¹ "Ubufumu bwamumulu bwapalanishiwa kuli bana cisumgu ikumi limo ababulile amalampi nokuyasengela shibwinga. ² Basano pali abo bali fiwelewele nabambi basano bali abamano. ³ Lelo banacisungu abawelewele basendele amalampi, tabasendele amafuta awe. ⁴ Nomba banacisungu abamano basende ifipe umwali amafuta elo namalampi. ⁵ Shibwinga elo akokwele ukwisa, bonse bayambile ukushipula nokulala. ⁶ Pakati kabushiku kwaumfwikike umusowa, 'Moneni, Shibwinga aisa! Fumeni mukumukumanya.' ⁷ Banacisungu bonse baimine nokwasha amalampi yabo. ⁸ Elyo abawelewele balandile kubamano, 'Tupeleniko amafuta pantu amalampi yesu yalashima.' ⁹ "Lelo abamano balyaswike nokulanda ati, 'Pamulandu tayatukumane mwebo nafwebo, kanshi kabiyeni kubashitisha nokuyashita mwebene. ¹⁰ Elyo baile mukushita, Shibwinga alishile, nabonse abaipekanishishe baile nashibwinga kung'anda yamatebeto, necibi caliselwe. ¹¹ "Napanuma banacisungu bambi babwele nokulanda ati, 'Shikulu, shikulu, twiswileniko,' ¹² "Nomba ayaswike nokulanda ati, 'Mucishinka ndimukulanda kuli mwebo, nebo nshimishibe.' ¹³ Eico mwishipula, pantu tamwishibe ubushiku nangu akashita. ¹⁴ "Pantu caba ngomuntu uwalefwaya ukuya kucalo cimbi. Aitile ababomfi bakwe nokubapela bena ifyuma fyakwe. ¹⁵ Kuli umo apele amatalanta yasano, naumbi yabili, nakuli umbi apele italanta limo. Naumo apokelele ukulingana namaka yakwe, naulya muntu alimine ubulendo. ¹⁶ Ulya uwapokelele amatalanta yasano palyapene aliyafuntwile nokulundapo nayambi yasano. ¹⁷ Mumusango umo wine ulya uwapokelele amatalanta yabili alundilepo yabili. ¹⁸ Lelo umubomfi uwapokelele italanta limo aile, nokwimba icilindi mumushili, nokufisa indalama shakwashikulu wakwe. ¹⁹ Napanuma yanshita iitali Shikulu wabalya babomfi abwelele nokukwisa bepusha pafyo abashilile. ²⁰ Umubomfi uwapokele amatalanta yasano aishile nokuleta nayambi yasano. Alandile, 'Shikulu, mwampele amatalanta yasano. Moneni, ninundapo amatalanta nayambi yasano.' ²¹ "Shikulu wakwe alandile kuli ena, 'Wacita bwino, wemusha wacishinka kabili umusuma! Wali uwacishinka napafintu ifinono. Ndekupela bukasunga bwafintu ifingi. Ingila mukutusha kwakwa shikulu obe.' ²² Umubomfi uwapokele amatalanta yabili aishile nokulanda ati, 'Shikulu, mwampele amatalanta yabili. Moneni, ninundapo nayambi yabili.' ²³ "Shikulu wakwe alandile kuli ena, 'Wacita bwino wemusha wacishinka kabili umusuma! Wali uwacishinka namufinti ifinono. Ndekucita bukasunga bwafintu ifingi. Ingila mukutusha kwakwa shikulu obe.' ²⁴ "Kabili umubomfi uwapokele italanta limo aishile nokulanda ati, 'Shikulu, nalishiba ati muli muntu uwashupa. Musepa umo tamwabyele, nokusombola umo tamwatandile. ²⁵ Nalimfwile umwenso ecalengele ukuyafisa italanta lyenu mumushili. Moneni, italanta lyenu ili.' ²⁶ Nomba Shikulu wakwe alimwaswike nokulanda kuli ena, 'Uli mubomfi uwabipa kabili umunang'ani, waishibe ukuti nsombola umo nshabyele nokusepa umo nshatandile. ²⁷ Kanshi ngawapele indalama shandi kuli bakasunga bandalama, pakuti nganaisa naisasanga indalama shandi nashilundyapo. ²⁸ Eico pokeni italanta kuli ena nokupela kumubomfi uyo uukwete amatalanta ikumi limo. ²⁹ Pantu kuli onse uwakwata, akapelako ifingi-kabili mukufusha. Lelo kuli uyo uushakwata icili shonse, naconse ico akwata cikapokwa kuli ena. ³⁰ Poseni umubomfi uwabula umulimo kunse ukuli imfimfi, ukukaba ukulila nokusumanya ameno.' ³¹ "Ilyo Umwana Wamuntu akesa mululumbi lwakwe pamo nabangeli, akekala pacipuna cakwe icamululumbi. ³² Kuli ena kukalonganikwa ifyalo fyonse, akalekanya abantu umo nomunankwe, ngefyo umucemi alekanya imikoko nembushi. ³³ Akabika imikoko kukuboko kwa kukulyo, nembushi nasho kukuso. ³⁴ Elo imfumu ikalanda kuli bonse abakaba kukuboko kwakulyo, 'Iseni, bonse mwebapalwa bakwatata, pyaneni ubufumu ubo bamipekanishisha ukufuma kukutendeka kwacalo. ³⁵ Pantu ilyo nalinensala mwalimpele ifyakulya; nali necilaka mwampele icakunwa; nali umweni mwalimpokelele; ³⁶ nali uwabwamba mwalimfwikile; nali umulwele mwalinsungile; nalimucufungo mwalishile mukumbona.' ³⁷ "Abalungami bakasuka nokulanda ati, 'Shikulu, nilisa mwali nensala twamipala ifyakulya? nangu nilisa mwali necilaka twamipala icakunwa? ³⁸ Nilisa twamimwene ngabeni nokumipokelela? nangu bwamba twamifwika? ³⁹ nilisa twamimwene abalwele nangu umufungwa nokumitandalila?' ⁴⁰ "Nemfumu alinokwasuka nokulanda kuli bena, 'Cine cine ndelanda kuli mwebo, ifyo mwacitile kuli uyo uwacepasha muli bamunonko, ninebo mwabombele.' ⁴¹ Kabili akalanda kuli abo abakaba kukuso, 'Fumeni kuli nebo, mwebatipwa, ingileni mumulilo wape uyo bapekanishisha ciwa nabangeli bakwe, ⁴² pantu nali nensala, tamwampeleko ifyakulya; nali necilaka, tamwampele icakunwa; ⁴³ nali umulendo, tamwampokelele; uwabwamba, tamwampele ifyakufwala; umulwele nomufungwa, lelo tamwansungile.' ⁴⁴ "Nabo bakasuka nokulanda ati, 'Shikulu, nilisa twamimwene abansala, nangu abacilaka, nangu abalendo, nangu ababula ifyakufwala, nangu abalwele, nangu umufungwa, nokukana myangwa?' ⁴⁵ "Elo akabasuka nokulanda kuli bena, 'Cine cine ndelanda kuli mwebo, ico conse ico tamwacitile kubacepesha muli aba, ninshi tamwacitile kantu.' ⁴⁶ Aba bali nokukandwa kwamuyayaya, lelo abalungami kumweo wape."