¹ Pali ilya nshita, Heridi imfumu yaumfwile ilyanshi palwa kwa Yesu. ² Alandile kuba bomfi bakwe, ''Uyu ni Yohane kabatisha; naima kubafwa. Eico aya maka yacili yale bomba muli wena.'' ³ Pantu Herodi aikete Yohane, nokumukaka, nokumutwala mucifungo pamulandu na Herodias, umukashi wakwa Philipo munyina. ⁴ Pantu Yohane alandile kuli wena, ''Tacasuminishiwa Herodias ukuba umukashi obe.'' ⁵ Herodi alefwaya nokwipaya Yohane, nomba aletina abantu, pantu bale mulumbula ati nikasesema. ⁶ Nomba elo ubushiku bwakufyalwa ubwa kwa Herodi bwafikile, umwana mwana kashi uwakwa Herodias acindile bwino pakati nokutemuna Herodi. ⁷ Na pakulanda, alimulaile icilayo ukuti akapelwa conse ico akalomba. ⁸ Panuma yakutunkwa kuli nyina, alandile, ''Mpeniko pano, pambale, umutwe wakwa Yohane kabatisha.'' ⁹ Imfumu yalipapile paco alombele, nomba pamulandu wa cilayo na bonse aba sangilwe mukulya nayo, yalandile ati cifwile cacitika. ¹⁰ Alibatumine nokuyaputulako Yohane umutwe mucifungo. ¹¹ Elo umutwe waletelwe pambale nokumupela umukashana nao asendele kuli nyina. ¹² Elo abasambi bakwe baishile, basendele icitumbi, nokucishika. Panuma yaifi fintu, baile nokuya eba Yesu. ¹³ Elo Yesu aumfwilefi, alifuminemo mu bwato nokuya ukwakuti ali eka. Elo icinabwingi caumfwile palici, balimu konkele pamakasa ukufuma mu mishi. ¹⁴ Elo Yesu akokele mu bwato amwene icintu bwingi, aumfwile ubulanda pali bena atampile ukupasha abalwele. ¹⁵ Elo icungulo cafikile, abasambi baishile kuli ena nokulandati, ''Muno ni mumutengo, ne nshita nayo yapwa. Paseni ibumba, pakuti baye mu mishi nokuya shitako ifyakuti balye.'' ¹⁶ Nomba Yesu alandile kuli bena , ''Abantu nangula tabeleko. Imwe bene bapeleni ifyakuti balye.'' ¹⁷ Balandile kuli ena, ''Tukwetefye imikate isano notusabi tubili.'' ¹⁸ Yesu alandile kuli bena, ''Leteni kuli nebo.'' ¹⁹ Elo Yesu akonkomesha icinabwingi ukwikala panshi pafyani, abulile ne mikate isano notusabi tabili. Aloleshe nakumulu, apalile nokuputaula imikate nokupeela kuba sambi, na basambi balipeele icina bwingi. ²⁰ Bonse balilile nokwikuta. Elo balongele ifya shelepo mumiseke nokwisusha imiseke ikumi limo na fibili. ²¹ Bonse abalileko bali impendwa amakana yasano abaume beka beka, ukwabula ukupendelako abanakashi na baice. ²² Palya pene acincishe abasambi ukunina mubwato batangile bayabukile bushilya, Elo ena ashele alepasa icina bwingi. ²³ Panuma yakupwisha ukupasa icina bwingi, aninine palupili mukupepa. Elo icungulo cafikile, alikofye eka. ²⁴ Nomba ubwato bwali ukutali pakufika ku mulundu, ico basendelwe na mabimbi, ico umwela wale basenda ukula batwala kumbi. ²⁵ Munshita yalenga bune iya bushiku Yesu amonekele kuntubali aleenda pacimana. ²⁶ Elo abasambi bamumwene aleenda pa cimana, batinine nokulanda ati, ''Ciiwa,'' Elo bapundile sana mukutina. ²⁷ Nomba Yesu alandile kuli bena apopene ati, mwitina! ninebo! mwebamwenso.'' ²⁸ Petelo alimwankwile nokulanda ati, ''Shikulu, nganimwebo, njiteni injise kuli mwebo, pamumana. ²⁹ Yesu alandile, ''Isa.'' Na petelo alifumine mubwato nokwenda pamenshi ukulaya kuli Yesu. ³⁰ Nomba elo petelo amwene umwela wakosa, alitinine. Alitampile nokwibila, elo apundile nokulanda ati, ''Shikulu, mpususheni!''. ³¹ Apopene Yesu alitambike ukuboko kwakwe, ukwikata Petelo, nokulanda kuli ena, ''wewa cisumino cinono, cinshi uletwishika?'' ³² Elo nomba Yesu na Petelo baninine mubwato, necimwela canaka. ³³ Elo abasambi bapepele Yesu mubwato nokulanda ati, ''mucishinka ulimwana wakwa Lesa.'' ³⁴ Elo bayabukile bushilya, baishile mupanga ya Genasaleti. ³⁵ Elo abantu bamuli ilya ncende baishiba Yesu, nabo baishibisheko abantu ababashingulwike muncende, abantu batapile ukuleta abalwele. ³⁶ Balamupapata ukuti aleke abantu bakumye kucisepe camukansu wakwe, nabonse abakumisheko balipolele