¹ Eico, nebo nemufungwa wakwa Shikulu, ndemupapata ndelanda ukuti mwendele mu bwite ubo mwakutilwemo. ² Ndemupapata mubelelele mubupete namukunakila konse nokutekanya, abapimpa mukutemwa. ³ Mube abacincila muli buumo no mushilo nokupikintika mukusunga umutende. ⁴ Twaba umubili umo nomushilo umo, ngefyo twakutilwe mubusumino bumo. ⁵ Peka kwabafye Shikulu umo, busumino bumo, ulubatisho lumo, ⁶ na Lesa umo nashibo wabonse, uwapamulu pali bonse peka uwaikala pali bonse, ⁷ Kuli cilaumo kwalipelwa ishuko ukulingana necipimo cabupe bwakwa Klisitu. ⁸ Ngefyo amalembo yalelanda; ukuti "Ilyo apilwike mumulu atungulwile abasha mubusha, napeka apele ifyabupe ku bantu. ⁹ Cipilibula shani kuti "Alipilwike," pantu alikokele ukwisa pancende shapanshi pa calo? ¹⁰ Uwakokele niuyo wine uwapilwike ukuyapulamo mu myulu yonse, pakuti esushiwemo ifintu fyonse. ¹¹ Klisitu apele bamo ukuba abatumwa, bamo bakasesema, bamo bakabila bambila nsuma, nabambi bakakumba nabakasambilasha. ¹² Apele ifi fyapupe pakuti umulimo wabana bakwa Lesa abamushilo ubombelwemo, pakukula umubili wakwa Klisitu. ¹³ Akonkenyepo ukukula umubili mpaka bonse tukafike pakwishiba buumo mubusumino namukwishiba umwana wakwa Lesa, napakuti twaisakula nokufika pamulingo wakwisula kwakwa Klisitu, ¹⁴ Twalikulilwe na Klisitu pakuti tatusendelwe ngabana abapitwa namabimbi, nangu ukupitwa nomwela wa masambilisho no kufinsha kwa bantu ababufyunfyuntungu bwabo. ¹⁵ Lelo, ukulanda icishinka mukutemwa, ninshi tulekula mu nshila ya uyo wabango mutwe, ukuti, ni Klisitu. ¹⁶ Klisitu akulile umubili onse, nokuushimpa pamo pakuti kube ukutungilila mumbali shonse, nomba ilyo ulubali lonse lwabombela pamo, calenga umubili onse ukukula pakuti wakulila uwine weka mukutemwa. ¹⁷ Nomba ndelanda nokukonkomesha pali ici muli Shikulu, pakuti tatwendele ngabena fyalo benda mubuwelewele bwamano yabo. ¹⁸ Balifitwa mumyumfwile yabo, peka abakosa imitima ukufuma kubwikashi bwakwa Lesa wabo pamulandu wabututu kwabo, peka pamulandu wakukosa kwamitima yabo. ¹⁹ Bali ababula insoni nokwikalilila mumitontonkanishishe yabo mufyo palepanga kukubomba bucilende nokukumbwa ifyama nkowesha fyonse. ²⁰ Lelo mwebo tefyo mwasambilile Klisitu. ²¹ Ndeshininkisha ukuti mwaliumumfwapo pali ena, mwalisambilishiwapo ukusha fyonse ifyamubwikashi muli ena, ngefyo icishinka caba muli Yesu. ²² Mwasambilishiwi ukusha fyonse ifyamwibwishi bwakale, ukufula ubuntu bwakale. Pantu ubuntu bwakale bwalikowela pamulandu wakufwaya ulungolo. ²³ Awe mupangwe abandakai kumupashi na mumatontonkanyo, ²⁴ no kufwala ubuntu mumimonekele yandakai uwapangile mucipasho cabu Lesa- mukulungama nabumushilo bwacishinka. ²⁵ Eico, funyenipo bufi, lanshanyeni icine umuntu onsefye nomunankwe, pantu tuli filundwa fyabanensu. ²⁶ Kalipeni lelo mwibemba. ²⁷ Mwileka akasuba kawe ninshi namufulwa. Mwipela ciwa insambu. ²⁸ Uyo onse uwaleiba etwalilila ukwiba. Lelo ubombe, ukubomba imilimo iwakwafwa namaboko yakwe, pakuti engakwata icakupelako uyo onse ulecula. ²⁹ Mwileka icabipa conse cifume mukanwa kenu. Bofyeni amashiwi ayakwafwa mukukula bambi, ukulingana namafya wabo, pakuti amashiwi yobe yengaba ayakwafwa bonse abaleyomfwa. ³⁰ Mwikalifya Umupashi Wamushilo uwa kwa Lesa, pantu nimuli ena emo mwakakatikilwe kubushiku bwabupususho. ³¹ Bikeni icabukali conse, icacipyu, icakufulwa, icalubuli nensele kumbi, pamo pene neshabubifi conse. ³² Beni abamutembo kuli umo nomunankwe, abanaka imitima, abailekela ukubifya ngefyo Lesa muli Klisitu amwelele mwebo