¹ Ndji ku kereme ande Yesu a wara yi rombo Ndjambe u iraka imoko ngowo. Itanga rini ra manasha yande, moko ndjua baweke bande ya ku noro: Kumu, tshu yishi ipu ra rombo Ndjambe, ngo puara Yone a yishi yande baweke bande. ² Ya ku ba ror'ande: Itanga ra nomboko buini Ndjambe, bu ror'ande: Tata! rukombo ruawa ruara ru ikini; Bukumu buawo buiyi. ³ Tshu yeke arini djampe rite ndji rushuwu rua rukimi; ⁴ Tshu rimbishi bube buiti, ishin'ande tshuake rimbishi a biti ndjua nkimi yono a make tshu kereshe bube; ndo a reke wa tshu shende u ma kikiri ma mbondo bi. ⁵ Ya ku kara ba roro: Mbe moko u ndenge a yini yara a mbaya, ndo ye mono u ndenge butuwu shini ku noro: Mbayi, shombo mampa ma shata, ⁶ ishin'ande moko ndjua ba mbaya bama a mi punu u rende koyo u boro buama, ndo nda kapa a ikete ri nyeke bi. ⁷ Ndo mbe, u kata mbur'ande, Mbayi yono a marara: A reke wa ndja rubu bi, Ikuku ri riyi ra kanga, bana bama ndo miyi tshua mana tshondjo, nda kapa ruere wumuwu shini miyi u yeke mapa bi, ⁸ Ndaka bu shosho, dji sheke wuara ande yapa she wumuwu bi shini ya u nyeke a manda ishin'ande yi mbay'ande, yi wu wumuwu ishini rubu ruaka ya nyaka, ndo yi nye nyeke dji bikimi dji yande a djindi ndjara. ⁹ Ndake bushosho ayash'ande:"Burombo ndo bi buye buyeke; bu kokoro ndo bi bu riburipiri. ¹⁰ Ishini moto ndjua nkimi irombo iwosho; ndo moto yono ishoto ipepete; ndo moto yono ikokoro yara ndjua ripiri. ¹¹ Tata nane u ndeng'ayini yono yi yeke muan'ande imanya, mbe a nombo djampe? Mbe kuapa, mbe a nombo shue, yi nye nyeke ndjowo a shumu yini ndja ya u nyeke shue? ¹² Mbe kuapa, mbe a rombo ikere, yi nye nyeke kangome? ¹³ Mbe djar'ake ande, buinu buiyi bate ba babe, bua nyebeke u yeke bana bini bikete dja bisheke, ipu mbuenye aki Tata yono yi u riki ibere yande u yeke Nyumu ndjua Ntsheke u bane bake nombo ande. ¹⁴ Yesu ku bingi demo moko yono awara ndjua kamama. Itanga demo a mpunu yande, kamama ka ku toto, ndo yoro ra bate ri ku wara a bunyaka. 5 Kek'ake ibeke ba roko ande: ku Berezeburu, kumu ndjua ba demo, a mingiki yande ba demo. ¹⁶ Ndo ibeke, shini ku nkiki, ba nomboko yendje rini ra miki punu u riki. ¹⁷ Ngo Yesu a yebeke yande djengiyi dja banda, ya ku ba roro: Bukumu bua bukimi mbe bu ya kapara bu mene buiyi bua buaka, ndo mburu imoko yi pukuwu a riki ri indjeke. ¹⁸ Mbe djare ake nde satana yi ya kapara yande a mene, ipu nane bukumu buande ikara bu yembete a nkiti? Ishini a noko buini ande nda mingiki ba demo ku Berezeburu. ¹⁹ Ndo mbe miyi ake, nda mingiki ba demo ku Berezeburu, bana bini, ku nane a mingiki bande? Iraka rini bi wake wara ba mene ba shushu bini. ²⁰ Kek'ake, mbe djar'ande nda mingiki ba demo a nembe mua bora Ndjambe, ndji nde bukumu bua bora Ndjambe bua wiyi u buini. ²¹ Mbe yar'ande moto ndjua nono ndo ndjua ya pongo bushe a bikete dji itumbu a rondo mbur'ande, bikete djande djiyi dja rondo busheke. ²² Kek'ake, mbe djar'ande moko yono a ma mparara bunono ureke a nguiri ndo a ma neke bonono, yi ntantambara bikete djande dji itumbu dja bikimi djini dja wekemeke yande, ndo yi kapasha djindi bate. ²³ Yono i bere wiy'ando mi, yi muin'ikembe a mi, ndo yono ndjua mereke kokoyi ando mi a make pandja. ²⁴ Itanga nyumu ndjua mbindi a punu yande u bora moto, a meke wende ku maraka ma womo, shini kue ya kiti inyomo. A bere ya ri mono, yi roro: Ndi ka kara karuwa u mbur'ami yini ya miyi mi punu; ²⁵ Ndo itanga ri toro yande, yi to yimono ndja wombo ndo ndja roriyi. ²⁶ Keke yende, ndo yi wosho nyumu sheke shamboro sha neke yande kabua; shi nini u mburu, shi wate iraka nono, ndo puara ande dja mamanasha ndja bora moto yono yiyi ndja yi be u shamba ndja bukoto. ²⁷ Itanga Yesu a weteke ya toto ngosho, ngate moko ya ku boko mbere u ndenga yoro, ya ku roro: Bunyaka u bora yono yi itotoro u ikundu ndo yi inyomoshou! ²⁸ Kek'ake ya ku roro: Bunyaka buara u bora bane ba ngoko rutoto rua bora Ndjambe ndo baka ru rondo. ²⁹ Ngo bate a ya kokiyiki banda u djoro, ya ku tapa u roro: Kumbu yini ngowo yi kumbu ndja ibe; ya nomboko rueyi rua nkama; kwapa rueyi rua nkama ru ba yeke banda mbe dja bere wara pamunu runu rua bora Yona. ³⁰ Shin'ande ipu ri moko Yona a wara yande yendje shini bina Niniwe, ipu ri moko muana moto yi wara a yande yendje shini kumbu yini ngowo. ³¹ Kumu ngata ndjua Midi yi ka katuwu rushuwu ru marumbushu ando bate ba kumbu yini ngowo ndo yi bui ba buishi makambu, ishin'ande a wi punu ku matumu ma shini a mana shini ku woko buanya bua bora Soromo; ndo rende, tshuiyi ane ngowo yono ndjua neke Soromo. ³² Bate ba Niniwi bi ka katuwa rushuwu ru marumbushu ando bina kumbu yini ngowo, ndo bi yi bui yibuishi makamba, ishin'ande ba ma barara miteme u iyishi ra bora Yona; ndo rendake tshuiyi ane ngowo a yono ndjua neke Yona. ³³ Kua moto, a meke namiyi muindi shini ku mu shiki u iraka ra shuama mbeki ku mupuruyu kantini, kek'ake ba meke mupanyiya ku riki, ishin'ande bana bi niniki bi mono yembe. ³⁴ Rishi rawu ri muindi mu rutoko ruawa. Itanga rishi rawu yi rindi busheke, rutoko ruawu rua rukimi a rundu ru ku kata yembe; Kek'ake itanga rishi rawu yi rindi ando buwara, rutoko ruawu a rundu ruiyi ku kata muimini. ³⁵ Wa penyake ipu ra nde yembe rini riyi u wene a reke riyi muimini. ³⁶ Mbe djare ande rutoko ruawu rua rukimi ruaka kenye-kenye, kuapa a itenye a ri moko ri u kata muimini, ruara rua rukimi ru kenye-kenye, ngo ipu muindi a make mu yi yembeshe a yembe ra mundu. ³⁷ Itanga ra totoko Yesu, mu farisayi moko ya ku nguru u we dji bidjere u boro buanda. Ya ku nini ndo ya ku shikimi u mese. ³⁸ Mu farisayi ya ku mono ndo ku keme ande ka she woko masha bukoto ya u djiki bidjere. ³⁹ Kek'ake Kumu ya ku noro: Buini, ba farisayi, bua nkuishiki bushobo bua ikopo ndo bu irongo, ndo u kata yini buiyi ba yoro a nkomo ando kabu. ⁴⁰ Bipushuru! yono ndjua kere bushobo ka toko kere a yasha kate ? ⁴¹ Yeke anan'ake ikete ri irerere rini riyi u kate, ndo rende, bikete dja bikimi djara dja yembeshe shini buini. ⁴² Kek'ake irerere rini, ba farisayi! ishin'ande buake putu itenye ri ishanga ra buanga, ra mboko ndo ri minenge nya mikimi, ndo ake bu keresheke rongo ndo ruwondo rua bora Ndjambe bundjere: djindi djini djarake buini kere, u bere kara wu pimbi bikete djeke. ⁴³ Irerere rini ba farisayi, ishin'ande bua ngondoko ku shikimi u maraka mi bukoto u kata synangongo, ndo bi bu wimbishiki u kata maraka mi baboro. ⁴⁴ Irerere rini, ishin'ande buiyi ngo mabandja mana ma meke monoyo, ndo a riki ra mana ma miki ba nyeke a para u bere yebe shimbi a mande. ⁴⁵ Moko ndjua bayishi bi mikendje ku wosho rutoto, ndo ya ku noro: Muyishi, a ntotoko wene ngosho, djiyi ande wake tshutowo a biti. ⁴⁶ Ndo Yesu ya ku barara: irerere rini a buini, bayishi mikendje! Ishin'ande buake nyaya bate mariti mana mi bunono u totoro, ndo ake ka bua meke kumunu buin'amene a nembe muini a moko bi. ⁴⁷ Irerere rini, ishin'ande bua ntshoroko ma mabandje mi ba ngandjambe, bana ba djaka banda u boro bishini. ⁴⁸ Keke bua neyeke bu butemue bu mineme nyi bishini, ndo buake miweshe; ishin'ande banda ba djaka ba ngandjambe, ndo buini bua ntshoroko mabandja ma bande. ⁴⁹ 9 Iraka rini buanya bua Ndjambe bua ror'ande: ndi bato batomosho ba ngandjambe ndo bapostoro; bi dja djaka ba moko ndo bi mo monosho ibeke ntanda. ⁵⁰ To mawangara ma shini, ba ma djaka ba ngandjambe ba buiki, ndo keke bina kumbu ndja rini bana Ndjambe yi monosho yande ndjoro. ⁵¹ Bukoto , ba ku djaka Abel ndo, u mamanasha, ba ku djaka Zakari, u kata ruanda rua tempero, u ndenga kinda ndo iraka ri ikini rashamba. Ngosho, ndaka bushosho a rundu, Ndjambe yi mo monosho bate ba kumbu ndja rini ndjoro ishini meye mana. ⁵² Irerere rini, ba yishi bi mikendje! shin'ande bua ma teye sapa shi buyebere; ka bua she nini buini amene, ndo bua ma wubu bana ba roko nini. ⁵³ Itanga ra punu yande u nono, ba pundu mikanda ndo ba farisayi ba ku tapa u ntindiyi a bunono ndo wete ntotosho a riki ra meye ma buiki, ⁵⁴ u nkotiyi marongo shini ku marasha u rutoto ru punushu yande u numbu muande.