo; ndo djini dja noriyi wene dji sha wara dja nane? ²¹ Djiyi a yasha ipu imoko u yono a make ya yorosho bikete dja nganga shini yande ya mene, ndo yi bere wiyi muini biroko shini Ndjambe. ²² Ambishi Yesu ku shosho baweke bande: Iraka rini ndake bu shosho: A reke bua bondomo shini monyo muini u djini dji dji buini, mbe aki shini rutoko ruini u rini ri reye buini. ²³ Monyo mua reke bidjere ndo rutoko rua reke mapere. ²⁴ Mon'anana mayapanga: Ka ma meke wono mbe ku kunu, ma kapa a iraka ra meke ma rondo mbeki yanga; ndo Ndjambe a meke ma djishi. Buinakui bua reke bapuru nganga! ²⁵ Nana u kata ndenga yini ishini mabondomo mande yi rene nyaya katobo ka moko u ma bikiri ma monyo muande? ²⁶ Mbe djara ka bua nyemeneke u kere mbe ka rueyi ka kakeke bi, ishini yeye bua mondomoko buini u runu rua ntshare? ²⁷ Rend'anana ipu ra nangaka matendere: ka ma meke kere ngunu mbe aki ku tumu mapere, Kek'angowo ndake bu shosh'ande mbe ya Soromo, u kata rutono ruande rua rukimi, katoko reye mapere ngo rimoko ra mande. ²⁸ Mbe djare Ndjambe a neyesheke minenge nyini nyiyi a rini u mashobo kek'ake a ngeshe bi mi boko u tiya, ishini yeye yi bere ya bu reyeshe buini, bate bi maweshere ma makeke? ²⁹ Ndo buini, a reke bua shoto rini ri dji buini ndo rini ri nyu buini, ndo a reke bua bondomo. ³⁰ Ishin'ande djini dja bikimi, bate ba shina mana bana ba bere yebe Ndjambe bake bishoto. Ishiniki a meke yebe ande buiya nyingi a djindi. ³¹ Shoto anan'ake bukoto bukumu bua Ndjambe; ndo bikete djini dja bikimi bi buye buyeke a djindi ureke. ³² Buini yoro ra rikeke, a reke buara a butete, shin'ande ishinaki a ma kanana busheke u bu yeke bu kumu. ³³ Kap'anana bikete djini djiyi a yini, ndo bu bi yeke ba poto. Ya keresh'anana ma mara ma meke we nunu bi, biroko djini dja nganga dja meke we shiri u kata riki, u iraka ra mereke we karuwa muembe ngama, ndo u iraka ra meke we djiki bashenene. ³⁴ Ishin'ande iraka riyi biroko djawa dja nganga, iraka ra ntshiki wene ayasha nteme muawu. ³⁵ Rey'anana mikoro u marongo mini, ndo nyindi nyini nyara nya temuwu. ³⁶ Ndo buini, buara ngo bate bana bamaka Kumu a banda u ma karuwu mi manyaka m'ibaka, shini ku nipiri mun'itoro yande ndo ikokoro yande. ³⁷ Bunyaka buiyi u bina ngunu bana Kumu a banda, u ma tororo manda, ito ba mono ba bushungu! Ndake bu shosho barabara, yi re reye nkoro muande, yi bashi bashikiyi u mese, ndo yi karuwu a ngam'abanda shini ya u ba yeke bidjere. ³⁸ Isheke wiyi mbe itanga ra mpe mbe ra ntshata, bunyaka u bina ngunu bana mbe a to bamono bushungu! ³⁹ Bu ru yebe busheke, mbe kumu a mburu a yebe itanga rini riyi muembe, yara pa bushungu ndo ko she rekere bi boro mbur'ande. ⁴⁰ A buini, wara nana ngama, ishin'ande muana moto yi wiyi itanga ri bere buini yebe bi. ⁴¹ Ndo Petero kunguru: Kumu nkondo munu wake muroro shini biti mbe shini bate ba bakimi? ⁴² Kumu yaku roro, nana yiyi nondo ndjua bikete ndjua bara-bara aki ndjua buanya yono kum'ande yi ntshiki ariki ra bina ngunu bande shini ku bayeke bidjere u itanga ra yemene. ⁴³ Bunyaka wu muina ngunu yono Kumu itoya mono ikere ipu rini. ⁴⁴ U bara-bara ndake bushosh'ande yi ntshintshiki ariki ri bikete djande dja bikimi. ⁴⁵ Mbe ki muina ngunu yono atoto u kata nteme muande Kum'ame yapa wiyi buasha ndo atapa uboro bina ngunu bi barungu ndo bina ngunu bi bawata, udja ndo u nyua, ndo awu mana. ⁴⁶ Kumu ndjua muina ngunu yono yi wiyi u rushuwu runu rua meke ya yebe ndo u itanga rini rameke ya yebe ndo imatara bitenye keke inyeke iraka u ndenge a bate bi bere a maweshere ma Ndjambe. ⁴⁷ Muina ngunu yono ayebe ru wondo rua kum'ande katoko roriyi mbe kukere ipu rawondo kum'ande, bi momoro koro sha buiki. ⁴⁸ Kek'ake yono abere nyebe, akere meyi mana ma nyereme u monosho ndjoro, bi momoro koro sha shikeke, bi rorombo dja buiki u yono ayeke banda dja buiki, ndo bi rorombo ayasha dja buiki ureke u bora yono ayeke banda dja buiki ⁴⁹ Nda wiyi ishini kuteme tiya a shin'amana ndo ra ngondoko ye mbe tshuare ande tshua mana temuwu? ⁵⁰ Kek'ake ibatize riyi, rini ri tishi banda, ndo ipu nana a peke rindi ndanda ti ndo iyemene rindi! ⁵¹ Bua nguengey'ande nda wiyi rata poro ani a shin'amana? Kuapa, ndake bushosh'ande nda wi rateki makapasha. ⁵² Ishin'ande ani ngama-ngama, bate batana ba mburu imoko bi ka kapasha bashate u bapende mbe bapende u bashata . ⁵³ Bi kakapasha tata ando bana bi ba rungu, ndo bana bi ba rungu ando ba tata, inyande ando muana ndjua ngata,ndo muana ndjua ngata ando inyande, mbosh'ande ndjua ngata ando ngara muan'ande,ngara muan'ande ando mbosh'ande djua ba wata. ⁵⁴ Yesu akaraka shosho ndjoro ra bate: Itanga rimono buini ibende ra mburu ripunu u ma kitiri mitanga, kek'angowo, bu ror'ande: Mburu inyonyowo ndo rueyi runu rukereme. ⁵⁵ Ndo mbe bua mono pungu ikuishi ipunu u sud, buror'ande muanya mua munono mua kuwara, ndo rueyi runu rukereme. ⁵⁶ Buini bina masha mapende, buake yebe u shimbiri ndjendje dja shini ndo dja riki, ndoki ipu nana ameke buini shimbiri ndjendje dji matuwu ma rini? ⁵⁷ Ndo ishiniyeke a mereke buini shimbiri buin'amene runu ruiyi rua rongo? ⁵⁸ Itanga rameke wene buina muini ikemb'awa u bosho bua numbushu, kere bunono shini wene wokosho ande a mboko, ishin'ande ka yidjaka makambu u bosho bua shushu ndo shushu a reke yi reye u bora purushu ndo purushu a reke ishiki u buroko. ⁵⁹ Ndake ishosh'ande ko washe punu u nono to ndo itanga riputu wene ra rikimi irawa ri ma manasha.